Hebreo 2 - Ti Biblia (1973)

Rebbengtayo ti agtultuloc ken Cristo.

¹ Gapuna rebbengtayo a regtaan nga imatangan dagiti banbanag a nangngegtayo, di la ket ta mayayustayo a mayadayo cadacuada.

² Ta no ti sao a naisao gapu cadagiti angel, natda a sititibker, ket amin a basol ken kinasukir inawatda ti maitutop a supapac;

³ Casanonto ti panaglisitayo; no ditay icancano ti casta unay nagdackel a pacaisalacanan? isu, nga idinto nga impacaammo ti Apo idi damo pinanecnecan cadatayo dagiti nacangngeg kencuana:

⁴ Ket bimmuyog met cadacuada ti Dios a sinacsianna cadagiti pagilasinan ken nacascasdaaw ken nadumaduma a kita dagiti pannacabalin, ken sagsagut ti Espiritu Santo, cas iti pagayatanna.

⁵ Ta isu dina pinaiturayan cadagiti angel ti lubong nga umayto, isu a sao-enmi.

⁶ Ngem ti maysa sinacsianna iti maysa a paset, a cunana: Ania ti tao, tapno panpanunutem, wenno ti anac ti tao, tapno sumarungcarca kencuana?

⁷ Isu inaramidmo a nanumnumo bassit ngem dagiti angel; Isu binalangatam iti dayag ken dayaw, Ket isu insaadmo a mangaywan cadagiti ar-aramid dagiti imimam:

⁸ Incabilmo dagiti amin a banbanag iti babaen dagiti sacsacana. Ta idi a pinaiturayanna kencuana dagiti isu-amin a banbanag, awan ti binaybay-anna a di paiturayan kencuana. Ngem ita saantayo pay a makita dagiti isu-amin a banbanag a paiturayan kencuana.

⁹ Ngem makitatay ni Jesus, daydi naaramid a nanumnumo bassit ngem cadagiti angeles, nabalangatan ti dayag ken dayaw, gapu iti panagsagabana iti ipapatay, tapno gapu iti parabur ti Dios rinamananna ni patay a gapu cadagiti isu-amin.

¹⁰ Ta maiparbeng a daydiay pacaipaayan dagiti isu-amin a banag ken pacaigapuan dagiti isu-amin a banag, agsipud ta mangipanto idiay gloria cadagiti adu nga annac, maaramid nga awan pagcurcuranganna daydiay makin-aramid ti pannacaisalacan gapu cadagiti panagsagaba.

¹¹ Ta ti mamagsanto ken dagiti mapagsanto agtaudda amin iti maymaysa gapuna saan nga agbain a mangnagan cacabsat cadacuada,

¹² A cunana: Ipacaammocto ti naganmo cadagiti cacabsatco, Iti tengnga ti Iglesia icantacto ti dayawmo.

¹³ Ket cunana manen: Siac agtalecacto kencuana. Sa manen: adtoy, siac ken dagiti annac nga inted caniac ti Dios.

¹⁴ Iti casta, agsipud ta dagiti annac makiramanda iti lasag ken dara, casta met kencuana nakiraman cadacuada, tapno gapu iti patay pucawenna daydiay addaan pannacabalin ni patay, cayatco a sao-en, ti diablo;

¹⁵ Ken tapno maluc-atanna dagidiay a gapu iti buteng iti ipapatay, iti bayat ti amin a panagbiagda addada a paad-adipen.

¹⁶ Ta pudno saanna nga aramaten dagiti anangel, no di ket aramatenna ti caputotan ni Abraham.

¹⁷ Gapuna maipaay idi nga iti isua-min mayasping coma cadagiti cacabsatna, tapno isu macapagbalin coma a maysa a cangatoan a padi, manangngaasi ken matalec, iti maipapan iti Dios, tapno icarona dagiti basbasol dagiti umili.

¹⁸ Ta gapu iti panagsagabana met laeng iti pannacasulisog, mabalinna a badangan dagiti masulisog.