Hebreo 13 - Ti Biblia (1973)

Nadumaduma a bagbaga.

¹ Mataginayon coma ti ayat nga incacabsatan.

² Dicay lipatan ti panangiparangyo iti ayat cadagiti gangannaet; ta gapu itoy dagiti dadduma pinadagusda dagiti angel, nga dida nadlawan.

³ Lagipenyo dagiti balud a cas la nairamancayo iti pannacabaludda; dagiti maparigatan a cas la addacayo met a naibagi.

⁴ Ti panagasawa nadayaw coma cadagiti isu-amin, ket ti pagiddaan awan coma ti tulawna; ta ti Dios ocomennanto dagiti mannakiabig ken dagiti mannakicamalala.

⁵ Ti panagbiagyo mayadayu coma iti kinaagum iti pirac; a mapneccayo coma iti adda cadacayo: ta isu met laeng kinunana; Saancanto a panawan, ket dicanto baybay-an.

⁶ Iti casta mabalintayo a sao-en a sitatalged: Ti Apo ti tumulong caniac, diacto agbuteng: Ania ti mabalin nga aramiden ti tao caniac?

⁷ Lagipenyo dagiti mangipangulo cadacayo, isuda a nangipacaammo cadacayo ti sao ti Dios; ket tuladenyo ti pammatida, a panpanunutenyo no ania ti nagtungpalan ti panagbiagda.

⁸ Ni Jesu-Cristo isu met laeng idi calman, ken ita, ken iti agnanayon.

⁹ Saancay ngarud a paiyal-la-al-la cadagiti sursuro a nadumaduma ken gangannaet; ta nasayaat a banag a ti puso mapapigsa babaen ti parabur saan a cadagiti sidsida, nga uray caano saan a naglaingan dagidi nangsango cadacuada.

¹⁰ Adda maysa nga altartayo nga dagiti agserservi iti tabernaculo, awan ti calinteganda a mangan cadagiti adda kencuana.

¹¹ Ta dagiti bagbagi dagidiay an-animal, a ti darada idaton ti cangatoan a padi idiay Nasantoan a disso gapu iti basol, mapuuranda iti ruar ti pacarso.

¹² Gapuna ni Jesus met, tapno pagsantoenna ti ili, gapu iti darana met laeng nagsagaba iti ruar ti ruangan.

¹³ Mapantayo ngarud kencuana, iti ruar ti pacarso, a sagabaentayo ti pannacauy-uyawna.

¹⁴ Ta awan ti pagiliantayo ditoy a mataginayon, ngem tarigagayantayo ti mapasungad.

¹⁵ Iti casta gapu kencuana idatontayo a cancanayon iti Dios, ti daton ti panangdaydayaw, cayatna a saoen, ti agaon cadagiti bibbibig a mangipaduyacyac iti naganna.

¹⁶ Ngem dicay lipatan ti panagaramid iti naimbag, ken iti panagririnnaman; ta ti Dios pagay-ayatanna unay dagiti cacastoy a daton.

¹⁷ Agtulnogcayo cadagiti mangidalan cadacayo, ket paiturayancayo; ta igagada dagiti cararuayo, a cas la isuda ti mangidatagto iti Dios; tapno aramidenda daytoy a sirarag-o, a saan a sililiday; ta no saan awan ti gungunayo.

¹⁸ Icarcararagandacami: ta mapneccami unay nga adda nasayaat a concienciami, a tarigagayanmi ti agbiag a sitatacneng cadagiti isu-amin a banbanag.

¹⁹ Ngem agdawatac a nangnangrona nga aramidenyo daytoy, tapno maisubliac cadacayo iti mabibiit.

²⁰ Ket ti Dios ti talna, a nangisubli manipud cadagiti natay iti dackel a pastor dagiti carnero, ni Apotayo a Jesus, gapu iti dara ti agnanayon a tulag,

²¹ Aramidennacayo coma a naananay cadagiti isu-amin a banbanag, tapno aramidenyo coma ti pagayatanna, nga aramidenna coma cadatayo ti macaay-ayo iti imatangna, gapu ken Jesu-Cristo. Isu a madaydayaw coma iti agnanayon nga awan inggana. Amen.

²² Ngem dawatec cadacayo, cacabsat, nga anusanyo coma ti sao a pammagbaga; ta nagsuratac cadacayo iti bassit a sao.

²³ Ammoenyo a ni cabsattay a Timoteo naluc-atan; ket no umay iti mabiit, agraman kencuana kitaencayto.

²⁴ Cablaawanyo dagiti isu-amin a mangipangulo cadacayo, ken dagiti isu-amin a sasanto. Cablaawandacayo dagiti taga Italia.

²⁵ Ti parabur adda coma cadacay amin. Amen.