Hebreo 12 - Ti Biblia (1973)

Balbalacad a maipaay iti pammati ken kinaanus.

¹ Gapuna datayo met idinto nga adda iti aglawlaw cadatayo ti casta unay nagdackel a caadu dagiti sacsi, iwagsactayo ti amin a pacadagsenan ken ti basol a manglawlaw a silalaca cadatayo, ket tarayentayo coma a siaanus ti tarayen a naicabil iti sangoanantayo.

² A kitkitaentayo ni Jesus, a pangulo ken mangtungpal ti pammati, isu a gapu iti rag-o a naicabil iti sangoananna, inibturanna ti cruz, nga inwacsina ti bain, ket nagtugaw iti macanawan ti trono ti Dios.

³ Panunutenyo ngarud daydiay nagsagaba iti casta a panangsupring dagiti managbasol a bimmusor kencuana, tapno dicay coma mabannog, nga agcapuycayo cadagiti cararuayo.

⁴ Dicay pay nagsagaba agingga iti dara a simmaranget iti basol:

⁵ Ket nalipatanyo ti balacad nga agsasao cadacayo a cas la annac, a cunana: Anacco saanmo nga umsien ti panangtubngar ti Apo, Ket dica met agcapuy no babalawennaca;

⁶ Ta ti Apo dusaenna ti ayatenna, Ket saplitenna ti tunggal maysa nga anac nga awatenna.

⁷ Ta maipaay iti pannacapaimbag agituredcayo; ti Dios ibilangnacayo a cas annac; ta asino ti anac a saan a dusaen ni amana:

⁸ Ngem no nailacsidcayo iti pannacadusa, a nakipaglacaman dagiti isu-amin nga annacna, sapsingcay ngarud, ket saancay nga annac.

⁹ Ket maysa pay, adda amma ti lasagtayo, isuda a nangdusa cadatayo, ket nagraemtayo cadacuada; dinto nangnangrona a paiturayantayo iti Ama dagiti carcararua, ket agbiagtayo?

¹⁰ Ta dagiti ammatayo pudno a dinusadatay iti bassit nga aldaw, cas iti pagarupenda a naimbag: ngem daytoy dusaennatayo a maipaay iti paglaingantayo, tapno mairamantayo iti kinasantona.

¹¹ Awan ti dusa nga ita maipagarup a pagragsacan, no di ket pagladingitan; ngem calpasanna pataudenna ti natalna a bunga ti kinalinteg a maipaay cadagiti nairuam iti daytoy.

¹² Gapuna, itayagyo dagiti im-ima a nalpay ket patibkeranyo dagiti tumtumeng nga aglucay;

¹³ Ket palintegenyo dagiti dandana a maipaay cadagiti sacsacayo, tapno saan a maligos ti pilay, no di ket umimbag coma.

¹⁴ Surutenyo ti talna cadagiti isu-amin, ken ti kinasanto, a no awan, awanto ti macakita iti Apo:

¹⁵ A kitaenyo a siaannad di la ket ta adda siasinoman a tao a mayadayu iti parabur ti Dios; di la ket ta ti aniaman a ramut ti pait tumubtubo ket pagsicorennacayo, ken gapu kencuana adu ti matulawan;

¹⁶ Di la ket ta adda asinoman a mannakicamalala, wenno saan nga agraem cadagiti banbanag a nasantoan, cas ken Esau, isu a gapu laeng iti naminsan a pannangan inlacona ti kalinteganna nga inauna nga anac.

¹⁷ Ta ammoyo nga idi calpasannan, uray cayatna coma a tawiden ti pannacabendicion, isu napaay ta saanna a natumpungan ken amana ti gundaway ti panagbabawi, uray pay no isu sinapsapulna a sireregta, a binuyog dagiti lulua.

¹⁸ Ta saancay nga immasideg iti bantay a mabalin a sagiden ken sumsumged iti apuy, ken ti kinangisit, ken ti kinasipnget ken ti baguio,

¹⁹ Ken ti uni ti tangguyob, ken ti timec a nangngeg ket dagiti nacangngeg, iti daytoy a timec dinawatda a dina coma ida casaon;

²⁰ Ta dida maitured ti maibilin idi cadacuada, a: Uray no ti maysa nga animal tignayenna ti bantay, mauborto;

²¹ Ket nacaal-alinget idi daydi a buyaen, iti casta ni Moises kinunana; Makigtotac unay ken agtaytayegtegac;

²² Ngem immasidegcayo iti bantay Sion, ken iti ili ti Dios a sibibiag, ti Jerusalem a nailangitan, ken cadagiti di mabilang a buybuyot dagiti angel.

²³ Iti gimung a sapasap, ken Iglesia dagiti inauna nga annac, a nailanad ti naganda idiay langit, ken iti Dios nga Ocom dagiti isu-amin, ken cadagiti espiritu dagiti nalinteg, a naaramidda nga awan pagcurangandan,

²⁴ Ken ni Jesus, a mangibabaet iti baro a tulag, ken iti dara nga iwaris, nga agsao cadagiti nasaysayaat a banbanag ngem daydi ken Abel.

²⁵ Kitaenyo ta dicay paayen ti agsasao. Ta no dida nacatalaw dagidi, ta saanda nga inannugutan daydi nangipalawag ditoy rabaw ti daga iti pagayatan ti Dios, nangnangrona a ditayto nakatalaw, no ditay ipangag daydiay mangipalawag manipud sadi langit:

²⁶ Idi ti timecna pinagkintayegna ti daga; ngem ita incarina, a cunana: Pagkintayegec pay maminsan, saan laeng a ti daga, no di ket ti langit pay.

²⁷ Ket daytoy sao, a Maminsan pay; ibagana ti pannacaiccat dagidiay magaraw, a cas cadagiti banbanag a timmataud laeng, tapno mataginayon dagiti saan a magaraw.

²⁸ Gapuna idinto nga awatentayo ti maysa a pagarian a saan a mabalin a garawen, agyamantayo coma, ket gapu itoy agdaydayawtayo iti Dios a macaay-ayo kencuana, a buyugen ti panagraem ken buteng:

²⁹ Ta ti Diostayo isu ti maysa nga apuy a mangrunaw.