Hebreo 11 - Ti Biblia (1973)

Ti pammati ken dagiti bungana.

¹ Ket ti pammati isu ti punganay ti panangnamnama cadagiti banbanag nga ur-urayen, maysa a panagtalged cadagiti banbanag a di pay makita.

² Ta gapu kencuana dagidi lallacay nagun-odanda ti nasayaat a pammanecnec.

³ Gapu iti pammati maawatantayo a dagiti lublubong nabukelda gapu iti sao ti Dios, gapuna a ti makita saan a naaramid cadagiti banbanag nga agparang.

⁴ Gapu iti pammati ni Abel indiayana iti Dios ti maysa a daton a nasaysayaat ngem ni Cain; ket gapu iti daytoy naited kencuana ti pannacapanecnec nga isu nalinteg idi a sinacsian ti Dios ti maipapan cadagiti datdatonna; ket gapu itoy nupay natayen, agsao pay laeng.

⁵ Gapu iti pammati, ni Enoc nayalis tapno dina coma makita ni patay; ket isu saan a nasaracan, ta inyalis ti Dios: ta idi saan pay a nayalis, naited kencuana ti pammanecnec a naay-ayona ti Dios:

⁶ Ngem no awan ti pammati, saan a mabalin nga ay-aywen ta masapul a ti umadani iti Dios, patienna coma nga adda ket gungunaanna dagiti mangsapul kencuana.

⁷ Gapu iti pammati ni Noe, idi a binalacadan ti Dios: iti maipapan cadagiti banbanag a di pay makita idi, natignay iti siraraem a panagbuteng, nangisagana ti maysa a daong a pacaisalacanan ti balayna; ket gapu iti daytoy, binabalawna ti lubong, ket isu naaramid a nagtawid iti kinalinteg a mayannurot iti pammati.

⁸ Gapu iti pammati ni Abraham, idi a naayaban, tapno mapan iti maysa a disso nga awatennanto a cas tawid, nugtulnog ket napan a dina ammo no adino ti pagturonganna.

⁹ Gapu iti pammati naggian idiay daga a naicari, a cas gangannaet, a nagnaed cadagiti abong-abong agraman cada Isaac ken Jacob, a makipagtawid iti daydi met la nga cari:

¹⁰ Ta inururayna ti ciudad nga adda cimientona: a ti mangbalabala ken mangipatacder kencuana, isu ti Dios.

¹¹ Gapu iti pammati, ni Sara met laeng inawatna ti pannacabalin a mangisicog iti maysa nga anac, nupay nalabasen ti tawenna; gapu ta isu imbilangna a matalec daydi nangicari.

¹² Gapuna met a dagiti cas la bitbituen ti caaduda, ket saanda a mabilang a cas la cadagiti darat nga adda iti igid ti baybay, nagtaudda iti maysa, ket daytoy cas la natayen, gapu iti kinalacayna.

¹³ Cas mayannurot iti pammati natayda amin dagitoy, a dida pay inawat dagiti carcari; ngem nakitada ket linugayanda ida manipud iti adayu, ket impudnoda nga isuda ganganaetda ken agpagpagnada iti rabaw ti daga,

¹⁴ Ta dagiti agcuna cadagiti cacastoy a banag, iparangda a sapsapulenda ti daga a pagilianda.

¹⁵ Ket pudno a no malagipda coma daydi naggapuanda, naaddaanda coma ti gundaway nga agsubli,

¹⁶ Ngem ita tarigagayanda ti nasaysayaat a pagnaedan cayatna a sao-en, ti nailangitan: gapuna ti Dios saanna ida nga ibain, nga isu awaganda a Dios da; ta insaganana cadacuada ti pagilian.

¹⁷ Gapu iti pammati, ni Abraham, idi nasuut, indatonna ni Isaac; wen daydi immawat a siaayat cadagidi carcari indatonna coma idi ti bugbugtong nga anacna.

¹⁸ Uray pay isu ti nacaisao-an daytoy: Ken Isaac managancanto ti caputotan:

¹⁹ A panpanunutenna nga uray pay cadagiti natay mabalin ti Dios a pagungaren: nanipud idiay cas la binaliwanna manen nga inawat a pagpangngarigan.

²⁰ Gapu iti pammati, ni Isaac binendicionanna ni Jacob ken ni Esau uray pay maipapan cadagiti banbanag a mapasungad.

²¹ Gapu iti pammati, ni Jacob idi a nganngani matay, binendicionanna ti tunggal maysa cadagidi annac ni Jose; ket nagdaydayaw a sisasadag iti mordong ti sarucodna.

²² Gapu iti pammati, ni Jose, idi asidegen ti patayna, imbagana daydi ipapanaw dagidi annac ni Israel, ket nagbilin iti maipapan cadagiti tultulangna.

²³ Gapu iti pammati, idi nayanac ni Moises isu inlemmeng dagidi dadackelna bayat ti tallo a bulan; ta nakitada a nalibnos daydi ubing: ket dida kinabuteng daydi bilin ti ari.

²⁴ Gapu iti pammati ni Moises, idi nataenganen nagmadi a napanaganan ti anac daydi anac a babai ni Faraon:

²⁵ A pinilina nga impangpangrona ti makipagsagaba iti rigat cadagidi tattao ti Dios, ngem iti makiranud cadagiti aglabas a ragragsac ti basol;

²⁶ A pinagarupna a dacdackel a kinabacnang ti pannacaumsi ken Cristo, ngem dagiti kinabacnang ti Egipto; ta kitkitaenna idi ti gunguna.

²⁷ Gapu iti pammati pinanawanna ti Egipto, a dina kinabuteng ti pungtot di ari; ta nagtalinaed a cas la kitkitaenna ti saan a makita.

²⁸ Gapu iti pammati rinambacanna ti Pascua ken ti pannacaiwarsi ti dara, tapno daydiay mangdadael cadagiti inauna nga annac saanna coma ida a sagiden.

²⁹ Gapu iti pammati limmasatda iti Baybay a Nalabaga, a cas iti daga a namaga; ket idi nga pinadas nga inaramid dagidi taga Egipto, natinepda.

³⁰ Gapu iti pammati, natuang dagiti bacbacod ti Jerico, idi nalpasda a linaolaw ti arubayanna cadagiti pito nga aldaw.

³¹ Gapu iti pammati, ni Rahab, daydi balangcantis, saan a nairaman a napucaw cadagidi dida kinayat ti namati, nga inawatna a sicacappia dagiti agsisiim.

³² Ket ania pay ti sao-ecto? ta agkurangacto iti tiempo no sao-ec ti maipapan cada Gedeon, Barac, ni Samson, ni Jefte, ni met David, ken ni Samuel, ken dagiti mammadto:

³³ Isuda, gapu iti pammati, adda inab-abacda a pagpagarian, nagaramidda iti kinalinteg, nacagun-odda cadagiti carcari, inappotda dagiti ngiwat dagiti leon,

³⁴ Dinepdepda ti pigsa ti apuy, nacalisida iti tadem ti campilan, nanipud iti kinacapuyda nagbalinda a nabileg, nagbalinda a mannacabalin iti gubat, pinagtarayda dagiti buybuyot dagiti tattao a gangannaet.

³⁵ Dagiti babbai inawatda dagiti minatayda babaen ti panagungar; ket dagiti sabsabali napapatayda iti pangpang-or, a dida kinayat ti maluc-atan, tapno magun-odanda ti nasaysayaat a panagungar:

³⁶ Ket dagiti sabsabali nagsagabada cadagiti pannacarabrabngis ken babaot, ken dagiti met pannacarepreppet ken dagiti pagbaludan:

³⁷ Nauborda, naragadida, nasuutda, napapatayda iti campilan; nagalla-al-lada ditoy ken idiay, a nagcawesda iti sidudotdot a lalat dagiti carnero ken calcalding, napapanglawda, naparigatda, nacabcabilda.

³⁸ (Ket cadacuada ti lubong saan idi a maicari), magmagnada a nayao-awan cadagiti letlet-ang, cadagiti banbantay, ken cadagiti rucrukib ken ab-abut ti daga.

³⁹ Ket isu-amin dagitoy, idi nalpasda nga inawat ti pammanecnec gapu iti pammatida, saanda pay nga inawat ti naicari,

⁴⁰ Idinto a ti Dios insaganana ti nasaysayaat a banag a maipaay cadatayo; tapno saanda coma a mapalaing a naananay nga awantayo.