Hebreo 10 - Ti Biblia (1973)

Ti linteg isu ti maysa nga aniniwan dagiti sanicua a mapasungad.

¹ Ta ti linteg, idinto nga addaan laeng iti anniniwan dagiti naimbag a banag a mapasungad, a saan a ti napaypayso a catulad dagiti banbanag, uray, caano saanna a mabalin a palaingen dagiti umasideg iti Dios, gapu cadagiti naisao a datdaton nga idiayada a cancanayon iti tinawen.

² Ta no saan, dida coma simmardeng a maidatdaton? gapu ta dagiti mangaramid itoy a panagservi iti Dios, idinto a nagugoranda iti naminsan, awan coman ti ricnada iti basol.

³ Ngem dagidiay a datdaton pacalaglagipan ida a tinawen cadagiti basbasol.

⁴ Ta saan a mabalin a ti dara dagiti toro a vaca ken calding a lalaki iccatenna dagiti basbasol.

⁵ Gapuna iti iseserrecna iti lubong, cunana: Daton ken sagut saanmo ida a kinayat, Ngem maysa a bagi ti insaganam caniac;

⁶ Saanmo a nacaayaywan dagiti datdaton a mapuuran ken dagiti datdaton gapu iti basol:

⁷ Kinunac ngarud: Adtoy, umayac (Iti lucot ti pagbasaan naisurat ti maipapan caniac). Tapno aramidec, O Dios, ti pagayatam.

⁸ A cunaenna iti nangatngato a batog: Dica kinayat ti daton ken sagsagut ken dagiti sagsagut a mapuuran ken dagiti datdaton a maipaay iti basol, ket dica met nacaayaywan ida, (banbanag a maidaton cas cunaen ti linteg),

⁹ Calpasanna cunana: Adtoy, umayac tapno aramidec, ti pagayatam (iccatenna ti umuna, tapno ipasdecna ti maicadua).

¹⁰ Ket itoy a pagayatan napagsantotayo, gapu iti pannacaidaton ti bagi ni Jesu-Cristo, iti naminpinsan a maipaay iti agnanayonen.

¹¹ Ket isu-amin a papadi pudno nga agserservida iti inaldaw, ket agidatonda iti mamin-adu cadagiti datdaton nga agpapada met laeng nga uray caano dida mabalin nga iccaten dagiti basbasol:

¹² Ngem daytoy idi indatonna ti maymaysa a daton gapu cadagiti basbasol a maipaay iti agnanayonen, nagtugaw iti macanawan ti Dios;

¹³ Ket manipud ita agingga iti masangoanan agur-uray agingga cadagiti cabusorna maaramidda a pagbatayan dagiti sacsacana.

¹⁴ Ta gapu iti maymaysa laeng a daton inaramidna nga awan pagcurcurangan dagiti mapagsanto a maipaay iti agnanayon.

¹⁵ Ket ti Espiritu Santo panecnecannatayo met; ta idi kinunana:

¹⁶ Daytoy ti tulag nga aramidecto cadacuada, Inton malabes dagidiay nga aldaw, cuna ti apo: Icabilconto dagiti linlintegco iti pusoda, Ket isuratconto ida iti isipda;

¹⁷ Ket cunana manen: ket diacto lagipenen dagiti basbasolda ken dagiti kinadakesda.

¹⁸ Ket no adda pannacapacawan dagitoy, awanen ti daton gapu iti basol.

Sursuro a maipapan iti pammati.

¹⁹ Ngarud cacabsat, idinto nga adda talgedtayo a sumrec iti disso a nasantoan unay, gapu iti dara ni Jesus,

²⁰ Iti maysa a dalan a baro ken nabiag, nga isu linuctanna a maipaay cadatayo, babaen ti abbong, cayatco a sao-en, ti lasagna;

²¹ Ket idinto nga adda maysa a dackel a padi nga agaywan iti balay ti Dios;

²² Umadanitay coma a buyugen ti puso a napudno, iti naan-anay a kinatalged ti pammati, nga adda a nawarisan dagiti puspusotayo, a nadalusanda iti dakes a nakem ket nabuggoan dagiti bagbagi iti danum a nadalus,

²³ Salimetmetantayo coma a sititibker ti panangipaduyacyac ti inanamatayo tapno di agisin (ta mapagtalcan daydiay nagcari):

²⁴ Ket agpipinnanunottayo a maipaay iti pannacaparegtatayo iti ayat ken cadagiti naimbag nga ar-aramid;

²⁵ A ditay baybay-an dagiti panaggigimongtayo, cas iti cadawyan dagiti dadduma, no di ket agbibinnalacadtayo, ket nangnangrona gapu ta makitayo nga umas-asideg ti aldaw.

²⁶ Ta no agbasoltayo a sipapakinakem, iti calpasan ti panangawattayo iti pannacaammo iti pudno, awanen ti mabalintayo nga idaton gapu cadagiti basbasol,

²⁷ No di ket ti maysa a nacabutbuteng a panagur-uray iti pannacaocom, ken maysa a kinarungsot ti apuy, a mangalununto cadagiti cabcabusor.

²⁸ Ti maysa a tao a nangumsi iti linteg ni Moises, gapu iti dua wenno tal-lo a sacsi, matay nga awan asi:

²⁹ Anianto a naing-inget a dusa ti pagarupenyo a maicari iti daydiay nangipayat babaen cadagiti sacsacana iti Anac ti Dios, ket impatona a narugit ti dara ti tulag a nacasantificaranna, ket inumsina ti Espiritu ti parabur?

³⁰ Ta ammotayo daydiay nagsao; Ti ibabales maipabagi caniac; itdecto ti gunguna. Ket cunana manen: Ocomento ti Apo dagiti tattaona.

³¹ Nacabutbuteng ti matnag cadagiti im-ima ti Dios a sibibiag.

³² Ngem lagipenyo dagiti aldaw nga immun-una nga idi nalpascay a nasilawan, inanusanyo ti dackel a culcul dagiti rigrigat;

³³ A no maminsan naaramidcay idi a buybuyaen gapu cadagiti pannacauyuyaw ken dagiti ladladingit; ket no dadduma, naicanunongcayo cadagidiay napagsagaba cadagiti cacastoy.

³⁴ Ta saan laeng a kinaasianyo dagiti adda a sibabalud no di ket inanusyo a siaayat ti panangrabsutda cadagiti cucuayo, nga ammoyo nga adda cadacayo met laeng ti maysa a sanicua a nasaysayaat ken agnanayon.

³⁵ Dicay ngarud pucawen ti pananginanamayo, nga addaan dackel a supapac.

³⁶ Ta masapulyo ti anus, tapno iti calpasan ti panangaramidyo iti pagayatan ti Dios, awatenyo ti naicari.

³⁷ Ta iti mabi-it unay nga aldaw, Dayta umay umayto, ket dinto agtactac.

³⁸ Ngem ti nalinteg agbiagto gapu iti pammati; Ket no isu agsanudto saanto a maayayo toy cararuac kencuana.

³⁹ Ngem awancami cadagidiay agsanud nga agturong iti pannacapucaw no di ket addacami cadagidiay mamati nga agpaay iti pacaisalacanan ti cararua.