Hebreo 1 - Ti Biblia (1973)

Nangatngato ni Cristo ngem dagiti angel.

¹ Cadagiti ununana nga aldaw ti Dios nagsao cadagiti amma, iti nadumaduma a pannacaipaayna, ken cadagiti nadumaduma a pamay-an, babaen cadagiti mammadto,

² Cadagitoy maud-udi nga aldaw, kinasaonatayo babaen iti Anacna; isu a tinudinganna nga agtawid cadagiti isu-amin nga adda, a gapu met kencuana inaramidna ti amin a lubong;

³ Idinto nga isu ti raniag ti dayagna, ken ti napaypayso a ladawan ti kinadiosna, ket idinto a salimetmetanna dagiti isu-amin a banbanag iti sao ti pannacabalinna, idi naaramidnan ti pannacagugor dagiti basbasoltayo, nagtugaw iti macanawan ti Ari sadi ngato;

⁴ Idinto a naaramid a natantan-oc ngem cadagiti angel, cas iti panagtawidna iti nasudsudi a nagan ngem isuda.

⁵ Ta siasino cadagiti angel ti nagcunaan ti Dios uray caano: Sica ti Anacco, Itoy nga aldaw binukelca? ket sabali pay: Siacto ti Amana, Ket isunto ti Anacco?

⁶ Ket sabali manen: Idi inyegna ti inauna nga Anac ditoy lubong, cunana: Isu ti pagrucbaban coma dagiti isu-amin nga anangel ti Dios.

⁷ Ket maipapan cadagiti angel cunana: Ti mangaramid cadagiti angelna nga angin, Ket dagiti catulonganna a darang ti apuy.

⁸ Ngem maipapan iti Anac cunana: Ti tronom, O Dios, mataginayon awan inggana: Ket ti cetro ti kinalinteg, isu ti cetro ti pagariam.

⁹ Inayatmo ti kinalinteg, ket ginuram ti kinadakes; Gapuna, ti Dios, ti Diosmo, linanaannaca Iti pananglana ti ragsac a nangnangrona ngem cadagiti cadcaduam.

¹⁰ Ken: cunana pay: Sica, Apo, idi punganay binangonmo ti daga, Ket dagiti langlangit aramid ida dagiti im-imam:

¹¹ Mapucawdanto, ngem sica mataginayoncanto; Ket isuda amin, cas maysa a pagan-anay, marunotdanto;

¹² Ket cas maysa a cagay bungunemto ida Ket masuctandanto cas maysa a pagan-anay: Ngem sica cascasdi laeng. Ket dagiti tawenmo saandanto nga aggibus.

¹³ Ngem siasino cadagiti angel ti nangisao-anna uray caano: Agtugawca iti macanawanco Agingga iti panangaramidco cadagiti cabusormo a pagbatayan dagiti sacsacam?

¹⁴ Saanda aya nga espiritu amin nga agservida a maibabaon tapno agserservi a maipaay iti paglaingan dagiti agtawidto iti pannacaisalacan?