Haggeo 2 - Ti Biblia (1973)

Dagiti mangbangon maparegtada. Ti pannacaparigat dagiti tattao a gapu iti kinaliwayda. Ti cari ti Dios ken Zorobabel.

¹ Idi maicapito a bulan, iti maicaduapulo ket maysa nga aldaw ti bulan; immay ti sao ni Jehova babaen ken ni Haggeo, a cunana,

² Agsaoca ita ken ni Zorobabel nga anac ni Sealtiel, a gobernador ti Juda, ken ni Josue nga anac ni Josadac, a cangatoan a padi, ken iti natda iti umili, a cunaem,

³ Siasino ti natda cadacayo a nacakita itoy a balay idi immun-una a dayagna? ken casano ti panagkitayo ita kencuana? Saan aya a cas awan mamaayna cadagiti matayo?

⁴ Ita ngarud pumigsaca, O Zorobabel, cuna ni Jehova; ket pumigsaca, O Josue, nga anac ni Josadac, a cangatoan a padi; ket pumigsacayo, dacayo amin nga umili ti daga, cuna ni Jehova, ket agtrabajocayo: ta addaac cadacayo, cuna ni Jehova dagiti buybuyot,

⁵ Cas iti sao a pannakitulagco cadacayo idi a rimmuarcayo sadi Egipto, ket ti Espirituc nagtaeng iti tengngayo: dicayo coma agbuteng.

⁶ Ta castoy ti cuna ni Jehova dagiti buybuyot: Maminsan pay, iti mabiit a canito, ket pagkintayegecto dagiti langlangit, ken ti daga ken ti taaw, ken ti namaga a daga;

⁷ Ket pagkintayegecto dagiti amin a nasnacion, ken dagiti napateg a gameng dagiti amin a nasnacion umaydanto; ket pusekecto daytoy a balay iti kinadayag, cuna ni Jehova dagiti buybuyot.

⁸ Ti pirac cucuac, ti balitoc cucuac, cuna ni Jehova dagiti buybuyot.

⁹ Ti maud-udi a dayag daytoy a balay dacdackelto ngem iti immununa, cuna ni Jehova dagiti buybuyot; ket iti daytoy a disso mangtedacto iti talna, cuna ni Jehova dagiti buybuyot.

¹⁰ Iti maicaduapulo ket uppat nga aldaw ti maicasiam a bulan, iti maicadua a tawen ni Dario, immay ti sao ni Jehova babaen ken ni Haggeo a mammadto a cunana,

¹¹ Castoy ti cuna ni Jehova dagiti buybuyot: Agsaludsodcayo ita cadagiti papadi iti maipapan iti linteg, a cunaenyo,

¹² No ti siasinoman mangipan iti nasantoan a lasag iti pingir ti pagananayna, ket ti pingirna ti pangsagidna iti tinapay, wenno iti sida, wenno iti arac, wenno iti lana, wenno iti aniaman a canen, agbalinto aya a nasantoan? Ket dagiti papadi simmungbatda ket kinunada, Saan.

¹³ Idin kinuna ni Haggeo, No ti siasinoman a narugit a gapu iti bangcay ti natay sumagid iti aniaman cadagitoy, agbalinto aya a narugit? Ket dagiti papadi simmungbatda ket kinunada, Narugitto.

¹⁴ Idin simmungbat ni Haggeo ket kinunana, Casta daytoy nga ili, ken casta daytoy a nacion iti sangoanac, cuna ni Jehova; ket casta ti tumunggal aramid dagiti im-imada; ket daydiay idatonda caniac idiay narugit.

¹⁵ Ita ngarud, agdawatec cadacayo, agpanunotcayo manipud itoy nga aldaw ken iti napalabas, sacbay a ti maysa a bato naicabil iti rabaw ti sabali a bato iti templo ni Jehova.

¹⁶ Iti isu-amin daydiay a pannawen idi a ti siasinoman immay iti maysa a penpen ti duapulo a casucat, sangsangapulo laeng ti adda idi; idi a ti siasinoman immay iti pagpespesan ti uvas a mangala iti limapulo a casucat, duduapulo laeng ti adda idi.

¹⁷ Siac kinabilcayo babaen ti eppes ken iti buut ken iti uraro iti isu-amin nga aramid dagiti im-imayo; nupay casta dicayo nagsubli caniac, cuna ni Jehova.

¹⁸ Agpanunotcayo ala, agdawatac cadacayo, manipud itoy nga aldaw ken iti napalabas, nanipud idi maicaduapulo ket uppat nga aldaw ti maicasiam a bulan, nanipud idi aldaw a ti pamuon ti templo ni Jehova naicabil idi, isu ti utobenyo coma.

¹⁹ Addan aya bin-i iti agamang? awan, ti uvas, ken ti higos, ken ti granada, ken ti olivo dida nagbunga; manipud itoy nga aldaw bendicionancayto.

²⁰ Ket ti sao ni Jehova immay iti maicadua a daras ken ni Haggeo idi maicaduapulo ket uppat nga aldaw ti bulan, a cunana,

²¹ Isaom ken ni Zorobabel, a gobernador ti Juda, a cunaem, Pagkintayegecto dagiti langlangit ken ti daga;

²² Ket rebbaecto ti trono dagiti pagpagarian; ket dadaelecto ti pigsa dagiti pagpagarian dagiti nasnacion; ket rebbaecto dagiti luglugan, ken dagidiay lumugan cadacuad: ken dagiti cabcabayo ket dagiti sisasacay cadacuada matnagdanto, tunggal maysa babaen ti campilan ni cabsatna.

²³ Iti daydiay nga aldaw, cuna ni Jehova dagiti buybuyot, alaencanto, O Zorobabel, nga adipenco, nga anac ni Sealtiel, cuna ni Jehova, ket aramidencanto a cas maysa a singsing a pagsello; ta siac pinilica, cuna ni Jehova dagiti buybuyot.