Haggeo 1 - Ti Biblia (1973)

Ni Haggeo uyutanna dagiti tattao a mangbangon iti templo. Da Zorobabel ken Josue tungpalenda ti sao ti mammadto ken ti sao ti Dios.

¹ Idi maicadua a tawen ni ari Dario, idi maicanem a bulan, idi umuna nga aldaw ti bulan, babaen ken ni Haggeo a mammadto immay ti sao ni Jehova ken ni Zorobabel nga anac ni Sealtiel, a gobernador iti Juda, ken ni Josue nga anac ni Josadac, a cangatoan a padi, a cunana.

² Castoy ti saoen ni Jehova dagiti buybuyot, cunana, Daytoy nga ili, cunana, Saanpay a pannawen a mapantayo, ti pannawen a maipaay iti panagbangon iti balay ni Jehova.

³ Idin immay ti sao ni Jehova babaen ken ni Haggeo a mammadto, a cunana,

⁴ Pannawen aya a maipaay cadacayo met laeng nga agtaengcayo cadagiti nabobedaan a balbalayyo, idinto a daytoy a balay agwalangwalang?

⁵ Gapuna a castoy ti cuna ni Jehova dagiti buybuyot: Utobenyo dagiti daldalanyo.

⁶ Dacayo nagmulacayo iti adu, ket agapitcayo iti bassit: mangancayo, ngem dicayo mabsog; uminumcayo, ngem dicay mapnec; agcawescayo, ngem dicayo mapapudot; ket daydiay manggun-od iti tangdan manggun-od iti tangdan a maipisoc iti supot a lussoc.

⁷ Castoy ti cuna ni Jehova dagiti buybuyot: Utobenyo dagiti daldalanyo.

⁸ Sumang-atcayo iti bantay, ken mangalacayo iti cayo, ket bangonenyo ti balay; ket maay-ayoacto kencuana, ken madaydayawacto, cuna ni Jehova.

⁹ Ninamnamacayo iti adu; ket, adtoy, nagbalin a bassit; ket idi nga isangpetyo iti pagtaenganyo pinatayabco iti angin. Ania ti gapuna? cuna ni Jehova dagiti buybuyot. Gapu ta ti balayco agwalangwalang, idinto a dacayo agtaraycayo tunggal maysa iti balayna met laeng.

¹⁰ Gapuna a maipuon cadacayo dagiti langlangit itukenda ti linnaaw, ket ti daga itukenna ti bungana.

¹¹ Ket inayabac ti maga iti rabaw ti daga, ken cadagiti banbantay, ken iti rabaw ti bukel, ken iti baro nga arac, ken iti lana, ken iti isu-amin a paltuaden ti daga, ken cadagiti tattao, ken iti arban, ken iti isu-amin nga aramid dagiti im-ima.

¹² Idin ni Zorobabel nga anac ni Sealtiel, ken ni Josue nga anac ni Josadac cangatoan a padi, agraman iti isu-amin a natda iti umili, nagtulnogda iti timec ni Jehova a Diosda, ken cadagiti sasao ni Haggeo a mammadto, agsipud ta ni Jehova a Diosda isu imbaonna; ket ti umili nagbuteng iti sango ni Jehova.

¹³ Idin ni Haggeo a babaonen ni Jehova insaona ti pinaibaga ni Jehova iti umili, a cunana, Siac addaac cadacayo, cuna ni Jehova.

¹⁴ Ket ni Jehova tinignayna ti espiritu ni Zorobabel nga anac ni Sealtiel, a gobernador ti Juda, ken ti espiritu ni Josue nga anac ni Josadac, a cangatoan a padi, ken ti espiritu ti amin a natda iti umili; ket immayda ket nagaramidda iti balay ni Jehova dagiti buybuyot, a Diosda.

¹⁵ Idi maicaduapulo ket uppat nga aldaw ti bulan, idi maicanem a bulan, idi maicadua a tawen ni ari Dario.