Habakuk 3 - Ti Biblia (1973)

Ti panangispal ti Dios iti cadaanan nga ilina. Ti natibker a panagtalec ti mammadto iti Dios.

¹ Maysa a carag ni Habacuc a mammadto, a maitonos iti Si-gionoth.

² O Jehova, nangngegco ti damag a maipapan kenca, ket agbutengac: O Jehova, parayrayem ti aramidmo iti ngalay dagiti tawtawen; Iti ngalay dagiti tawtawen isu ipacaammom; Iti pungtot lagipem ti caasi.

³ Ti Dios immay nanipud iti Teman, Ken ti Santo nanipud bantay Paran. (Selah) Ti dayagna abbonganna dagiti langlangit, Ket ti daga napno iti dayawna.

⁴ Ket ti raniagna cas la iti silaw; Isu adda sinsinamarna nga umay manipud iti imana; Ket adda abbong ti pannacabalinna.

⁵ Iti sangona napan ti angol, Ket ti apuy a gayang rimmuar iti yan dagiti sacsacana.

⁶ Isu nagintec, ket rinucudna ti daga; Isu kimmita, ket impuruacna a nasayyasayya dagiti nasnacion; Ket dagiti agnanayon a banbantay naiwarisda; Dagiti agnanayon a turturod nagrucnoyda; Dagiti addangna cacasda la idi ugma.

⁷ Nakitac dagiti tolda ni Cusan iti ladingit; Dagiti bengbeng ti daga ti Madian nagkintayegda.

⁸ Nagrurodan aya ni Jehova dagiti carcarayan? Naibusor aya ti ungetmo cadagiti carcarayan, Wenno ta pungtotmo maibusor iti taaw. A simmacayca cadagiti cabayom, Cadagiti luganmo a pangisalacan?

⁹ Ti ba-im nalucasan a naananay; Dagiti naisapata cadagiti caputotan pudnoda a sao. (Selah.) Sica linuctam ti daga cadagiti carcarayan.

¹⁰ Dagiti banbantay nakitadaca, ket nagbutengda; Ti bagio dagiti dandanum naglabas; Ti yuyeng binalicasna ti timecna, Ket inngatona dagiti im-imana iti ngato.

¹¹ Ti init ken ti bulan nagsardengda a siiintec cadagiti pagnaedanda. Gapu iti lawag dagiti panam idi a napanda, Gapu iti gilap ta nasileng a picam.

¹² Sica binaddebaddecmo ti daga iti unget; Sica tinaltagmo dagiti nasnacion iti pungtot.

¹³ Sica rimmuarca a maipaay iti pannacaisalacan ti ilim, Maipaay iti pannacaisalacan ti pinulotam; Sica sinugatmo ti olo ti balay ti nadangkes a tao. A linabusam ti pamuon agingga iti tengnged met laeng. (Selah)

¹⁴ Sica sinalputmo cadagiti sarucodna met laeng ti olo dagiti buyotna; Isuda immayda a cas alawig a mangwarawara caniac; Ti nagrag-oanda isu ti panangalun-unda a sililimed iti napanglaw.

¹⁵ Sica nagbaddecca iti taaw agraman cadagiti cabayom, Ti gabsuon dagiti napegges a dandanum.

¹⁶ Nangngegco, ket ti bagic nagkintayeg. Dagiti bibigco nagpigergerda iti timec; Kinacapuy sumrec cadagiti tulangco, ket agkintayegac iti dissoc; Agsipud ta masapul nga agurayac a sitatalna iti aldaw ti riribuc, Iti isasangpet dagiti tattao a mangraut cadatayo.

¹⁷ Ta uray ti cayo nga higos dinto aglasbang, Uray bunga awanto cadagiti uv-uvas; Ti apit nga olivo agcurangto, Ket dagiti taltalon didanto mamaltuad iti taraon; Ti pangen maiccatto manipud iti pagyaponan, Ket awanto ti arban cadagiti pagtaracnan:

¹⁸ Nupay casta agragsacacto ken ni Jehova. Agragsacacto iti Dios ti pannacaisalacanco.

¹⁹ Ni Jehova, nga Apo, isu ti pigsac; Ket aramidenna dagiti sacsacac a cas sacsaca ti ugsa a ludludan. Ket aramidennacto a magna iti rabaw dagiti nangato a dissoc. Agpaay iti Pangulo a Musico, cadagiti instrumentos a nacuerdasan.