Habakuk 2 - Ti Biblia (1973)

Dagiti panangay-ay cadagiti Caldeos.

¹ Agtacderacto iti rabaw ti pagbantayac, ken tumugawacto iti rabaw ti torre, ket cumitaacto a mangmatmat iti aniaman nga isaonanto caniac, ken no ania ti isungbatconto iti maipapan iti unnoyco.

² Ket ni Jehova simmungbat caniac, ket kinunana, Isuratmo ti sirmata, ket aramidem a nabatad cadagiti tapi, tapno napardas coma a basaen.

³ Ta ti sirmata agpaay pay laeng iti nadutocan a pannawen, ken agsiglat a tumorong iti pannacatungpal, ket saanto nga agulbod: nupay no agtactac, isu urayem; ta pudno nga umayto, a dinto agbayag.

⁴ Adtoy, ti cararuana pimmalangguad, saan a nalinteg kencuana; ngem ti nalinteg agbiagto a gapu iti pammatina.

⁵ Ket sabali pay gapu ta ti arac mangliliput, ti lalaki napalangguad a di agtaeng iti balayna, a mangpadackel iti calicagumna a cas ken ni Tanem, ket isu umasping ken ni patay, a di mabalin a penneken, no di ket urnongenna kencuana dagiti amin a nasnacion, ket gabsuonenna kencuana dagiti amin nga il-ili.

⁶ Amin dagitoy didanto aya mangisingasing iti maysa a pangngarig a maibusor kencuana, ken mairabrabac a proverbio a maibusor kencuana, ket cunada, Asi pay daydiay a mangpaadu iti dina cucua! casanonto ti capautna? ket gabsuonenna kencuana dagiti tanda ti salda?

⁷ Didanto aya tumacder a kel-laat dagiti mangcagatto kenca, ken agriingdanto dagiti mangtutuoc kenca, ket sicanto ti agpaay a samsam cadacuada?

⁸ Agsipud ta sinamsammo dagiti adu a nasnacion, amin dagiti matda cadagiti il-ili samsamendacanto, maipuon iti dara dagiti lallaki, ken ti panangranggas naaramid iti daga, iti ili ken iti amin nga agnaed kencuana.

⁹ Asi pay daydiay a manggun-od iti dakes a gunguna a maipaay iti balayna, tapno mangisaad iti umocna iti ngato, ket maispal coma iti ima ti dakes!

¹⁰ Sica nangigacatca iti bain iti balaymo, iti panangdadaelmo iti adu nga il-ili, ket nagbasolca a maicaniwas ita cararuam.

¹¹ Ta ti bato umkisto manipud iti bacud, ket ti busuran iti cacayoan sumungbatto kencuana.

¹² Asi pay daydiay a mangbangon iti maysa nga ili babaen ti dara, ken mangpasingked iti ili babaen ti kinadangkes!

¹³ Adtoy, saan aya a nagtaud ken ni Jehova dagiti buybuyot a dagiti tattao agbannogda iti maipaay iti apuy, ken dagiti nasnacion agbannogda iti maipaay iti kinaubbaw?

¹⁴ Ta ti daga mapunnonto iti pannacaammo iti dayag ni Jehova, a cas dagiti dandanum abbonganda ti taaw.

¹⁵ Asi pay daydiay a mangted ti inumen ken ni caarubana, sica a manggampor ita gamutmo, ket isu bartekem met, tapno makitam coma ti kinalamolamoda!

¹⁶ Sica mapnoca iti bain, ket saan a dayag: uminumca met, ket casca la iti di nacugit; ti copa ti ima a canawan ni Jehova dumtengto kenca, ket ti nacaarariec a bain abbongannanto ta dayagmo.

¹⁷ Ta ti panangranggas a naaramid iti Libano abbongannacanto, ken ti panagdadael dagiti an-animal, a namagbuteng cadacuada; maipuon iti dara dagiti lallaki, ken agpaay iti panangranggas a naaramid iti daga, iti ili ken iti amin nga agnaed kencuana.

¹⁸ Ania aya ti magun-od iti ladawan a kinitikitan, a ti mangaramid isu ti nangkitikit kencuana; ti sinucog a ladawan, ti mangisursuro met laeng cadagiti ul-ulbod, a ti nangbalabala iti langana agtalec kencuana, iti panangaramidna cadagiti umel a bulto?

¹⁹ Asi pay daydiay nga agcuna iti cayo, Agriingca; iti umel a bato, Tumacderca! Mangisuronto aya daytoy? Adtoy, nga isu nacalupcupan iti balitoc ken pirac, ket awan ti aniaman nga anges iti unegna.

²⁰ Ngem ni Jehova adda iti nasantoan a templona: agulimec coma ti isu-amin a daga iti saclangna.