Habakuk 1 - Ti Biblia (1973)

Dagiti Caldeos mapatacderda a pangdusa cadagiti basbasol ti Juda.

¹ Ti awit a nakita ni Habacuc a mammadto.

² O Jehova, casano ti caunday ti panagasugco, ket dinacto ipangag? Agasugac kenca a maipapan iti ranggas, ket dica mangispal.

³ Apay aya nga iparangmo caniac ti kinadakes, ken ipakitaannac iti kinasungit? ta ti pannacarba ken ti pannacaranggas adda iti sangoanac; ket adda ringgor, ket bumangon ti susic.

⁴ Gapuna a ti linteg napacapuy, ket ti kinajusticia saanen a magna; ta ti nadangkes alicubcubenna ti nalinteg; gapuna a ti kinajusticia rumsua a maballicug.

⁵ Kitaenyo iti tengnga dagiti nasnacion, ket cumitacayo, ket masdaawcayo unay; ta agaramidac iti maysa nga aramid cadagiti al-aldawyo, a dicayto patien nupay maisao cadacayo.

⁶ Ta adtoy, a patacderec dagiti Caldeos, daydiay nacas-ang ken nasiglat a nacion, a magna iti pagacabaan ti daga, a mangtagicua cadagiti disso a pagnaedan a saanda a cucua.

⁷ Nacaamamesda ken nacakigkigtotda, ti panangocomda ken kinatacnengda agtaud cadacuada met laeng.

⁸ Dagiti met cabayoda nasigsiglatda ngem cadagiti leopardo, ket narangranggasda ngem cadagiti lobo iti rumabii; ket dagiti lallakida nga agcabayo agtarusda a sitatangsit: wen, dagiti lallakida nga agcabayo aggapuda iti adayu; tumayabda a cas la aguila nga agdaras a manglamut.

⁹ Isuda umayda amin a maipaay iti pannacaranggas; ti turong dagiti rupada isu ti masangoanan; ket ummongenda dagiti kinayawan a cas la darat.

¹⁰ Wen, isu manguy-uyaw cadagiti ar-ari, ket dagiti piprincipe isuda ti rabrabac kencuana; ket pagcatawaanna ti tunggal sarikedked; ta gabsuonenna ti tapuc, ket isu alaenna.

¹¹ Iti casta lumabas a cas angin, ket lumasatto, ket mapabasolto, daydiay a ti kinamaingelna isu ti diosna.

¹² Saan a sica aya, O Jehova, a Diosco, ti Santoc nanipud idi punganay saancamto a matay. O Jehova, isu inkeddengmo a maipaay iti panangocom; ket sica, O Bato, isu binangonmo nga agpaay iti panangpalinteg.

¹³ Sica a nadalus unay dagiti matam a saan a maayayo iti dakes, dica met buyaen ti pacadadaelan, apay a kitaem ida nga agaramid a sililiput, ken agtalnaca no ti nadangkes alun-unenna ti tao a nalinlinteg ngem isu.

¹⁴ Ket aramidem dagiti lallaki a cacasda la cadagiti ic-ican ti baybay, a cacasda cadagiti aguy-uyas, nga awan ti agturay cadacuada?

¹⁵ Isu alaenna amin ida iti banniitna, tiliwenna ida iti iketna, ket urnongenna ida iti lasana: gapuna nga isu agragsac ket agragrag-o.

¹⁶ Gapuna nga agdaton iti iketna, ken mangpuur iti incienso iti lasana: agsipud ta gapu cadacuada ti apagna nalucmeg, ken ti taraonna nawadwad.

¹⁷ Iti casta agongaongto aya ti iketna, ket dinto agtuken a mangpapatay cadagiti nasnacion iti agnanayon?