Genesis 9 - Ti Biblia (1973)

Bendicionan ti Dios ni Noe. Ni Noe awatenna ti Bendicion ken Igunamgunam ti Dios. Ti Tulag ti Bullalayaw. Ti Pannacailunod ni Canaan.

¹ Ket binendicionan ti Dios ni Noe ken dagiti annacna a lallaki, ket kinunana cadacuada, Agbungacayo, ket agaducayo, ket punnoenyo manen ti daga.

² Ket ti panagbuteng cadacayo, ken ti panagames cadacayo addanto cadagiti amin nga animal iti daga, ken cadagiti amin a tumatayab iti tangatang; agraman amin nga aggaraw iti daga, ken amin nga ic-ican ti taaw, cadagiti imayo mayawatda.

³ Amin nga aggaraw a sibibiag agpaaydanto a taraonyo; cas iti nalasbang a nateng intedcon amin cadacayo.

⁴ Ngem ti lasag agraman ti biagna, nga isu ti darana, saanyonto a canen.

⁵ Ket di bumurong a ti darayo, ti dara dagiti biagyo, siac sapulecto; iti ima ti amin nga animal sapulecto: ket iti ima ti tao, uray iti ima ti cabsat ti tunggal tao, sapulecto ti biag ti tao.

⁶ Ti mangibucbuc iti dara ti tao, ti darana ibuyatto ti tao; ta ti Dios inaramidna ti tao a ladawanna.

⁷ Ket dacayo, agbungacayo ken agaducayo; agputotcayo iti nawadwad iti daga, ket agaducayo iti rabawna.

⁸ Ket nagsao ti Dios ken Noe, ken cadagiti annacna a lallaki a caduana, ket kinunana,

⁹ Ket siac, adtoy, buangayec cadacayo ti tulagco, ken cadagiti caputotanyo a sumono cadacayo.

¹⁰ Ken iti amin a parsua a sibibiag nga adda cadacayo, cadagiti tumatayab, cadagiti animal a naamo, ken iti amin nga animal a narungsot ti daga agraman cadacayo; cadagiti amin a rummuar iti daong, uray isu-amin nga animal ti daga.

¹¹ Ket siac bangonecto ti tulagco cadacayo; dinto met mapucawen ti amin a lasag cadagiti dandanum ti layus; ket awanto metten ti layus a mangpucaw iti daga.

¹² Ket kinuna ti Dios, Daytoy isu ti pagilasinan ti tulag nga aramidec, siac ken dacayo ken amin a nabiag a parsua nga adda cadacayo, cadagiti caputotan nga agnanayon:

¹³ Ti bullalayawco icabilco iti ulep, ket isunto a pagilasinan ti maysa a tulag caniac ken iti daga.

¹⁴ Ket maaramidto nga no pagulepec iti tangatang, makitanto ti bullalayaw iti ulep.

¹⁵ Ket lagipecto ti tulagco, nga adda caniac ken cadacayo, ken iti tunggal parsua a sibibiag nga addaan lasag; ket dagiti danum didanto agbalinen a layus tapno mangpucaw iti amin a lasag.

¹⁶ Ket ti bullalayaw addanto iti ulep; ket kitaecto tapno pacalaglagipac ti agnanayon a tulag iti Dios ken amin a parsua a sibibiag nga addaan lasag iti rabaw ti daga.

¹⁷ Ket kinuna ti Dios ken Noe, Daytoy ti pagilasinan ti tulag nga imbangonco caniac ken iti amin a lasag nga adda iti rabaw ti daga.

¹⁸ Ket dagiti lallaki nga annac ni Noe, a rimmuar iti daong da Sem, Cam ken Jafet ket ni Cam ti ama ni Canaan.

¹⁹ Dagitoy tallo isuda dagiti lallaki nga annac ni Noe: ket cadagitoy nasacnapan iti amin a daga.

²⁰ Ket rinugian ni Noe ti agtaltalon, ket nagmula iti maysa a cauvasan:

²¹ Ket idi imminum iti arac, nabartec; ket naglamolamo idi iti uneg ti sapawna.

²² Ket nakita ni Cam, nga ama ni Canaan, ti kinalamolamo ni amana, ket sinaritana cadagiti dua a cabsatna idiay ruar.

²³ Ket da Sem ken Jafet nangalada iti maysa a pagananay, ket incabilda a dua cadagiti abagada, ket nagnada a sitatallicud, ket inarpawanda ti kinalamolamo ni amada; ket sitatallicud idi dagiti rupada, ket saanda a nakita ti kinalamolamo ni amada.

²⁴ Ket nagriing a naunawan ni Noe iti aracna, ket naammoanna ti inaramid kencuana ti anacna nga inaudi.

²⁵ Ket kinunana, Mailunod coma ni Canaan; Adipento dagiti adipen cadagiti cabsatna.

²⁶ Ket kinunana, Bendito coma ni Jehova, a Dios ni Sem; Ket adipenna coma ni Canaan.

²⁷ Palawaen coma ti Dios ni Jafet, Ket agnaed coma cadagiti sapaw ni Sem; Ket adipenna coma ni Canaan.

²⁸ Ket nagbiag ni Noe, calpasan ti layus, iti tallogasut ket limapulo a tawen.

²⁹ Ket ti dagup dagiti aldaw ni Noe siam a gasut ket limapulo a tawen: ket calpasanna natay.