Genesis 8 - Ti Biblia (1973)

Bumassit dagiti dandanum. Ti Wac ken ti Calapati. Ni Noe panawanna ti Daong ket Mangidaton.

¹ Ket ti Dios inimatanganna ni Noe, ken amin nga an-animal a narungsot, ken amin nga animal a naamo, nga adda kencuana idi daong: ket pinalabas ti Dios ti maysa nga angin iti rabaw ti daga, ket nagsardeng dagiti dandanum;

² Naripcan met dagiti ubbog ti yuyeng, ken dagiti langit, ket ti tudo ti langit nagsardeng.

³ Ket dagiti dandanum nagsublida a cancanayon manipud iti rabaw ti daga: ket nages-es dagiti danum iti calpasan ti sangagasut ket limapulo nga aldaw.

⁴ Ket di daong naisadsad idi maicapito a bulan, idi maicasangapulo ket pito nga aldaw ti bulan iti rabaw dagiti bantay ti Ararat.

⁵ Ket bimmassit la a bimmassit dagiti danum agingga iti maicasangapulo a bulan: idi maicasangapulo a bulan, iti umuna nga aldaw ti bulan, nagpakita dagiti pantoc dagiti bantay.

⁶ Ket naaramid nga, iti calpasan ti uppat a pulo nga aldaw, ni Noe linuctanna ti tawa di daong nga inaramidna idi:

⁷ Ket imbaonna ti maysa a wac, ket napan nagsublisubli, agingga iti di nagati dagiti danum iti rabaw ti daga.

⁸ Ket imbaonna ti maysa a calapati, tapno mapanna kitaen no dagiti danum naabbatanda iti rabaw ti daga;

⁹ Ngem ti calapati saan a nacasarac ti pangibatayanna iti sacana, ket nagsubli kencuana iti daong; gapu ta dagiti danum addada idi iti rabaw ti langa ti amin a daga: ket inunnat ni Noe ti imana ket innalana, ket impastrecna iti uneg ti daong.

¹⁰ Ket naguray pay laeng iti sabali a pito nga aldaw; ket imbaonna manen di calapati iti ruar di daong;

¹¹ Ket di calapati nagsubli kencuana iti sumipnget ket, adtoy, iti ngiwatna ti maysa a bulong ti olivas a sinippitna: iti casta naawatan ni Noe nga naabbatan dagiti danum iti rabaw ti daga.

¹² Ket naguray pay laeng iti sabali a pito nga aldaw, calpasanna imbaonna di calapati; ket isu saanen a nagsubli kencuana.

¹³ Ket naaramid nga iti maicanem a gasut ken maysa a tawen, iti umuna a bulan, iti umuna nga aldaw ti bulan, dagiti danum pimmanawda iti daga: ket iniccat ni Noe ti calub ti daong, ket kinitana, ket, adtoy, ti langa ti daga simamaga.

¹⁴ Ket idi maicadua a bulan, idi maicaduapulo ket pito nga aldaw ti bulan, namagan ti daga.

¹⁵ Ket nagsao ti Dios ken Noe a kinunana.

¹⁶ Rumuarca iti daong, sica, ken ti asawam ken dagiti annacmo a lallaki, ken dagiti assawada agraman kenca.

¹⁷ Ipanmo iti ruar a maicuyog kenca isu-amin a lasag, nga addaan biag nga adda kenca, uray tumatayab, ken an-animal a naamo, ken amin nga agay-ayam nga aguy-uyas iti daga; tapno agputotda cadagiti adu, ken agbunga, ken agadu iti rabaw ti daga.

¹⁸ Ket ni Noe rimmuar, ken dagiti annacna a lallaki, ken ti asawana, ken dagiti assawa dagiti annacna a kimmuyog kencuana.

¹⁹ Amin nga animal, amin nga aguy-uyas, ken amin a tumatayab, uray ania nga aggaraw iti rabaw ti daga, cas mayanatup iti cakitada, rimmuarda idi daong.

²⁰ Ket nangbangon ni Noe ti maysa nga altar ken Jehova, ket nangala iti tunggal nadalus nga animal, ken tunggal nadalus a tumatayab, ket impaayna dagiti daton a mapuuran iti rabaw ti altar.

²¹ Ket nasay-up ni Jehova ti nabanglo a sayamusom; ket kinuna ni Jehova iti pusona, Diacto sublienen nga ilunod ti daga a maipuon iti tao, ta ti darepdep ti puso ti tao dakes manipud iti kinaubingna; diacto met sublienen a cabilen amin a nabiag, cas inaramidco.

²² Bayat ti caadda ti daga, ti panagmula ken ti panagapit, ken ti lamec ken ti pudot, ken ti calgaw ken ti sibabasa, ken ti aldaw ken ti rabii saandanto nga agsardeng.