Genesis 6 - Ti Biblia (1973)

Ti Pannacadakes dagiti Tattao. Ni Noe ken dagiti Annacna a Lallaki. Naibilin a ni Noe aramidenna ti maysa a Daong.

¹ Ket napasamac nga idi nangrugi dagiti tao nga agadu iti rabaw ti daga ken nayanac cadacuada dagiti babbai,

² Nga idi dagiti lallaki nga annac ti Dios nakitada ti kinapintas dagiti babbai nga annac dagiti tattao pimmilida cadacuada, dagiti kinayatda, nga asawaenda.

³ Ket kinuna ni Jehova, Ti Espirituc saanto a cancanayon a mangbabalaw iti tao, ta isu ngarud linalasag: nupay casta dagitinto aldawna sangagasut ket duapulo a tawen.

⁴ Adda cadagidi nga aldaw dagiti gigante iti daga, ket casta met iti calpassanna, ta idi simrec dagiti lallaki nga annac ti Dios cadagiti babbai nga annac dagiti tatao, ket nagputotda cadagiti annac: dagitoy isuda idi dagiti mannacabalin a tattao nga adda idi ugma, dagiti lallaki a nagdindinamag:

⁵ Ket nakita ni Jehova nga ti kinadakes ti tao dackel iti daga, ken amin nga arapaap dagiti panunot ti pusona dakes la a cancanayon.

⁶ Ket napaladingit ni Jehova iti pinangaramidna iti tao iti daga, ket napasennaay ti pusona.

⁷ Ket kinuna ni Jehova, Pucawecto iti langa ti daga ti tao a pinarsuac; tao man ken animal, ken dagiti agcarcarayam, ken dagiti tumatayab cadagiti langit; ta naladingitac a nangaramid cadacuada.

⁸ Ngem ni Noe nasaracanna ti parabur cadagiti mata ni Jehova.

⁹ Dagitoy dagiti caputotan ni Noe. Ni Noe isu idi lalaki a nalinteg ken naananay cadagiti caputotanna: nakipagna ni Noe iti Dios.

¹⁰ Ket pinutot ni Noe ti tallo nga annac a lallaki, ni Sem, ni Cam, ken ni Jafet.

¹¹ Ket nagdakes ti daga iti sangoanan ti Dios, ket napno ti daga iti ranggas.

¹² Ket nakita ti Dios iti daga, ket, adtoy ti dakes, ta amin a lasag pinadakesda ti dalanda iti rabaw ti daga.

¹³ Ket kinuna ti Dios ken Noe, Ti panungpalan ti amin a lasag dumtengen iti imatangco ta ti daga napno ti ranggas gapu cadacuada; ket, adtoy dadaelecto ida a maicanunong iti daga.

¹⁴ Agaramidca iti maysa a daong a cayo ti cedro; agaramidcanto cadagiti silsilid iti daong ket betunamto ti uneg ken ti ruar iti galagala.

¹⁵ Ket castoy ti panagaramidmonto: tallogasut a sico ti caatiddug ti daong, limapulo a sico ti caacabana, ket tallopulo a sico ti cangatona.

¹⁶ Mangaramidcanto iti maysa a panglawag iti daong, ket mangitiddacanto iti maysa a sico iti ngato; ket ti ruangan ti daong icabilmonto iti bacrangna ket aramidemto ti tallo a cadsaaran kencuana, maysa iti baba, iti tengnga, ken iti ngato.

¹⁷ Ket, adtoy, siac paglayusec ti danum iti rabaw ti daga, tapno mangpucaw iti amin a lasag, nga addaan anges ti biag, iti baba ti langit; amin nga adda iti daga matayto.

¹⁸ Ngem siac bangonecto ti tulagco kenca; ket sumreccanto iti daong, sica ken dagiti annacmo a lallaki, ken ti asawam, ken dagiti assawa dagiti annacmo a lallaki a maicuyog kenca.

¹⁹ Ket iti amin nga lasag nga addaan biag dua iti tumunggal maysa a kita ipastrecmonto iti daong, tapno aluadam ida a sibibiag agraman kenca; isudanto lalaki ken babai.

²⁰ Cadagiti tumatayab a mayalubog iti cakitada, ken cadagiti an-animal a mayalubog iti cakitada, ken cadagiti amin nga agay-ayam a mayalubog iti cakitada, dua iti tumunggal maysa a kita ipastrecmonto tapno aluadam nga agbiagda.

²¹ Ket sica mangalaca ti amin a taraon a macan, ket ummongem kenca; ket agpaayto a taraonmo ken maipaay cadacuada.

²² Casta ti inaramid ni Noe; cas mayanatup iti amin nga imbilin ti Dios kencuana, casta ti inaramidna.