Genesis 50 - Ti Biblia (1973)

Ti Pannacaitabon ni Jacob sadiay Macpela. Ti Kinaimbag ni Jose cadagiti Cacabsatna. Ti Ipapatay ni Jose.

¹ Ket ni Jose inapungolna ti rupa ni amana, ket sinangitanna, ket inagcanna.

² Ket ni Jose imbilinna cadagiti ad-adipenna a mangngagas nga embalsamarenda ni amana nga balcutenda; ket dagiti mangngagas binalcutda ni Israel nga iniccanda ti balsamo.

³ Ket tinungpalda kencuana dagiti uppat a pulo nga aldaw; ta casta ti panagtungpal idi dagiti al-aldaw ti panagembalsamar: ket dagiti Egipcios sinangitanda bayat ti pitopulo nga aldaw.

⁴ Ket iti calpasan dagiti al-aldaw a panagsangit kencuana, ni Jose sinaona cadagiti adda iti balay ni Faraon, cuncunana, No ita nacasaracac ti parabur cadagiti matayo, dawatec cadacayo, saoenyo coma, cadagiti lapayag ni Faraon, a cunayo.

⁵ Ni amac insapatana caniac a kinunana, Adtoy, matayac; iti tanemco a kinutcotco nga agservi caniac sadiay daga a Canaan, idiayto ti pangiponponam caniac. Ita ngarud, dawatec kenca, ipalubosmo nga sumang-atac, ken iponponco ni amac, saacto agsubli.

⁶ Ket ni Faraon kinunana, Inca sumang-at, ket iponponmo ni amam, a cas insapatana kenca.

⁷ Ket ni Jose simmang-at a nangiponpon ken amana; ket kimmuyog kencuana amin dagiti ad-adipen ni Faraon, ken amin dagiti pangpanglacayen iti balayna ken amin dagiti pangpanglacayen iti daga nga Egipto,

⁸ Ken amin dagiti sangacabbalay ni Jose, ken dagiti cacabsatna a lallaki, ken dagiti sangacabbalay ni amana: isuna la nga imbatida sadiay daga a Gosen dagiti annacda a babassit, ken dagiti an-animalda a dadackel.

⁹ Ket simmang-at a kimmuyog kencuana dagiti luglugan ken tattao nga agcabcabayo: ket isu idi ti dackel unay a bunggoy.

¹⁰ Ket nacagtengda agingga iti pagtaltagan idiay Atad, nga adda iti casumbangir ti Jordan, ket sadiay nagdung-awda iti dackel unay ken napalalo a panagdung-aw: ket inaramidna ti maysa a panangdung-aw ken amana cadagiti pito nga aldaw.

¹¹ Ket idi nakita dagiti agnaed sadiay a daga, dagiti Cananeo, daydi dung-aw idiay pagtaltagan idiay Atad, kinunada, Daytoy isu ti nalabes a dung-aw iti biang dagiti taga Egipto: isu ti gapuna a napanaganan iti Abel-mizraim, nga adda iti casumbangir ti Jordan.

¹² Ket dagiti annacna inaramidda kencuana cas imbilinna cadacuada:

¹³ Ta dagiti annacna impanda idiay daga a Canaan, ket imponponda iti rukib ti talon a Macpela, isu a ginatang ni Abraham tapno tagicuaenna a pagtamtamnan, ken Ephron a Heth, iti sango ti Mamre agraman ti talon.

¹⁴ Ket ni Jose nagsubli sadiay Egipto, isu, ken dagiti cacabsatna a lallaki, ken amin dagiti simmurot kencuana a nangiponpon ken amana, iti calpasan ti panangiponponna ken amana.

¹⁵ Ket idi a nakita dagiti cacabsat ni Jose a natay ni amada, kinunada, Nalabit a guraennatayto, ni Jose, ket supapacannatayto nga awan curangna cadagiti amin a dakes nga inaramidtayo kencuana.

¹⁶ Ket pinaibagada ken Jose, kinunada, Ni amam imbilinna idi di pay natay a kinunana,

¹⁷ Saoenyonto ti castoy ken Jose, Dawatec kenca ita, Pacawanem, ti salungasing dagiti cacabsatmo, ken ti basolda ta dakes ti inaramidda kenca. Ket ita, dawatenmi kenca, Pacawanem ti salungasing dagiti ad-adipen ti Dios ni amam. Ket ni Jose nagsangit idi nakisaoda kencuana.

¹⁸ Ket dagiti cacabsatna napanda met ket nagpaclebda iti sangoanan ti rupana, ket kinunada, Adtoy, dacami dagiti ad-adipenmo.

¹⁹ Ket ni Jose kinunana cadacuada, Dicayo agbuteng: ta siac addaac aya iti akem ti Dios?

²⁰ Ket dacayo, pinanagemyo ti dakes; caniac ngem pinanagem ti Dios a naimbag, tapno pagbanagenna cas adda ita, tapno ispalenna dagiti adu a tattao a sibibiag.

²¹ Ita ngarud, dicayo agbuteng: siac taraonancayto, ken dagiti annacyo a babassit. Ket liniwliwana ida, ket nagsao a siaayat cadacuada.

²² Ket ni Jose nagnaed sadi Egipto, isu ken dagiti sangacabbalay ni amana: ket nagbiag ni Jose cadagiti sangagasut ket sangapulo a tawen.

²³ Ket ni Jose nakitana dagiti appococ iti tuud ni Ephraim: dagiti met annac ni Maquir, nga anac a lalaki ni Manases, nayanacda cadagiti tumtumeng ni Jose.

²⁴ Ket ni Jose kinunana cadagiti cacabsatna, Matayac; ngem ti Dios sarungcarannacayto a di bumurong, ket pasangatennacayto ditoy a daga a mapan iti daga nga incarina a sisasapata ken Abraham, ken Isaac, ken Jacob.

²⁵ Ket ni Jose sinapataanna cadagiti annac ni Israel, cuncunana, Ti Dios sarungcarannacayto a di bumurong, ket dacayo alaenyonto ditoy dagiti tultulangco.

²⁶ Ket ni Jose natay idi nagtawen iti sangagasut ket sangapulo: ket inimbalsamarda, ket naicabil iti maysa a lungon sadi Egipto.