Genesis 5 - Ti Biblia (1973)

Putputot ni Set.

¹ Daytoy ti pacabasaan cadagiti caputotan ni Adan. Idi aldaw a pinarsua ti Dios ti tao, inaramidna a caasping ti Dios;

² Pinarsuana ida a lalaki ken babai, ket binendicionanna ida, ket pinanagananna ida ti Adan (Tao), idi aldaw a pannacaparsuada.

³ Ket nagbiag ni Adan iti sangagasut ket tallopulo a tawen, ket pinutotna ti maysa nga anac a lalaki a caaspingna, cas ti ladawanna; ket pinanagananna iti Set:

⁴ Ket dagiti aldaw ni Adan, calpasan ti panangputotna ken Set, walogasut a tawen: ket pinutotna dagiti annac a lallaki ken babbai.

⁵ Ket ti dagup dagiti aldaw ni Adan siam a gasut ket tallopulo a tawen: ket calpasanna natay.

⁶ Ket nagbiag ni Set iti sangagasut ket lima a tawen, ket pinutotna ni Enos:

⁷ Ket ni Set nagbiag, calpasan ti panangputotna ken Enos, iti walogasut ket pito a tawen, ket pinutotna dagiti annac a lallaki ken babbai:

⁸ Ket ti dagup dagiti aldaw ni Set siam a gasut, sangapulo ket dua a tawen: ket calpasanna natay.

⁹ Ket nagbiag ni Enos iti siam a pulo a tawen, ket pinutotna ni Cainan.

¹⁰ Ket ni Enos, calpasan ti panangputotna ken Cainan, nagbiag iti walogasut, sangapulo ket lima a tawen ket pinutotna dagiti annac a lallaki ken babbai:

¹¹ Ket dagup dagiti aldaw ni Enos siam a gasut ket lima a tawen: ket calpasanna natay.

¹² Ket nagbiag ni Cainan iti pitopulo a tawen, ket pinutotna ni Mahalael:

¹³ Ket calpasan ti panangputotna ken Mahalael; nagbiag iti walogasut ket uppat a pulo a tawen ni Cainan, ket pinutotna dagiti annac a lallaki ken babbai:

¹⁴ Ket ti dagup dagiti aldaw ni Cainan siam a gasut ket sangapulo a tawen: ket calpasanna natay.

¹⁵ Ket nagbiag ni Mahalael iti innem a pulo ket lima a tawen, ket pinutotna ni Jared:

¹⁶ Ket nagbiag ni Mahalael, calpasan ti panangputotna ken Jared, iti walogasut ket tallopulo a tawen, ket pinutotna dagiti annac a lallaki ken babbai:

¹⁷ Ket ti dagup dagiti aldaw ni Mahalael walogasut, siam a pulo ket lima a tawen: ket calpasanna natay.

¹⁸ Ket nagbiag ni Jared iti sangagasut, innem a pulo ket dua a tawen, ket pinutotna ni Enoc:

¹⁹ Ket nagbiag ni Jared, calpasan ti panangputotna ken Enoc, iti walogasut a tawen, ket pinutotna dagiti annac a lallaki ken babbai:

²⁰ Ket ti dagup dagiti aldaw ni Jared siam a gasut, innem a pulo ket dua a tawen: ket calpasanna natay.

²¹ Ket nagbiag ni Enoc iti innem a pulo ket lima a tawen, ket pinutotna ni Matusalem:

²² Ket ni Enoc nakipagna iti Dios, calpasan ti panangputotna ken Matusalem, iti tallogasut a tawen, ket pinutotna dagiti annac a lallaki ken babbai:

²³ Ket ti dagup dagiti aldaw ni Enoc tallogasut, innem a pulo ket lima a tawen:

²⁴ Ket nakipagna ni Enoc iti Dios: ket nagawan: ta innala ti Dios.

²⁵ Ket nagbiag ni Matusalem iti sangagasut, walopulo ket pito a tawen, ket pinutotna ni Lamec;

²⁶ Ket nagbiag ni Matusalem, calpasan ti panangputotna ken Lamec, iti pitogasut, walopulo ket dua a tawen, ket pinutotna dagiti annac a lallaki ken babbai:

²⁷ Ket ti dagup dagiti aldaw ni Matusalem siam a gasut, innem a pulo ket siam a tawen: ket calpasanna natay.

²⁸ Ket nagbiag ni Lamec iti sangagasut, walopulo ket dua a tawen, ket pinutotna ti maysa nga anac a lalaki:

²⁹ Ket pinanagananna iti Noe, a cunana, Daytoy liwliwaennatayto cadagiti aramidtayo, ken cadagiti ut-utoy dagiti im-imatayo maipuon iti daga, nga inlunod ni Jehova.

³⁰ Ket nagbiag ni Lamec, calpasan ti panangputotna ken Noe, iti limagasut, siam a pulo ket lima a tawen, ket pinutotna dagiti annac a lallaki ken babbai:

³¹ Ket ti dagup dagiti aldaw ni Lamec pitogasut, pitopulo ket pito a tawen: ket calpasanna natay.

³² Ket nagtawen ni Noe iti limagasut a tawen: ket ni Noe pinutotna ni Sem, ni Cam, ken ni Jafet.