Genesis 49 - Ti Biblia (1973)

Ti Padto ni Jacob maipapan cadagiti annacna a lallaki. Ti Ipapatayna.

¹ Ket ni Jacob inayabanna dagiti annacna a lallaki, ket kinunana: Agtitiponcayo, tapno saritaec cadacayo ti mapasamac cadacayo cadagiti maud-udi nga al-aldaw.

² Agtitiponcayo, ket denggenyo, dacayo nga annac a lallaki ni Jacob; Ket imdenganyo ni Israel nga amayo.

³ Ruben, sica ti inauna nga anacco, ti pigsac, ken ti damo ti kiredco; Cangronaan ti caicarian, ken cangronaan ti pannacabalin.

⁴ Sibuburec nga aglippias a cas danum, maawan coma kenca ti kinapangpangronam; Ta inulim ti pagiddaan ni amam; Idin: tinulawam: inulina ti pagiddaac.

⁵ Da Simeon ken Levi agcabsatda; Ig-igam ti kinaranggas dagiti campilanda.

⁶ O cararuac, dica sumrec iti palimedda; Iti gimongda, O gloriac, dica makitimpuyog; Ta iti pungtotda pinapatayda ti maysa a lalaki. Ken iti kinasungitda pinasatanda ti vaca.

⁷ Mailunod coma ti pungtotda, gapu ta nacaro idi; Ken ti ungetda, gapu ta naulpit idi: Siac isinacto ida iti Jacob, Ket iwarasconto ida iti Israel.

⁸ 2 Sam. 22:41.Juda, sica daydayawendacantao dagiti cacabsatmo: Ti imam addanto iti lengnges dagiti cabusormo; Dagiti annac a lallaki ni amam agrucbabdanto kenca.

⁹ Ni Juda isu urbon ti maysa a leon; Naggapu iti sinamsam immulica, anacco: Nagrucob, nagidda cas maysa a leon, Ken cas maysa a leon a babai; asino ti macariing kencuana?

¹⁰ Dinto umadayo ti cetro ken Juda, Uray ti sarucod ti agturay di umadayo iti baet dagiti sacsacana, Agingga iti di umay ni Mamagcacappia; ket isu ti tulnoganto dagiti il-ili.

¹¹ Igalgalutan iti puon ti uvas ti urbonna, Ket ti urbon ti asnona iti napili a lanut ti uvas; Linabaanna iti arac dagiti cawcawesna, ken iti dara dagiti uvas ti pagananayna:

¹² Dagiti matana palabbagaento ti arac, Ket dagiti ngipenna papurawento ti gatas.

¹³ Ni Zabulon agnaedto cadagiti pagsangladan ti baybay. Ket isu ti pagsangbayanto dagiti sasacayan; Ket sadiay Sidon ti pagpatenggaanto ti beddengna.

¹⁴ Ni Isaacar isu ti asno a napigsa, agidda cadagiti apon dagiti carcarnero:

¹⁵ Ket nakitana ti maysa a paginanaan a naimbag idi, Ket ti daga a nacaay-ayo idi: Ket imbabana ti abagana tapno awitenna, Ket nagbalin nga adipen iti panagbannog.

¹⁶ Ni Dan ocomennanto dagiti cacailianna, A cas maysa cadagiti tribu ti Israel.

¹⁷ Ni Dan maysanto nga uleg iti dalan, Maysanto a carasaen iti lipit, A cumagat cadagiti mucmucod ti cabayo, Iti casta ti agsacay kencuana tinnagenna iti licud.

¹⁸ Inur-urayco idi ti panangispalmo, O Jehova.

¹⁹ Ni Gad, duclosento ti maysa a sangcabuyot; Ngem isu dumoclosto cadagiti mucmucodda.

²⁰ Ti tinapay ni Aser aglablabonanto, Ket isu itednanto dagiti nanam a naarian.

²¹ Ni Nephtali ugsa a babai a nabaybayaan: Mangted cadagiti nasayaat a balbalicas.

²² Ni Jose maysa a sanga a sibubunga, Sanga a sibubunga iti abay ti maysa nga ubbog; Dagiti sarsaringitna cumalatcatda iti bacud.

²³ Dagiti pumapana pinarparigatda, Ket pinampanada, ket kinamatcamatda:

²⁴ Ngem ti ba-ina nagtuloy iti pigsa, Ket dagiti ig-igam dagiti im-imana napapigsada, Gapu cadagiti im-ima ti Mannacabalin ni Jacob. (Isu a naggapuan ti pastor, ti bato ni Israel),

²⁵ Aggapu iti Dios ni amam met laeng, ti tumulongto kenca, Ket aggapu iti Mannacabalin amin ti mamendicionto kenca, Cadagiti benbendicion ti langit a nangato, Benbendicion ti yuyeng nga agiyan iti baba, Benbendicion dagiti sussuso, ken ti aanacan.

²⁶ Dagiti benbendicion ni amam Dacdackelda idi ngem dagiti benbendicion dagiti capuonac Inggana dagiti pungto a caadaywan dagiti turturod nga agnanayon: Dagitoy addadanto iti olo ni Jose. Ken iti cuppocuppo ti naisina cadagiti cacabsatna a lallaki.

²⁷ Ni Benjamin isu ti lobo nga agagagaw: Iti bigat canennanto ti sinamsam, Ket iti rumabii, binglayennanto ti inagaw.

²⁸ Amin dagitoy isuda dagiti sangapulo ket dua a caputotan ni Israel: ket daytoy ti sinao ni amada cadacuada, ket binendicionanna ida; tummunggal maysa mayannatup iti pammendicionna, binendicionanna ida.

²⁹ Ket imbilinna cadacuada, ket kinunana cadacuada, siac maitiponacto cadagiti cacabagiac: iponpondacto a maitipon cadagiti dadackelco idiay rukib nga adda iti talon ni Ephron a Hetheo,

³⁰ Idiay rukib nga adda iti talon idiay Macpela, iti sango ti Mamre, sadiay daga a Canaan, isu a ginatang ni Abraham agraman ti talon ken Ephron a Hetheo, tapno tagicuaenna a pagtamtamnan:

³¹ Sadiay ti nangiponponanda cada Abraham ken Sara, nga asawana; idiay ti nangiponponanda cada Isaac ken Rebecca, nga asawana; ket sadiay ti nangiponponanda ken Lea:

³² Ti talon ken ti rukib nga adda idiay, isu a nagatang cadagiti annac ni Heth.

³³ Ket idi nalpasen ni Jacob ti panangbilbilinna cadagiti annacna, incucotna dagiti sacsacana idi iddana, ket inyawatna ti cararuana, ket naitipon cadagiti cabcabagianna.