Genesis 48 - Ti Biblia (1973)

Ni Jose ken dagiti Annacna a Lallaki sarungcaranda ni Jacob. Ni Jacob bendicionanna dagiti Annac a Lallaki ni Jose.

¹ Ket naaramid iti calpasan dagitoy a banbanag, a ti maysa kinunana ken Jose, Adtoy, masakit ni amam: ket incuyogna dagiti dua nga annacna a lallaki, da Manases ken Ephraim.

² Ket inyammo ti maysa ken Jacob, ket kinunana, Adtoy, ni anacmo a Jose um-umay kenca: ket ni Israel incarcarigatanna ti bagina, ket nagtugaw iti pagiddaan.

³ Ket ni Jacob kinunana ken Jose, Ti Dios a Mannacabalin amin nagparang caniac idiay Luza, sadiay daga a Canaan, ket binendicionannac.

⁴ Ket kinunana caniac, Adtoy, pagbungaencanto, ket pagaduencanto, ket aramidencanto a maysa a bunggoy dagiti inilin-ili, ket itdecto daytoy a daga cadagiti putputotmo iti calpasam a tagicuaen nga agnanayon.

⁵ Ket ita dagiti dua nga annacmo a lallaki, a nayanac kenca iti daga nga Egipto, idi diac pay immay ditoy Egipto, cucuac ida; da Ephraim ken Manases, a cas met da Ruben ken Simeon, cucuacto ida.

⁶ Ket dagiti annacmo a putotem a maud-udi ngem dagitoy cucuamto ida; agnagandanto a mayannurot iti nagan dagiti cacabsatda iti panagtawidda.

⁷ Ket siac, idi naggapuac idiay Padan-aram, natay ni Raquel iti arpadco iti dalan idiay daga a Canaan, idi adayu pay laeng bassit ti Ephrata: ket impoponco iti dalan a mapan sadiay Ephrata (nga isu ti Belen).

⁸ Ket ni Israel nakitana dagiti annac ni Jose, ket kinunana, siasinoda dagitoy?

⁹ Ket ni Jose kinunana ken amanna, Isuda dagiti annacco a lallaki, nga inted ti Dios caniac ditoy. Ket kinunana, dawatec kenca, Yegmo ida, caniac, ket bendicionacto ida.

¹⁰ Dagiti mata ni Israel kimmodrepdan maipuon iti kinalacayna, iti casta di nacakita. Ket inyadanina ida kencuana; ket inagcanna ida, ket inaracupna ida.

¹¹ Ket ni Israel kinunana ken Jose, Siac diac impagarup idin a makitac ti rupam: ket, adtoy, ti Dios impalubosna a makitac met dagiti putotmo.

¹² Ket ni Jose innalana ida nanipud iti nagbaetan dagiti tumengna: ket intamedna ti rupana iti daga.

¹³ Ket ni Jose innala ida a dua, ni Ephraim iti macanawanna nga agturong iti ima a macatigid ni Israel, ket ni Manases iti ima a macatigidna nga agturong iti ima a macanawan ni Israel, ket inyasidegna ida kencuana.

¹⁴ Ket ni Israel inyunnatna ti imana a macanawan, ket impatayna iti olo ni Ephraim, isu nga inaudi idi, ket ti imana a macatigid iti olo ni Manases, nga inturongna a siaammo dagiti imimana; ta ni Manases isu idi ti inauna.

¹⁵ Ket binendicionanna ni Jose, ket kinunana, Ti Dios nga iti sangona nagnagnaanda dagiti dadackelco a ni Abraham ken ni Isaac, ti Dios a manaraon caniac iti amin a panagbiagco agingga itoy nga aldaw,

¹⁶ Ti angel a nangilisi caniac iti amin a dakes, bendicionanna coma dagiti ubbing; ket ni naganco matawagan coma cadacuada, ken ti nagan dagiti ammac a ni Abraham ken ni Isaac; agbalinda coma a maysa a caadu iti tengnga ti daga.

¹⁷ Ket ni Jose idi nakitana a ni amana impatayna ti imana a macanawan iti olo ni Ephraim, saan a nacaay-ayo kencuana: ket inngatona ti ima ni amana, tapno iccatenna iti olo ni Ephraim a yallatiw iti olo ni Manases.

¹⁸ Ket ni Jose kinunana ken amana, Saan a casta, ama; ta daytoy isu ti inauna; idissom ti imam a macanawan iti olona.

¹⁹ Ket ni amana dina kinayat ket kinunana, Ammoc, anacco, ammoc; isu met agbalinto nga maysa nga ili, ket isu dackelto met: ngem ti cabsatna nga inaudi dacdackel to ngem isu, ket ti putotna agbalinto a maysa a caadu dagiti nasnacion.

²⁰ Ket binendicionanna ida idi nga aldaw a cuncunana, Kenca ti panangibendicionto ti Israel a cuncunana, Ti Dios aramidennaca coma a cas ken Ephraim ken cas ken Manases: ket inyun-unana ni Ephraim ngem ni Manases.

²¹ Ket ni Israel kinunana ken Jose, Adtoy, matayac: ngem ti Dios addanto cadacayo, ket pagsubliennacayto iti daga dagiti dadackelyo.

²² Maysa pay intedco kenca ti maysa a binglay a pacaipangpangronaam cadagiti cacabsatmo, isu nga innalac iti ima ti Amorroheo gapu iti campilanco ken iti ba-ic.