Genesis 46 - Ti Biblia (1973)

Ni Jacob ken ti Familiana dumanonda sadi Gosen. Dagiti Naganda. Ni Jose sabtenna ni Amana.

¹ Ket nagluas ni Israel agraman amin a cucuana, ket dimmanon sadi Beer-seba, ket nangipaay cadagiti datdaton iti Dios ni amana nga Isaac.

² Ket ti Dios nakisao ken Israel cadagiti parparmata ti rabii, ket kinunana, Jacob, Jacob. Ket isu kinunana, Adtoyac.

³ Ket kinunana, Siac ti Dios, ti Dios ni amam: dica agbuteng a sumalog sadi Egipto; ta aramidencanto a dackel a nacion sadiay:

⁴ Cuyogencanto a sumalog sadi Egipto; ket pasang-atencanto manen a di bumurong: ket ni Jose isaadnanto ti imana cadagiti matam.

⁵ Ket nagrubbuat ni Jacob sadi Beer-seba: ket dagiti annac a lallaki ni Israel innalada ni Jacob nga amada, ken dagiti ubbingda, ken dagiti assawada, cadagiti luglugan nga inbaon ni Faraon a paglugananda.

⁶ Ket innalada dagiti an-animalda, ken dagiti cucuada, a nasapsapulanda idiay Canaan, ket dimmanonda sadi Egipto, ni Jacob, ken amin a putotna a naicuyog kencuana:

⁷ Dagiti annacna a lallaki, ken dagiti annac a lallaki dagiti annacna a lallaki agraman kencuana, ken dagiti annacna a babbai, ken dagiti annac a babbai dagiti annacna a lallaki, ken amin a putotna incuyogna ida sadi Egipto.

⁸ Ket dagitoy dagiti nagnagan dagiti annac ni Israel, a simrec sadi Egipto, ni Jacob ken dagiti annacna a lallaki: ni Ruben, anac nga inauna ni Jacob.

⁹ Ket dagiti annac a lallaki ni Ruben: da Hanoch, ken Phallu, ken Hezron, ken Carmi.

¹⁰ Ket dagiti annac a lallaki ni Simeon: da Jamuel, ken Jamin, ken Ohad, ken Jachin, ken Zohar, ken Saul nga anac ti maysa a babai a taga Canaan.

¹¹ Ket dagiti annac a lallaki ni Levi: da Gerson, ken Coath, ken Merari.

¹² Ket dagiti annac a lallaki ni Juda: da Er, ken Onan, ken Sela, ken Phares, ken Zara; ngem natay da Er ken Onan sadi daga a Canaan. Ket dagiti annac a lallaki ni Phares isuda idi da Hezron ken Hamul.

¹³ Ket dagiti annac a lallaki ni Issacar: da Thola, ken Phua, ken Job, ken Simron.

¹⁴ Ket dagiti annac a lallaki ni Zabulon: da Sered, ken Elon, ken Jahiell.

¹⁵ Dagitoy dagiti annac a lallaki ni Lea, nga inyanacna ken Jacob idiay Padan-aram, ken ni Dina, nga annacna a babai: dagup dagiti cararua nga annacna a lallaki ken annacna a babai, tallopuloda ket tallo.

¹⁶ Ket dagiti annac a lallaki ni Gad: da Ziphion, ken Aggi, ken Ezbon, ken Suni, ken Heri, ken Arodi, ken Areli.

¹⁷ Ket dagiti annac a lallaki ni Aser: da Jimna, ken Ishua, ken Isui, ken Beria, ken ni Sara a cabsatda a babai; ket dagiti annac a lallaki ni Beria; da Heber ken Malchiel.

¹⁸ Dagitoy dagiti annac a lallaki ni Zilpa, isu nga inted ni Laban ken anacna a babai a Lea; ket inyanacna ken Jacob dagitoy, sangapuloda ket innem a tattao.

¹⁹ Dagiti annac a lallaki ni Raquel, nga asawa ni Jacob: da Jose ken Benjamin.

²⁰ Ket ken Jose iti daga nga Egipto nayanacda da Manases ken Ephraim, isuda nga inyanac kencuana ni Aseneth, nga anac a babai ni Potiphera a padi sadi On.

²¹ Ket dagiti annac a lallaki ni Benjamin: da Bela, ken Becher, ken Asbel, ken Gera, ken Naaman, ken Ehi, ken Ros, ken Moppim, ken Oppim, ken Ard.

²² Dagitoy dagiti annac a lallaki ni Raquel, a nayanac ken Jacob: dagupda amin sangapulo ket uppat a cararua.

²³ Ket dagiti annac a lallaki ni Dan: ni Husim.

²⁴ Ket dagiti annac a lallaki ni Nephtali: da Jahzeel, ken Guni, ken Jeser, ken Shillem.

²⁵ Dagitoy dagiti annac a lallaki ni Bilha, isu nga inted ni Laban ken Raquel nga anacna a babai, ket dagitoy inyanacna ken Jacob: dagup dagiti tattao pitoda.

²⁶ Amin dagiti tattao a naicuyogda ken Jacob sadiay Egipto a nagtaudda iti lasagna, malacsid dagiti assawa dagiti annac a lallaki ni Jacob, dagupda amin idi a carcararua innem a pulo ket innem;

²⁷ Ket dagiti annac a lallaki ni Jose, a nayanac kencuana sadi Egipto, duada a tattao: dagup amin a tattao iti sangcacabbalayan ni Jacob, a simrec sadi Egipto, pitopuloda idi.

²⁸ Ket imbaonna nga immuna ngem isu ni Juda a mapan ken Jose, tapno ipakitana ti dalan kencuana idiay Gosen; ket dimtengda sadiay daga a Gosen.

²⁹ Ket ni Jose insaganana ti luganna, ket simmang-at a sumabet ken Israel nga amana, idiay Gosen: ket nagparang kencuana, ket inapungolna ti tengngedna, ket nagsangit iti nabayag a siaapungol kencuana.

³⁰ Ket ni Israel kinunana ken Jose, Matayac coma itan, ta nakitac ta rupam, a sibibiagca pay laeng.

³¹ Ket ni Jose kinunana cadagiti cacabsatna a lallaki, ken cadagiti cabbalay ni amana, Sumang-atacto, ket yammocto ken Faraon, ket cunacto kencuana, Dagiti cacabsatco, ken ti familia ni amac, nga adda idi iti daga a Canaan immaydan caniac;

³² Ket dagiti lallaki isuda dagiti paspastor ta nagayaywanda cadagiti an-animal idi; ket incuyogda dagiti an-animalda a babassit ken dadackel, ken amin nga adda cadacuada.

³³ Ket maaramidto a, no ni Faraon ayabannacayto ket cunananto, Ania ti akemyo?

³⁴ Cunayonto, dagiti ad-adipenmo nagaywanda idi cadagiti an-animal, nanipud iti kinaubingmi agpapan ita, uray dacami ken dagiti met dadackelmi: tapno agnaedcayo coma iti daga a Gosen; ta tumunggal mangipaarab iti animal nacarimrimon cadagiti Egipcios.