Genesis 44 - Ti Biblia (1973)

Agluas dagiti Cacabsat ni Jose, ket adda cadacuada ti Copa ni Jose. Mapasublida. Ti Panangibabaet ni Juda maipoon ken Benjamin.

¹ Ket binilinna ti pangoloen ti balayna, a cunana, Punnoem dagiti supsupot dagiti lallaki iti taraon, iti agingga ti maawitda, ket icabilmo ti pirac ti tunggal maysa iti wangawangan ti supotna.

² Ket ti copac, ti copa a pirac, icabilmo iti wangawangan ti supot ti inaudi, agraman ti pirac nga igatangna ti pagtaraon. Ket inaramidna a cas iti insao ni Jose.

³ Idi limmawag ti bigat, napalubosanda dagiti lallaki, agraman dagiti as-asnoda.

⁴ Ket idi rimmuardan iti ili ket dida pay la nacaadayu, kinuna ni Jose iti pangoloen ti balayna, Ala, surotem dagidiay a lallaki; ket intono macamacammo ida, cunam cadacuada, Ania ti gapuna nga sinubadanyo iti dakes ti naimbag?

⁵ Saan aya a castoy, ti pagininuman ti apoc, ket isu a pagpadpadlesanna? inaramidyo ti dakes iti daytoy a gapuananyo.

⁶ Ket nacamacamna ida, ket sinaona dagitoy a balicas cadacuada.

⁷ Ket kinunada kencuana, Apay met ket casta ti sasaoen ti apoc? Adayu unay nga aramidenda ti cacasta dagiti ad-adipenmo.

⁸ Adtoy, ti pirac, a nasaracanmi iti ruangan dagiti supsupotmi, inyegmi kenca nanipud Canaan: casano ngarud ti panagtacawmi iti balay ni apom iti pirac, wenno balitoc?

⁹ Uray siasino a pacasaracannanto cadagiti ad-adipenmo, matay coma, ket tagabuennacamto pay ni apomi.

¹⁰ Ket kinunana, Ita ngarud maaramid a cas sinaoyo: iti daydiay pacatumpungacto, isu ti adipenecto; ket dacayo awan ti basolyo.

¹¹ Isuda ngarud nagdardarasda, ket dinissaagda ti tunggal maysa ti supotna iti daga, ket linuctanda ti tunggal maysa ti supotna.

¹² Ket nagsapul, nga inrugina iti inauna, ket lineppasna iti inaudi: ket ti copa nasaracan iti supot ni Benjamin.

¹³ Idin rinay-abda dagiti cawcawesda, ket kinargaan ti tunggal maysa ti asnona, ket nagsublida iti ciudad.

¹⁴ Ket ni Juda ken dagiti cacabsatna napanda iti balay ni Jose; ket isu adda pay la sadiay idi: ket nagpaclebda iti sangoananna.

¹⁵ Ket ni Jose kinunana cadacuada, Ania nga aramid daytoy a nagapuananyo? dicayo ammo a maysa a tao a cas caniac mabalinna unay ti agpadles?

¹⁶ Ket ni Juda kinunana, Ania ngata ti saoenminto ken ni apoc? ania ngata ti ibagaminto? wenno ania ngata ti pangpanecnecminto? Ti Dios inpalgacna ti kinadakes dagiti ad-adipenmo: adtoy, dacami dagiti ad-adipen ni apoc: dacami amin, ken daydiay nga iti imana nacasaracan ti copa.

¹⁷ Ket kinunana, Siac uray caanoman diacto aramiden ti casta: ti tao a nacasaracan ti copa iti imana, daydiay isunto ti adipenco; ngem dacayo, incayo a sitatalna ken amayo.

¹⁸ Idin ni Juda immasideg kencuana, ket kinunana, O, apoc, dawatec kenca ipaaymo, nga toy adipenmo agsao coma iti maysa a balicas cadagiti lapayag ni apoc, ket saan a rumaba coma ti ungetmo itoy adipenmo; ta sica casca ken Faraon met laeng.

¹⁹ Ni apoc inintuudna cadagiti adipenna, a kinunana, Adda amayo wenno cabsat a lalaki?

²⁰ Ket kinunami ken apoc, Adda amami a lacayen, ken maysa nga anac a lalaki ti kinalacayna, ubing a bassit; ket ti cabsatna a lalaki natayen, ket isu la ti natda iti inana; ket ni amana ayatenna.

²¹ Ket sica kinunam cadagiti ad-adipenmo, Yegyo caniac, tapno kitaec.

²² Ket kinunami ken apoc, Ti ubing dina mapanawan ni amana: ta no panawanna ni amana, matayto ni amana.

²³ Ket kinunam cadagiti ad-adipenmo, No ti cabsatyo a lalaki nga inaudi saan a makipagsalog cadacayo, dicayonto makitan ti rupac.

²⁴ Ket naaramid nga, idi dimtengcami ken ni amami nga adipenmo, sinaritami kencuana ti sinao ni apoc.

²⁵ Ket ni amami kinunana, Incayo manen, gumatangcayo iti bassit a taraontayo.

²⁶ Ket kinunami, Dicami macapan: no ti cabsatmi a lalaki nga inaudi cumuyog coma cadacami incamto ngarud; ta saan a maipalubos a makitami ti rupa daydiay a lalaki, no di maicuyog cadacami ti cabsatmi a lalaki nga inaudi.

²⁷ Ket ti adipenmo nga amac kinunana cadacami, Ammoyo a duada nga annac a lalaki nga inyanac caniac ni asawac:

²⁸ Ket ti maysa pinanawannac, ket kinunac, Pudno a nalasanglasangen; ket agpapan ita diac pay nakita:

²⁹ Ket no alaenyo daytoy met caniac, ket maaramid kencuana ti dakes, pagbabaenyonto dagiti ubanco a silaladingit ken Tanem.

³⁰ Ita ngarud, no dumanonacto ken adipenmo nga amac, ket ti ubing awan coma cadacami; ta ti biagna naisinggalut iti biag ti ubing;

³¹ Maaramidto a no makitana a ti ubing awan, matayto: ket dagiti ad-adipenmo ibabadanto dagiti uban ti adipenmo nga amami a silaladingit ken Tanem.

³² Ta toy adipenmo nagbalin nga agsungbat ita ubing, a kinunac, No diac isubli, kenca siacto ngarud ti akinbasol ken amac iti agnanayon.

³³ Iti casta ngarud, dawatec kenca, agbati coma toy adipenmo a sucat ti ubing, a tagabuen ni apoc; ket palubosam ti ubing a maicuyog cadagiti cacabsatna a lallaki.

³⁴ Ta casano ti isasangpetconto ken amac, no awan caniac ti ubing? tapno saanco a makita ti dakes a sagabaento ni amac.