Genesis 43 - Ti Biblia (1973)

Maibaon manen dagiti Annac ni Jacob, ket ni Benjamin ti cacuyogda. Ni Jose makipagdaya cadagiti Cacabsatna a lallaki.

¹ Ket ti bisin nagpalalo iti daga.

² Ket naaramid, idi a nacandan amin ti pagtaraon nga ingapuda sadi Egipto, ti amada kinunana cadacuada, Incayo manen, gumatangcayo iti bassit a taraontayo.

³ Ket ni Juda nagsao kencuana a kinunana, Incarina iti nainget cadacami daydi lalaki a cunana, Dicayonto makita ti rupac, no di maicuyog cadacayo ni cabsatyo a lalaki.

⁴ No ipacuyogmo ni cabsatmi a lalaki cadacami, sumalogcamto ket igatangandacanto iti taraon:

⁵ Ngem no dica ibaon, saancamto a sumalog; ta daydi lalaki kinunana cadacami, Saanyo a makita ti rupac, no awan ni cabsatyo a lalaki a maicuyog cadacayo.

⁶ Ket ni Israel kinunana, Ania ket ngamin a nagdakes ti inaramidyon caniac, iti panangibagayo iti daydiay a tao nga adda pay cabsatyo?

⁷ Ket kinunada, Nagintuudannacami iti nainget daydi a lalaki iti maipapan cadacami, ken cadagiti cacabagianmi, a kinunana, Sibibiag pay laeng ni amayo? adda pay maysa a cabsatyo a lalaki? Ket impalawagmi kencuana a cas mayannatup cadagitoy a sasao: naammoamin cadi aya nga sawenna idi, Yegyo ti cabsatyo?

⁸ Ket ni Juda kinunana ken amana nga Israel, Ipacuyogmo caniac ti ubing, ket tumacdercamto a mapan; tapno agbiagtayo, ket ditay matay, dacami, ken sica, ken dagiti met annacmi a babassit.

⁹ Siacto ti agsungbat a maipaay kencuana; iti imac ti pagtontonamto: no siac diacto isubli kenca, ken yegco iti saclangmo, uray siac ti agawit iti basol iti agnanayon:

¹⁰ Ta no saancami coma a nagtactac pudno nga ita uray namindua a nagsublicamin.

¹¹ Ket ti amada nga Israel kinunana cadacuada, No casta ita, aramidenyo daytoy: icabilyo dagiti nasayaat a bungbunga ti daga cadagiti curcuributyo, ket alaenyo nga isagut iti daydiay a lalaki, ti bassit a resina, ken bassit a diro, recrecado ken mirra, pinones ken almendras;

¹² Ket paminduaenyo ti pirac nga icuyogyo iti imayo; ket ti pirac a naisubli iti wangawangan ti supotyo itugotyo; no cas pagarigan adda idi maysa a biddut:

¹³ Alaenyo met ti cabsatyo a lalaki, ket tumacdercayo nga agsubli iti daydiay a tao:

¹⁴ Ket ti Dios a Mannacabalin amin yetnagna coma cadacayo ti caasi iti sango daydiay a lalaki, tapno yawatna cadacayo daytay maysa a cabsatyo a lalaki ken ni Benjamin. Ket no maulilaac cadagiti annacco, maulilaac.

¹⁵ Ket dagiti lallaki innalada ti sagut, ket iniggamanda ti pirac a pinaminduada, ken ni Benjamin; ket timmacderda, ket napanda simmalog sadi Egipto, ket dimmatagda iti saclang ni Jose.

¹⁶ Ket idi ni Jose nakitana ni Benjamin a caduada, kinunana iti pangoloen ti balayna, Ipastrecmo dagiti lallaki iti balay, ket pumartica ket agsaganaca; ta dagiti lallaki makipangaldawda caniac.

¹⁷ Ket ti lalaki tinungpalna ti imbilin ni Jose; kencuana ket ti lalaki inserrecna dagiti lallaki iti balay ni Jose.

¹⁸ Ket dagiti lallaki nagbutengda, ta naipanda iti balay ni Jose; ket kinunada, Maipuon iti daydi pirac, a naisubli cadagiti supsupottayo idi immuna a daras, maiserrectayo; tapno agsapul iti pangidarumanna cadatayo, ket duclusennatayo, ket sa alaennatayo a tagabuen, ken dagiti as-asnotayo.

¹⁹ Ket immasidegda iti pangoloen ti balay ni Jose, ket nakisaoda kencuana iti ruangan ti balay,

²⁰ Ket kinunada, O, apoc, immaycami idi damona gimmatang iti taraon:

²¹ Ket naaramid nga, idi dimtengcami iti nagsangbayanmi, linuctanmi dagiti supsupotmi, ket, adtoy, ti pirac ti tunggal maysa adda idi iti wangawangan ti supotna, ti piracmi iti met la gatadna: ket incuyogmi manen a binitbit.

²² Ket binitbitmi met ti sabali a pirac nga igatang iti taraon: saanmi nga ammo no asino ti nangicabil ti daydi piracmi cadagiti supsupotmi.

²³ Ket kinunana, Talna cadacayo, dicayo agbuteng: ti Diosyo, ken ti Dios ni amayo, intedna cadacayo ti gameng cadagiti supsupotyo: naadda idi caniac ti piracyo. Ket inruarna cadacuada ni Simeon.

²⁴ Ket ti lalaki inserrecna dagiti lallaki iti balay ni Jose, ket intedna cadacuada ti danum, ket binuggoanda dagiti sacsacada; ket pinacanna dagiti as-asnoda.

²⁵ Ket insaganada ti sagut a maipaay iti yaay ni Jose iti tengnga ti aldaw: ta nangngegda idi nga idiay ti inda panganan.

²⁶ Ket idi ni Jose immay iti balayna, impanda kencuana ti sagut nga adda idi cadacuada iti uneg ti balay, ket nagrucnoyda kencuana agingga iti daga.

²⁷ Ket sinaludsudna cadacuada no casanoda, ket kinunana, Sisasalunat ni amayo, daydi lacay a kinunayo? Sibibiag pay?

²⁸ Ket kinunada, Ti adipenmo nga amami nasalun-at, nabiag pay. Ket indumogda dagiti ol-oloda, ket nagrucnoyda.

²⁹ Ket isu intaliawna dagiti matana, ket nakitana ni Benjamin a cabsatna nga anac ni inana, ket kinunana, Daytoy aya ti cabsatyo a lalaki nga inaudi a sinaoyo caniac? Ket kinunana, Caasiannaca coma ti Dios, anacco.

³⁰ Ket ni Jose maganatan; ta ti pusona natignay gapu iti cabsatna: ket sinapulna ti yan a pagsangitanna; ket simrec iti siledna, ket nagsangit sadiay.

³¹ Ket nagdiram-os ket rimmuar; ket nagibtor ket kinunana, Mangicabilcayo iti canen.

³² Ket incabilda ti canenna a maymaysa, ken ti canenda nga is-isuda, ket ti canen dagiti Egipcios, a cadduana a mangan, nailasinda met: ta dagiti Egipcios dida mabalin ti makipangan cadagiti Hebreos; ta daytoy rimon cadagiti Egipcios.

³³ Ket nagtugawda iti sangoananna, ti inauna a cas iti calintegan ti pannacayanacna, ket ti inaudi a cas iti kinaubingna: ket dagiti lallaki nagsidsiddaawda ti maysa ken maysa cadacuada.

³⁴ Ket isu nangala ket nangibaon iti canenda nga aggapu iti saclangna: ngem ti biang ni Benjamin incacaaduna iti maminlima ngem ti bagi ti uray siasino cadacuada. Ket imminumda, ket nakipagragsacda kencuana.