Genesis 40 - Ti Biblia (1973)

Ibucsilan ni Jose dagiti Darepdep dagiti cadduana a Balud.

¹ Ket naaramid nga, iti calpasan dagitoy, nacabasolda ti mamacpacan ti ari sadi Egipto ken ti pagtintinapayenna a maicaniwas ken apoda nga ari ti Egipto.

² Ket ni Faraon nacapungtot cadagiti dua nga oficialna, nga isuda ti cangatoan cadagiti mamacpacan ken ti pangoloen dagiti agtintinapay.

³ Ket pinabaludna ida ti balay ti capitan dagiti agbanbantay, iti pagbaludan, isu nga yan ni Jose a nabalud idi.

⁴ Ket ti capitan dagiti agbanbantay intalecna ida ken Jose, ket inserservianna ida: ket nagtaengda iti sumagmamano nga al-aldaw iti pagbaludan.

⁵ Ket nagtagtagainepda a dua iti maymaysa a rabii, ti tumunggal maysa adda idi tagtagainepna, ti tumunggal maysa cas mayannurot iti caulogan ti parmatana, ti mamacpacan ken ti agtintinapay ti ari sadi Egipto, nga addada idi a sibabalud iti pagbaludan.

⁶ Ket ni Jose immay cadacuada iti bigat, ket kinitana ida, ket, adtoy, nalidayda idi.

⁷ Ket inintuudna cadagiti ad-adipen ni Faraon a cadduana iti pagbaludan iti balay ni apona, a kinunana, Apayapay naliday ita dagiti ruprupayo.

⁸ Ket kinunada kencuana, Nagtagtagainepcami iti parparmata, ket awan ti macaipalawag. Ket ni Jose kinunana cadacuada, Saan aya a dagiti panangipalawag addada iti biang ti Dios? saoenyo caniac, dawatec cadacayo.

⁹ Ket ti pangoloen dagiti mamacpacan sinaritana ti tagtagainepna ken Jose, ket kinunana kencuana, Iti tagainepco, adtoy, adda idi ti sangapuon nga uvas iti sangoc;

¹⁰ Ket iti dayta nga uvas adda idi tallo a sangsanga: ket cas nagsaringitda ket rimmuar dagiti sabsabongna; ket dagiti raraayna nagbungada cadagiti naloom nga uvas:

¹¹ Ket ti vaso ni Faraon adda idi iti imac; ket innalac dagiti uvas, ket pinespesco ida iti vaso ni Faraon, ket intedco ti vaso iti ima ni Faraon.

¹² Ket ni Jose kinunana kencuana, Daytoy ti cayuloganna: dagiti tallo a sangsanga talloda nga al-aldaw;

¹³ Iti uneg dagiti tallo nga al-aldaw, ni Faraon itan-ocnanto ti olom, ket isublinacanto iti saadmo: yawatmonto ti copa ni Faraon iti imana, cas ar-aramidem idi mamacpacanca kencuana.

¹⁴ Ngem laglagipennac intono nagasat ti casasaadmo, ket dawatec a caasiannac, ket isasaonac ken Faraon, ket aonennac cadi itoy a balay:

¹⁵ Ta iti pudno, tinacawdac sadiay daga dagiti Hebreo: ket awan met ditoy ti inaramidco a nangicabilanda caniac iti pagbaludan.

¹⁶ Idi ti pangoloen dagiti agtintinapay nakitana a nasayaat ti pannacaibucsilna, kinunana ken Jose, Siac addaac met idi iti tagtagainepco, ket adtoy, tallo a lablabba ti tinapay a napudaw addada idi iti rabaw ti oloc:

¹⁷ Ket iti daydi labba a makinngato adda idi amin a cancanen a naluto a maipaay ken Faraon: ket dagiti tumatayab kinnanda ida iti labba nga adda idi iti oloc.

¹⁸ Ket ni Jose simmungbat, ket kinunana, Daytoy ti cababagasna: dagiti tallo a lablabba isuda dagiti tallo nga al-aldaw;

¹⁹ Iti uneg dagiti tallo nga al-aldaw ni Faraon paputulannacanto ket paibitinnacanto iti maysa a cayo; ket dagiti tumatayab ibusendanto kenca ti lasagmo.

²⁰ Ket naaramid nga, iti maicatlo nga aldaw, isu ti aldaw a nacayanacan ni Faraon, nagday a cadagiti isu-amin nga ad-adipenna: ket pinaalana ti pangoloen dagiti mamacpacan ken ti pangoloen dagiti agtintinapay cadagiti ad-adipenna.

²¹ Ket insublina ti pangoloen dagiti mamacpacan iti annongna; ket inyawatna ti vaso iti ima ni Faraon:

²² Ngem pinabitayna ti pangoloen dagiti agtintinapay: cas pinalawag idi ni Jose cadacuada.

²³ Nupay casta ti mamacpacan a pangoloen saanna a nalagipen ni Jose, ngem nalipatanna.