Genesis 4 - Ti Biblia (1973)

Da Cain ken Abel. Ti Pannacapapatay ni Abel. Ti Pannacadusa ni Cain. Putputot ni Cain. Ti pannacayanac ni Set.

¹ Ket ti lalaki dinennaanna ni asawana nga Eva; ket nagsicug, ket inyanacna ni Cain, ket kinunana, Nagun-odco ti maysa a lalaki gapu ken Jehova.

² Ket inyanacna manen ni cabsatna nga Abel. Ket nagaywan ni Abel cadagiti carcarnero, ngem ni Cain nagtaltalon.

³ Ket naaramid iti panaglasat dagiti pannawen a ni Cain nangala iti bunga ti daga nga indatonna ken Jehova.

⁴ Ket ni Abel, nangala met cadagiti inauna nga anac cadagiti pangenna ken dagiti nalucmeg. Ket ni Jehova pinatpategna ni Abel ken ti datonna.

⁵ Ngem ni Cain ken ti datonna dina incancano. Ket nagpungtot unay ni Cain, ket nagliday ti rupana.

⁶ Ket ni Jehova kinunana ken Cain, Apayapay nga agpungpungtotca? ket apayapay narupanget ta rupam?

⁷ No naimbag ti aramidem apay a dinto macaparagsac? ket no dica agaramid iti naimbag, ti basol cumleb iti ruangan; ket ti calicagumanna sica; ngem sica gundawayam coma.

⁸ Ket kinasao ni Cain ni cabsatna nga Abel. Ket naaramid nga, idi addada iti away, ni Cain dinuclusna ni Abel a cabsatna, ket pinatayna.

⁹ Ket ni Jehova kinunana ken Cain, Sadino ti yan ni Abel, daytay cabsatmo? Ket kinunana, Diac ammo: siac aya ti agaywan ken cabsatco?

¹⁰ Ket kinunana, Ania ti inaramidmo? Ti timec ti dara ni cabsatmo awagannac manipud iti daga.

¹¹ Ita ngarud, nailunodca iti daga, a nanglucat iti ngiwatna tapno awatenna ti dara ni cabsatmo ita imam;

¹² Intono talonem ti daga, dinanto sublien nga itden kenca ti bilegna; walang-walangcanto ken agpagpagnacanto iti daga.

¹³ Ket kinuna ni Cain ken Jehova, Dacdackel ti dusac ngem ti mabalinco nga awiten.

¹⁴ Adtoy, pinagtalawnac ita nga aldaw iti rabaw ti daga; ket iti sangoanam aglemmengacto; agwalangwalangacto ken agpagnaacto iti daga; ket maaramidto nga uray siasino a macasarac caniac, patayennacto.

¹⁵ Ket kinuna ni Jehova kencuana, Gapu ta casta siasinoman a mamapatay ken Cain, maminpitonto a maibales kencuana. Ket ni Jehova incabilna ti maysa a pagilasinan ken Cain, di la ket ta patayen ti uray siasino a macasarac kencuana.

¹⁶ Ket nagpanaw ni Cain iti sango ni Jehova, ket nagnaed iti daga a Nod, iti daya ti Eden.

¹⁷ Ket ni Cain dinennaanna ni asawana; ket nagsicug ket inyanacna ni Henoc: ket namangon iti maysa a ili, ket impanaganna iti ili ti nagan ti anacna a Henoc.

¹⁸ Ket naputot ken Henoc ni Irad: ket ni Irad pinutotna ni Maviael; ket ni Maviael pinutotna ni Matusael; ket ni Matusael pinutotna ni Lamec.

¹⁹ Ket ni Lamec nangala ti dua nga asawana: ti nagan ti maysa Ada, ket ti nagan ti sabali Sella.

²⁰ Ket inyanac ni Ada ni Jabel, isu nga ama idi dagiti agtaeng iti sapsapaw, ken dagiti adda an-animalda.

²¹ Ket ti nagan daydi cabsatna a lalaki Jubal, isu nga agtoctocar iti harpa ken iti flauta.

²² Ket ni Sella inyanacna met ni Tubal-cain nga agpanpanday iti amin a natadem a suer ken landoc: ket ti babai a cabsat ni Tubal-cain ni Naama.

²³ Ket kinuna ni Lamec cadagiti asawana: Ada ken Sella, denggenyo ti timecco; Dacayo nga assawa ni Lamec, timudenyo ti saoc: Ta pinatayco ti maysa a tao gaput ta sinugatnac, Ken ti maysa a baro ta minalonac:

²⁴ No maminpitonto a mabales ni Cain, Pudno a ni Lamec maminpitopulo a pito.

²⁵ Ket dinennaan manen ni Adan ni asawana; ket inyanacna ti maysa a lalaki, ket pinanagananna iti Set: Ta, kinunana, ti Dios iniccannac iti sabali a putot a sucat ni Abel; ta daytoy pinatay ni Cain.

²⁶ Ket ni Set, casta met a naputot kencuana ti maysa a lalaki ket pinanagananna ti Enos. Daytoy ti nangrugian dagiti tattao iti panangawawagda ti nagan ni Jehova.