Genesis 39 - Ti Biblia (1973)

Ni Jose Mayordomo ni Potifar. Ni Jose ken ti Asawa ni Potifar. Nabalud ni Jose.

¹ Ket ni Jose naisalog idiay Egipto; ket isu ginatang ni Potifar, maysa nga oficial ni Faraon, a pangoloen dagiti agbanbantay, lalaki nga Egipciano, iti ima dagiti Ismaelitas, a nangipan kencuana sadiay.

² Ket ni Jehova siaadda idi ken Jose, ket lalaki a nagasat idi; ket adda idi iti balay ni apona nga Egipciano.

³ Ket nadlaw ni apona a ni Jehova adda idi kencuana, ken amin nga aramidenna pinagasat ni Jehova iti imana.

⁴ Ket ni Jose nacasarac ti parabur iti imatagna, ket nagannong kencuana: ket binalinna a pangoloen iti balayna, ket inyawatna iti biangna amin dagiti adda kencuana.

⁵ Ket naaramid a nanipud idin a pinangpaaywanna kencuana iti balayna, ken dagiti amin a cucuana, binendicionan ni Jehova ti balay ti Egipciano a maipuon ken Jose; ket ti bendicion ni Jehova naisacnap cadagiti amin nga adda kencuana, iti balay ken iti away.

⁶ Ket intalecna amin nga adda kencuana iti ima ni Jose; ket awan ti binibianganna nga adda kencuana, no di la ti taraon a kinnanna. Ket ni Jose idi nangayed a lalaki, ken nacaay-ayo a makita.

⁷ Ket naaramid iti calpasan dagitoy, a ti asawa ti apona imperrengna dagiti matana ken Jose; ket kinunana, Caiddaennac.

⁸ Ngem madi, ket kinunana iti asawa ni apona, Adtoy, ni apoc dina ammo ti adda caniac iti balay, ket intalecna ti amin a cucuana iti imac:

⁹ Isu saan a dacdackel itoy a balay ngem siac; ket awan sabali a dina intalec caniac no di la sica, a gapu ta sica ti asawana: casano ngarud ti panangaramidco itoy naindaclan a kinadakes, ken macabasolac iti Dios?

¹⁰ Ket naaramid nga, iti pannakisasaona ken Jose iti inaldaw-aldaw, saanna nga impangpangag ti pannakicaiddana kencuana, wenno di nagintec kencuana.

¹¹ Ket naaramid, cadagidiay nga aldaw, a simrec iti balay tapno aramidenna ti annongna; ket awan cadagiti lallaki ti balay ti adda idi iti unegna.

¹² Ket iniggaman ti babai ti pagananay ni Jose, ket kinunana, Caiddaennac cadi; ket nabatina ti pagananayna iti imana, ket nagtalaw, ket rimmuar.

¹³ Ket naaramid nga, idi nakitana nga nabatina ti pagananayna iti imana, ket nagtaray a rimmuar.

¹⁴ Immawag ti babai cadagiti lallaki, ket nakisao cadacuada, a kinunana, Kitaenyo, inyegna cadatayo ti maysa nga Hebreo, tapno mangrabrabac cadatayo: immay caniac makicaidda, ket nagpuccawac iti natbag:

¹⁵ Ket naaramid nga, idi nangngegna nga impigsac ti timecco ket nagickisac, nabatina iti ayanco ti pagananayna, ket nagtalaw, ket rimmuar.

¹⁶ Ket indulinna ti pagananayna agingga iti di simmangpet ti apona iti balayna.

¹⁷ Ket nagsao kencuana cadagitoy cacastoy a sasao a kinunana, Daydi adipen nga Hebreo, nga inyegmo cadata, immay caniac tapno mangrabrabac caniac:

¹⁸ Ket naaramid, idi nga impegsac ti temecco, ket nagpuccawac, nabatina ti pagananayna iti ayanco, ket nagtaray a rimmuar.

¹⁹ Ket naaramid nga, idi dinengngeg ti apona ti sinasao ti asawana, a kinunana, Castoy ti pinangaramid ti adipenmo caniac; ti pungtotna bimmara.

²⁰ Ket innala ti apona ni Jose, ket incabilna iti pagbaludan, isu ti disso a pacaibaludan dagiti balbalud ti ari: ket nagtaeng sadiay iti pagbaludan.

²¹ Ngem ni Jehova siaadda idi ken Jose, ket kinaasianna, ket inaramidna a nacaay-ayo cadagiti mata ti agaywan ti pagbaludan.

²² Ket ti agaywan ti pagbaludan intalecna iti ima ni Jose amin dagiti balbalud nga adda ti pagbaludan; ket amin nga aramidenda sadiay, isu ti agaramid idi.

²³ Awan ti uray ania a tamingan ti agaywan ti pagbaludan, gapu ta ni Jehova adda idi kencuana; ket ti inaramidna pinagasat ni Jehova.