Genesis 38 - Ti Biblia (1973)

Dagiti Annac ni Juda nga ti inada ni Sua. Dagiti Annacna nga inyanac ni Tamar.

¹ Ket naaramid iti daydi a tiempo, a simmalog ni Juda a naggapu cadagiti cacabsatna ket napan iti maysa a lalaki nga Adullamita nga agnagan idi ti Hira.

² Ket ni Juda nacakita sadiay iti maysa nga anac a babai ti maysa a lalaki a taga Canaan, a nagnagan iti Sua; ket innalana, ket simrec kencuana.

³ Ket nagsicug, ket naganac iti maysa a lalaki, ket ni amana ninaganna iti Er.

⁴ Ket nagsicug manen, ket naganac iti maysa a lalaki; ket ninaganna nga Onan.

⁵ Ket sa naganac iti lalaki, ket ninaganna iti Sela: ket adda idi idiay Chezib, idi inyanacna.

⁶ Ket ni Juda nangala iti babai nga inyasawana iti inauna nga anacna a lalaki, a ni Er, ket nagnagan iti Tamar.

⁷ Ket ni Er nga inauna nga anac ni Juda dakes cadagiti mata ni Jehova; ket isu pinatay ni Jehova.

⁸ Ket ni Juda kinunana ken Onan, Sumrecca iti asawa ni cabsatmo tapno aramidem kencuana ti annong ti cabsat ti asawa a lalaki, ket parnuayem ti putot ken cabsatmo a lalaki.

⁹ Ket ni Onan inammona a ti putot saan coma a maipaay kencuana; ket naaramid nga idi dinennaanna ti asawa ti cabsatna a lalaki, isu imbocbocna iti daga, di la ket ta macaited iti maipaanac ken cabsatna.

¹⁰ Ket dakes idi iti imatang ni Jehova ti inaramidna: ket pinatayna met.

¹¹ Ni Juda kinunana ngarud ken Tamar a manugangna, Agyanca a balo idiay balay ni amam, agingga iti di dumackel ni Sela nga anacco a lalaki; ta kinunana, Ta nalabit saanto a matay, a cas dagiti cacabsatna a lalaki. Ket napan ni Tamar ket nagtaeng iti balay ni amana.

¹² Ket napalabas dagiti adu nga al-aldaw, ket natay ti babai nga anac ni Sua, nga asawa ni Juda; ket ni Juda naliwliwa, ket simmang-at a nangkita cadagiti mangpukis cadagiti carcarnerona, isu ken ni Hira a gayyemna nga Adullamita, idiay Timnath.

¹³ Ket nayammo ken Tamar, a cunada, Adtoy, sumang-at ni catugangam a lalaki a mamukis cadagiti carcarnerona idiay Timnath.

¹⁴ Ket inucsobna ti cawesna a balo, ket nagdalungdung, ket inabbonganna ti bagina, ket nagtugaw iti ruangan ti Enaim, a sibay ti dalan nga agturong idiay Timnath; ta makitana idi a dimmackelen ni Sela, ket dina met nayasawa kencuana.

¹⁵ Idi nakita ni Juda, impagarupna a babai idi a nagaramugam; ta inabbangonna idi ti rupana.

¹⁶ Ket simmiasi a napan kencuana iti sibay ti dalan, ket kinunana, Ala, dawatec kenca, ipalubosmo a sumrecac kenca: ta dina inammo nga isu idi ti manugangna a babai. Ket kinunana, Ania ti itdemto tapno sumrecca caniac?

¹⁷ Ket kinunana, Payegancanto cadagiti pangen ti maysa nga urbon a calding. Ket kinunana, Itedmonto caniac ti pacakitaan, agingga iti dica payeg?

¹⁸ Ket kinunana, Ania ti pacakitaan nga itdecto kenca? Ket kinunana, Dayta singsingmo ken ta barikesmo, ken ta sarucodmo nga adda iti imam. Ket intedna ida kencuana, ket simrec kencuana, ket nagsicug gapu kencuana.

¹⁹ Ket timmacder ti babai, ket nagawid, ket iniccatna ti dalungdungna, ket incapetna dagiti cawcawes ti kinabalona.

²⁰ Ket ni Juda impaw-itna ti urbon a calding iti ima ti gayyemna nga Adullamita, tapno alaenna ti pacakitaan iti ima daydi babai: ngem dina nasaracan.

²¹ Idin nagintuud cadagiti lallaki idiay disso ti babai, a cunana, Sadino ti ayan daytay balangcantis, nga adda idi idiay Enaim iti sibay ti dalan? Ket kinunada, Awan nagyan ditoy a balangcantis.

²² Ket nagsubli ken Juda ket kinunana, Diac nasaracan; ket casta met dagiti lallaki sadiay a disso kinunada, Awan nagyan ditoy a balangcantis.

²³ Ket ni Juda kinunana, Alaenna coma a maipaay kencuana, di la ket ta maibabaincami: adtoy, impaw-itco daytoy nga urbon, ket dica nasaracan.

²⁴ Ket naaramid nga idi calpasan ti tallo a bulan, nayammo ken Juda a kinunada, Ni Tamar a manugangmo a babai nagbalangcantis; ket maysa pay, adtoy, masicug iti panagbalangcantis. Ket kinuna ni Juda, Alaenyo, ket mapuuran coma.

²⁵ Idi naisaclang, pinaibagana ken catuganganna a lalaki, a kinunana, Gapu iti lalaki a makincucua cadagitoy isu ti nagsicugac: ket kinunana, Dawatec kenca, a bigbigem no asino ti akincucua cadagitoy, ti singsing, ti barikes, ken ti sarucod.

²⁶ Ket ni Juda binigbigna a cucuana ida ket kinunana, Isu nalinlinteg ngem siac, gapu ta diac inted ken Sela nga anacco a lalaki. Ket idin, saanna a dininnaanen.

²⁷ Ket naaramid nga, idi panagpasngayna, adtoy, ta singin ti adda idi iti tianna.

²⁸ Ket naaramid, idi nagpasngay, ti maysa inruarna ti imana: ket inawat ti mangngilot ket binedbedanna di imana iti sagut a nalabaga, ket kinunana, Daytoy ti immuna a rimmuar.

²⁹ Ket naaramid nga, idi inyunegna ti imana, adtoy, ti cabsatna rimmuar: ket kinuna di mangngilot, Apayapay inaramidmo ti maysa a panangdadael kenca met laeng? iti casta ninaganna iti Phares.

³⁰ Ket iti calpasanna, rimmuar ti cabsatna, nga adda ti sagut a nalabaga iti imana: ket ninaganna iti Zara.