Genesis 37 - Ti Biblia (1973)

Idumduma ni Jacob ni Jose. Dagiti Tagtagainep ni Jose. Maibaon ni Jose sadi Sichem. Ilaco dagiti cacabsatna ket maipan sadi Egipto. Ti Panagdung-aw ni Jacob.

¹ Ket ni Jacob nagnaed iti daga a nagyanan ni amana, iti daga a Canaan.

² Dagitoy dagiti caputotan ni Jacob. Ni Jose, idi nagtawen iti sangapulo ket pito, agipapaarab cadagiti an-animal agraman dagiti cacabsatna; isu maysa a baro idi a cadua dagiti annac a lallaki ni Bilha, ken annac a lallaki ni Zilpa, nga asawa ni amana: ket ni Jose idandanonna idi ken amada ti dakes a panagcucuada.

³ Ket ni Israel ay-ayatenna idi ni Jose nga ipangpangrona ngem cadagiti isu-amin nga annacna, gapu ta nayanac iti kinalacayna: ket inyaramidanna iti maysa a bado a naggarit iti nadumaduma a kita.

⁴ Ket dagiti cacabsatna nadlawda a dacdackel ti panagayat kencuana ni amada ngem cadagiti amin a cacabsatna; ket carururudda idi, ket dida mabalin a casao iti naan-anat.

⁵ Ket ni Jose nagdarepdep iti maysa a tagainep, ket insaritana cadagiti cacabsatna; ket isuda ad-adda manen ti rurudda kencuana.

⁶ Ket kinunana cadacuada, dawatec Denggenyo, daytoy tagainep a dinarepdepco:

⁷ Ta, adtoy agbetbettectayo idi iti pagtalonan, ket, adtoy, ti binettecco bimmangon, ket casta met nagtindec; ket, adtoy, dagiti binettecyo immayda iti lawlaw, ket nagtamedda iti binettecco.

⁸ Ket kinunada dagiti cacabsatna, kencuana, Pudno aya nga agaricanto cadacami? wenno pudno nga agturaycanto cadacami? Ket ad-adda manen ti rurudda kencuana gapu cadagiti tagtagainepna ken cadagiti sasaona.

⁹ Ket nagtagtagainep man iti sabalin, ket sinaona cadagiti cacabsatna a kinunana, Adtoy, ti sabali manen a tinagainepco; ket, adtoy, ti init ken ti bulan ken sangapulo ket maysa a bitbitwen nagtamedda caniac.

¹⁰ Ket sinaritana ken amana ken cadagiti cacabsatna; ket ni amana tinubngarna, ket kinunana kencuana, Ania daytoy a tagainep a dinarepdepmo? Pudno nga umaycamto agrucnoy kenca iti daga, siac ken ni inam ken dagiti cacabsatmo?

¹¹ Ket dagiti cacabsatna inapalanda; ngem ni amana sinalimetmetanna iti nakemna daytoy a nasao.

¹² Ket dagiti cacabsatna napanda nagpaarab cadagiti an-animal ni amada sadiay Siquem.

¹³ Ket ni Israel kinunana ken Jose, Saan aya a dagiti cacabsatmo addada nga agpapaarab iti pangen sadi Siquem? umayca, ket ibaoncanto cadacuada. Ket isu simmungbat kencuana, Adtoyac.

¹⁴ Ket kinunana kencuana, Inca ita, kitaem no naimbag ti casasaad dagiti cacabsatmo, ken no naimbag ti pangen, ket yegmo caniac ti damag. Ket pinalubosanna idiay lobong ti Hebron, ket nacadanon sadiay Siquem.

¹⁵ Ket ti maysa a tao nasaracanna, ket adtoy, magmagna a mayaw-awan iti away: ket ti lalaki inintuuadna a kinunana, Ania ti sapsapulem?

¹⁶ Ket isu simmungbat, Sapsapulec dagiti cacabsatco a lallaki: ibagam, dawatec kenca, sadino ti yan a pagpaarabanda iti pangen.

¹⁷ Ket ti lalaki kinunana, Nagpanawdan ditoy; ta nangngegco a sinaoda, Intayo sadiay Dothan. Idin ni Jose napan simmurot cadagiti cacabsatna, ket natumpunganna ida idiay Dothan.

¹⁸ Ket nakitada iti adayu, ket idi di pay immasideg cadacuada, nagpanunotda ti maibusor kencuana a panangpatayda.

¹⁹ Ket kinunada ti maysa ken maysa, Adtoy, sumungad ti managtagtagainep.

²⁰ Ita umaycayo ngarud, ket papatayentayo, ket itappuactayo iti maysa cadagiti bitbito, ket cunatayto, Inalun-un ti dakes nga animal: ket kitaentayto no ania ti maaramiddanto dagiti tagtagainepna.

²¹ Ket ni Ruben nangngegna daytoy, ket inispalna iti imada, ket kinunana, Ditayo cadi papatayen.

²² Ket ni Ruben kinunana cadacuada. Dicayo mangibucbuc ti dara; itappuacyo iti daytoy a bobon nga adda ti let-ang, ngem dicayo im-imaan; tapno mailisina cadagiti im-imada tapno mapagsublina ken amana.

²³ Ket naaramid nga, idi nacagteng ni Jose cadagiti cacabsatna, isuda linabusanda ni Jose iti badona, ti bado nga adu a kita ti culina a sicacapet idi kencuana;

²⁴ Ket innalada ket intappuacda iti bobon: ket ti bobon natianan, awan danum iti unegna.

²⁵ Ket nagtugawda a nangan iti tinapay: ket intangadda dagiti matmatada ket kinitada, ket, adtoy, sumungad ti maysa a sangcacuyog dagiti Ismaelitas nga aggapu idiay Galaad, ket dagiti camcamelloda inawitda dagiti especias ken balsamo ken mirra, ket ipanda idi sadi Egipto.

²⁶ Ket ni Juda kinunana cadagiti cacabsatna, Ania ti maalatayo no papatayentayo ni cabsattayo ken ilemmengtayo ti darana?

²⁷ Umaycayo ket ilacotayo cadagiti Ismaelitas, ket ditay coma im-imaan; ta isu cabsattayo a lalaki, ti lasagtayo. Ket dagiti cacabsatna inanamunganda.

²⁸ Ket dagiti taga Midian nga agtagtagilaco naglabasda, ket inaonda nga insang-at ni Jose iti bito, ket inlacoda cadagiti Ismaelitas iti duapulo a bagi ti pirac. Ket insangpetda ni Jose sadi Egipto.

²⁹ Ket ni Ruben nagsubli iti bito; ket, adtoy awanen ni Jose iti unegna; ket rinay-abna dagiti pagananayna.

³⁰ Ket nagsubli cadagiti cacabsatna, ket kinunana, Ti ubing awanen; ket siac, sadino ti papanacto?

³¹ Ket innalada ti bado ni Jose, ket nangrucrucda ti maysa a calding a lalaki, ket impaslepda ti bado iti dara;

³² Ket impaw-itda ti bado a naggarit iti adu a kita, ket impanda ken amada, ket kinunada, Daytoy nasaracanmi: bigbigem ita no isu ti bado ni anacmo wenno saan.

³³ Ket isu nailasinna, ket kinunana, Isu ti bado ni anacco; ti maysa a dakes nga animal inalun-unna; awan ti duadua a narangcayen ni Jose.

³⁴ Ket ni Jacob rinayabna dagiti pagananayna, ket incapetna cadagiti luppona ti nakersang a lupot, ket dinung-awanna ti anacna cadagiti adu nga al-aldaw.

³⁵ Ket timmacderda amin dagiti annacna a lallaki ken babbai a nangliwliwa kencuana; ngem isu dina kinayat ti nagliwliwa; ket kinunana, Ta bumabaacto a sililiday, ken Tanem a mapan ken anacco. Ket ti amana sinangitanna.

³⁶ Ket dagiti taga Madian inlacoda idiay Egipto ken Potifar, maysa nga oficial ni Faraon, a capitan dagiti agbanbantay.