Genesis 35 - Ti Biblia (1973)

Ni Jacob ibellengna dagiti Ladladawan ket mapan idiay Bethel. Ti Dios bendicionanna ni Jacob. Ti Pannacayanac ni Benjamin. Ti Ipapatay ni Raquel. Dagiti Annac a lallaki ni Jacob. Ti Ipapatay ni Isaac.

¹ Ket ti Dios kinunana ken Jacob, Tumacderca, inca idiay Bethel, ket agnaedca sadiay: ket mangaramidca sadiay ti maysa nga altar a maipaay iti Dios, a nagparang kenca idi nagtalawca ken cabsatmo nga Esau.

² Idin ni Jacob kinunana cadagiti cabbalayna, ken cadagiti amin a nakipagyan kencuana, Iwagsacyo dagiti didiosen a sabsabali cadacayo, ket agdaluscayo, ket sucatanyo dagiti pagananayyo:

³ Ket tumacdertayo, ket sumang-attayo idiay Bethel; ket sadiay agaramidacto iti altar a maipaay iti Dios, a simmungbat caniac idi aldaw ti pagelco, ket kinadcaduaannac iti dalan a nagnagnaac.

⁴ Ket inyawatda ken Jacob dagiti didiosen a sabsabali nga addada idi iti biangda, ken dagiti ar-aritos nga addada cadagiti laplapayagda idi; ket ni Jacob inlemmengna ida iti siroc ti cayo a lugo nga adda iti asideg ti Siquem.

⁵ Ket nagnada: ket ti panagamac iti Dios adda idi cadagiti il-ili iti caparangetda, ket saanda a simmurot cadagiti annac a lallaki ni Jacob.

⁶ Ket dimteng ni Jacob idiay Luza, nga adda iti daga a Canaan (daytoy isu ti Bethel), isu ken amin a tattao nga addada idi kencuana.

⁷ Ket namangon sadiay ti maysa nga altar, ket ninaganna daydi a disso ti El-bethel; ta idiay ti nagparangan ti Dios, kencuana idi a tinalawanna ni cabsatna.

⁸ Ket natay ni Debora nga yaya ni Rebeca, ket naitabon iti ruar ti Bethel iti siroc ti lugo: ket impanaganna ti Allon-bacuth.

⁹ Ket ti Dios nagparang manen ken Jacob, idi naggapu idiay Padan-aram, ket binendicionanna.

¹⁰ Ket ti Dios kinunana kencuana, Ti naganmo Jacob: saanto a matawaganen ti naganmo a Jacob, ngem Israel ti naganmonton: ket pinanagananna iti Israel.

¹¹ Ket ti Dios kinunana kencuana, Siac ti Dios a Mannacabalin amin: agbungaca ket umaduca; ti maysa a nacion ken maysa bunggoy dagiti nasnacion agtauddanto kenca, ket ar-ari agtauddanto iti lasagmo;

¹² Ket ti daga nga intedco ken Abraham ken Isaac, itdecto kenca, ken cadagiti putotmo iti calpasam itdecto ti daga.

¹³ Ket ti Dios immuli manipud iti disso a nakisaoanna kencuana.

¹⁴ Ket ni Jacob namatacder iti maysa a teddec iti disso a nakisaoanna kencuana, maysa a teddec a bato: ket inbuyatna iti rabawna ti maysa a daton nga inumen, ket inbuyatna iti rabawna ti lana.

¹⁵ Ket pinanaganan ni Jacob daydi a disso, a nakisaoan ti Dios kencuana, iti Bethel.

¹⁶ Ket pimmanawda sadi Bethel; ket nawatiwat pay bassit idi ti Efrata ket ni Raquel nagpasical ket nagparigat iti panagpasngayna.

¹⁷ Ket naaramid nga, idi nagparigat iti panagpasngay, kinuna ti mangngilot kencuana, Dica agbuteng; ta ita addanto kenca ti maysa pay nga anac a lalaki.

¹⁸ Ket naaramid nga, idi nagwayaway ti cararuana (ta natay), pinanagananna iti Ben-oni: ngem ti amana impanaganna kencuana ti Benjamin.

¹⁹ Ket ni Raquel natay ket naitabon iti dalan sadiay Efrata (daytoy isu ti Bethlehem).

²⁰ Ket ni Jacob namatacder iti maysa a teddec iti rabaw ti tanemna: daytoy ti teddec ti tanem ni Raquel agpapan ita.

²¹ Ket ni Israel pimmanaw ket inucradna ti sapawna iti sabali a bangir ti torre ti Eder.

²² Ket naaramid a, bayat ti panagnaed ni Israel sadiay a daga, ni Ruben napan ket makiidda ken Bilha a cabbalay ni amana: ket naammoan ni Israel. Dagiti annac a lallaki ni Jacob sangapuloda ket dua idi:—

²³ Dagiti annac a lallaki ni Lea: ni Ruben, nga inauna nga anac ni Jacob, ken Simeon, ken Levi, ken Juda, ken Issachar, ken ni Zabulon;

²⁴ Dagiti annac a lallaki ni Raquel: ni Jose ken ni Benjamin;

²⁵ Ket dagiti annac a lallaki ni Bilha nga adipen ni Raquel: ni Dan ken ni Nephtali:

²⁶ Ket dagiti annac a lallaki ni Zilpa nga adipen ni Lea: ni Gad ken ni Aser: dagitoy dagiti annac a lallaki ni Jacob, a nayanacda kencuana idiay Padan-aram.

²⁷ Ket ni Jacob immay ken Isaac nga amana idiay Mamre, idiay ili nga Arbee (isu ti Hebron), a nagnaedan da Abraham ken ni Isaac.

²⁸ Ket dagiti al-aldaw ni Isaac sangagasut ken walopulo a tawen.

²⁹ Ket inyawat ni Isaac ti cararua, ket natay, ket naitipon iti ayan dagiti capuonanna, lacay ket napnec iti al-aldaw: ket ni Esau ken ni Jacob nga annacna a lallaki imponponda.