Genesis 33 - Ti Biblia (1973)

Sumabet ni Jacob ken Esau. Mapan idiay Siquem.

¹ Ket ni Jacob intangadna dagiti matana, ket kimmita, ket, adtoy, sumungad ni Esau, agraman dagiti uppat a gasut a lallaki. Ket inwarasna dagiti ubbing cada Lea, ken Raquel, ken cadagiti dua nga ad-adipen a babbai.

² Ket inyunana dagiti ad-adipen ken annacda, sa ni Lea ken dagiti annacna, ket da Raquel ken Jose dagiti naudi.

³ Ket isu met laeng linabasanna ida, ket iti naminpito nagrucnoy iti daga, agingga iti di nacaadani iti ayan ni cabsatna.

⁴ Ket ni Esau nagtaray a simmabat kencuana, ket inaracupna nga inapungol iti tengngedna, ket inagcanna: ket nagsangitda.

⁵ Ket intangadna dagiti matana, ket nakitana dagiti babbai ken dagiti ubbing; ket kinunana, Asinoda dagitoy nga addada kenca? Ket kinunana, Isuda dagiti annac nga inted ti Dios a siaasi itoy adipenmo.

⁶ Idin dagiti ad-adipen a babbai immasidegda, isuda ken dagiti annacda, ket nagtamedda.

⁷ Ket immasideg met ni Lea ken dagiti annacna, ket nagtamedda: iti calpasanna, immasideg ni Jose ken ni Raquel, ket nagtamedda.

⁸ Ket kinunana, Ania ti pangipaayam cadagitoy amin a bunggoy a nasaracac? Ket kinunana, Tapno matumpungac ti parabur cadagiti mata ni apoc.

⁹ Ket ni Esau kinunana, adda umanay caniac cabsatco; agservida coma la kenca dagiti cucuam.

¹⁰ Ket ni Jacob kinunana, Saan, dawatec kenca, no nasaracac ita ti parabur iti matam, awatem ngarud iti imac ti sagutco; yantangay nakitac ti rupam, a cas ti maysa a macakita iti rupa ti Dios, ket nacaay-ayoac kenca.

¹¹ Dawatec kenca, awatem, ti sagutco a maiyeg kenca; ta ti Dios kinaasiannac, ken gapu ta umanay ti adda caniac. Ket inrupirna ket inawatna.

¹² Ket kinunana, Magnata, ket intan coma, ket agyanacto iti sangoanam.

¹³ Ket kinunana ken Esau, Ni apoc ammona a dagiti ubbing naganusda, ket addada caniac dagiti ar-arban ken babassit a tagibianda: ket no ipagnada ida a nalabes iti maysa nga aldaw, mataydanto amin dagiti pangpangen.

¹⁴ Dawatec kenca ni apoc, aglasat coma nga umun-una ngem ti adipenna: ket siac agturongacto iti nainayad a tumontonos iti pannagna dagiti ubbing, agingga iti diac macadanon ken apoc idiay Seir.

¹⁵ Ket ni Esau kinunana, Ipaaymo nga ibatic kenca ita dagiti dadduma cadagiti tattao nga adda caniac. Ket kinunana, Ania ti pannacasapulna? macasaracac coma iti parabur cadagiti mata ni apoc.

¹⁶ Iti casta ni Esau nagsubli iti daydi nga aldaw iti dalanna a mapan idiay Seir.

¹⁷ Ket ni Jacob napan idiay Succoth, ket namangon idiay iti maysa a balay a maipaay kencuana, ken nagaramid cadagiti sapsapaw a maipaay cadagiti an-animalna: gapuna a managanan daydi a disso Succoth.

¹⁸ Ket ni Jacob dimmanon a sicacappia iti ili a Siquem, nga adda iti daga a Canaan, idi naggapu iti Padan-aram; ket nagsapaw iti sango ti ili.

¹⁹ Ket ginatangna ti sanganayon a daga, a namangonanna iti sapawna, iti ima dagiti annac ni Jamor nga ama ni Siquem, iti sangagasut a bagi ti pirac.

²⁰ Ket namangon sadiay iti maysa nga altar, ket impanaganna iti El-Elohe-Israel.