Genesis 32 - Ti Biblia (1973)

Ni Jacob sadiay Mahanaim. Ti Panagbuteng ni Jacob ken Esau. Ipaw-itna kencuana dagiti Sagsagut ken Paibaga. Makigubal iti maysa nga angel.

¹ Ket ni Jacob tinuloyna ti nagna, ket dagiti an-angel ti Dios simmabatda kencuana.

² Ket ni Jacob kinunana idi nakitana ida, Dagitoy isuda dagiti buybuyot ti Dios: ket pinanagananna ti disso iti Mahanaim.

³ Ket ni Jacob inbaonna nga umun-una dagiti mangyammo ken Esau a cabsatna idiay daga ti Seir, a talon ni Edom.

⁴ Ket binilinna ida a kinunana, Saoenyonto ken apoc nga Esau ti castoy: Castoy ti sinao ni adipenmo a Jacob, Nakicabbalayac ken Laban, ket nakipagtaengac agpapan ita:

⁵ Ket adda vacvacac ken as-asno, ken pangpangen, ken ad-adipen a lallaki ken ad-adipen a babbai: ket pinaibagac ken apoc, tapno masaracac ti parabur iti imatangmo.

⁶ Ket dagiti nangyammo nagsublida ken Jacob a kinunada, Nacagtengcami ken cabsatmo nga Esau, ngem umay metten sumabet kenca agraman cadagiti uppat a gasut a lallaki a cacuyogna.

⁷ Iti casta ni Jacob nagbuteng iti dackel unay ken nadanagan: ket bininglayna dagiti tattao nga adda kencuana, ken dagiti carcarnero, ken calcalding, ken dagiti vacvaca, ken dagiti camcamello, iti dua a bunggoy;

⁸ Ket kinunana, No umay ni Esau iti umuna a bunggoy, ket cabilenna, ti matda a bunggoy ngarud macaliclicto.

⁹ Ket ni Jacob kinunana, O Dios ni amac nga Abraham, ken Dios ni amac nga Isaac, O Jehova a nagcuna caniac, Agsublica idiay dagam ken cadagiti cacabagiam ket aramidecto kenca ti naimbag:

¹⁰ Diac maicari iti cabassitan cadagiti kinamanagayatmo ken iti amin a kinapudno nga inaramidmo nga impaay itoy adipenmo; ta iti la sarucodco ti kinaduac idi naglasatac ditoy Jordan; ket ita nagbalinac a dua a bunggoy.

¹¹ Dawatec kenca, isalacannac, iti ima ni cabsatco, iti ima ni Esau: ta cabutengco di la ket ta umay ket sugatennac, ken ti ina ken dagiti annac.

¹² Ket sica sinaom, Di bumurong a paimbagencanto, ket aramidecto a ti putotmo cas la darat ti baybay, a di mabilang gapu iti caadu.

¹³ Ket imyan sadiay iti daydi a rabii, ket nangala cadagiti cucuana ti sagut nga ipaayna ken cabsatna nga Esau:

¹⁴ Duagasut a calcalding a babbai ken duapulo a calcalding a lallaki, duagasut a carcarnero a babbai ken duapulo a carcarnero a lallaki,

¹⁵ Tallopulo a camcamello nga agpasuso agraman ur-urbonda, uppat a pulo a vacvaca a babbai ken sangapulo a vacvaca a lallaki, duapulo nga as-asno a babbai ken ur-urbon a sangapulo.

¹⁶ Ket inyawatna ida cadagiti im-ima dagiti ad-adipenna, tunggal pangen a nailasin, ket kinunana cadagiti ad-adipenna, Agbaliwcayo nga umun-una ngem siac, ket iccanyo ti pagbabaetan ti tumunggal pangen.

¹⁷ Ket imbilinna iti umuna, ket kinunana, No ni Esau a cabsatco masaracannaca, ket saludsudenna kenca, a cunana, Siasino ti akincua kenca? ket adino ti papanam? ket siasino ti akincucua cadagitoy nga adda iti sangoanam?

¹⁸ Iti casta cunamto, Cucua ni Jacob nga adipenmo; isu ti maysa a sagut nga impaw-itna ken apoc nga Esau: ket, adtoy, sumarsaruno met cadacami.

¹⁹ Ket binilinna met ti maicadua, casta met ti maicatlo, ken amin nga adda iti licud dagiti pangpangen a kinunana, Castoy met laeng ti saoenyonto ken Esau no masaracanyo;

²⁰ Ket cunayonto pay, Maysa pay, adtoy ti adipenmo a Jacob adda a sumasaruno cadacami. Ta kinunana, Pedpedecto ti pungtotna gapu iti sagut a mapan nga umun-una ngem siac, ket calpasanna makitacto ti rupana; nalabit isu awatennacto.

²¹ Ket ti sagut nagbaliw nga immun-una ngem isu: ket daydi a rabii isu met laeng imyan iti pacarso.

²² Ket bimmangon idi a rabii, ket innalana dagiti dua nga assawana, ken dagiti dua nga ad-adipenna a babbai ken dagiti sangapulo ket maysa nga annacna, ket naglasat iti pagbaliwan ti Jaboc.

²³ Ket innalana ida, ket impalasatna ida iti ayus, ket impalasatna dagiti adda a cucuana.

²⁴ Ket nabati ni Jacob a maymaysa; ket nakigubal kencuana ti maysa a lalaki agingga iti di nagbannawag.

²⁵ Ket idi nakitana a dina magawayan, sinagidna ti padingpadingna; ket ti padingpading ni Jacob nasulnot, idi nga makibalubal kencuana.

²⁶ Ket kinunana, palubosannacon, ta aglawagen. Ket kinunana, Saancanto a palubosan, no dinac bendicionan.

²⁷ Ket isu kinunana kencuana, Ania ti naganmo? Ket kinunana, Jacob.

²⁸ Ket isu kinunana, Saanto a matawagen ti naganmo a Jacob, no di ket Israel; gapu ta nakisuutca iti Dios ken kadagiti tattao, ket nangabacca.

²⁹ Idin ni Jacob sinaludsudna kencuana, ket kinunana, Dawatec kenca, Ipalawagmo caniac, ti naganmo. Ket isu kinunana, Apay a saludsudem ti naganco? Ket binendicionanna sadiay.

³⁰ Ket ni Jacob pinanagananna daydi a disso iti Fanuel: ta kinunana, Nakitac ti Dios iti rupanrupa, ket ti biagco naisalacan.

³¹ Ket nacalgaken ti init idi nagna idiay Peniel, ket impilpilayna ti padingpadingna.

³² Gapu itoy saan a mangan dagiti annac ti Israel iti piskel ti nagsimpaan ti padingpading, agpapan iti daytoy nga aldaw: ta sinagidna ti nagsimpaan ti padingpading ni Jacob iti piskel ti padingpadingna.