Genesis 31 - Ti Biblia (1973)

Ni Jacob pumanaw a sililimed a mapan idiay Canaan. Suroten ni Laban ket babalawenna. Ti Sungbat a sipupungtot ni Jacob. Ti Tulag sadiay Galaad.

¹ Ket ni Jacob nangngegna dagiti sasao dagiti annac a lallaki ni Laban, a cuncunada, ni Jacob innalana amin a cucua ni amatayo; ket dagiti cucua idi ni amatayo dagiti nacaigapuan daytoy a dayaw.

² Ket ni Jacob nakitana ti rupa ni Laban, ket, adtoy, saan nga agparang kencuana a cas idicua.

³ Ket ni Jehova kinunana ken Jacob, Agsublica iti daga dagiti dadackelmo, ken cadagiti cacabagiam; ket siaaddaacto kenca.

⁴ Ket ni Jacob nangbaon ket pinaayabanna da Raquel ken ni Lea idiay talon a yan dagiti pangpangenna,

⁵ Ket kinunana cadacuada, Siac makitac ti rupa ni amayo, nga isu saan nga agparang caniac a cas idicua; ngem ti Dios ni amac nakipagyan caniac.

⁶ Ket dacayo ammoyo nga iti amin a pigsac nagserviac ken amayo.

⁷ Ket ni amayo inulbodnac, ket iti naminpulo daras sinuctanna ti tangdanco; ngem ti Dios dina impalubos kencuana nga agaramid caniac iti dakes.

⁸ No isu kinunana a castoy, Dagiti labang isudanto ti gungonam; iti casta amin a pangpangen aganacda idi iti labang: ket no kinunana a castoy. Dagiti garitgaritan isudanto ti gungonam; iti casta aganac amin idi a pangpangen iti garitgaritan.

⁹ Iti castoy ti Dios iniccatna dagiti an-animal ni amayo, ket intedna ida caniac.

¹⁰ Ket naaramid nga iti tiempo ti panagsicug dagiti an-animal, intangadco dagiti matac, ket nakitac iti parmata, ket adtoy, nakitac a dagiti lallaki, kinalay-atda dagiti babbai, garitgaritanda, labang, ken turicturican idi.

¹¹ Ket ti angel ti Dios kinunana caniac iti tagainep, Jacob: ket kinunac, Adtoyac.

¹² Ket kinunana, Itangadmo ita dagiti matam, ket kitaem: amin dagiti lallaki a cumalay-at cadagiti babbai isuda garitgaritan, labang, ken turicturicanda: ta siac nakitac idi amin nga aramiden ni Laban kenca.

¹³ Siac ti Dios ti Bethel, isu a nanglanaam iti bato, isu a nagcariam caniac iti cari: tumacderca ita, ket pumanawca ditoy a daga, ket inca agsubli iti daga a nacayanacam.

¹⁴ Ket ni Raquel ken ni Lea simmungbatda ket kinunada kencuana, Adda ngata pay bingaymi wenno tawidmi idiay balay ni amami?

¹⁵ Saancam aya a maibilang a gangannaet kencuana? ta inlaconacami ket kinnanna met a naminpinsan amin a piracmi.

¹⁶ Ta amin dagiti kinabacnang nga iniccat ti Dios ken amami, isuda dagiti cucuami ken cucua dagiti annacmi: ita ngarud, aramidem ti uray ania a sinao ti Dios kenca.

¹⁷ Idin ni Jacob timmacder, ket insacayna dagiti annacna ken dagiti assawana cadagiti camcamello;

¹⁸ Ket intalawna amin dagiti an-animalna, ken amin a cucuana nga inurnongna, dagiti an-animal a nagun-odna, nga inummongna idiay Padan-aram, tapno mapan ken Isaac nga amana idiay daga a Canaan.

¹⁹ Ket ni Laban napanna idi pinukisan dagiti carcarnerona: ket ni Raquel tinacawna dagiti ladladawan a pagcararagan a cucua idi ni amana.

²⁰ Ket ni Jacob naglibas ken Laban a Sirio, a gapu iti dina panangyammo iti ipapanawna.

²¹ Casta ti panagtalawna idi agraman amin nga adda kencuana; ket timmacder, ket nagbaliw iti Carayan, ket nagturong idiay bantay ti Galaad.

²² Ket naipadamag ken Laban, iti maicatlo nga aldaw, ti panagtalaw ni Jacob.

²³ Ket innalana dagiti cacabsatna a cadduana a nangsurot kencuana, ket nagpito nga aldawda a nagna; ket nacamacamma idiay bantay ti Galaad.

²⁴ Ket ti Dios immay iti maysa a tagainep ti rabii ken Laban a taga Siria, ket kinunana kencuana, Aluadam ta dica agsao ken Jacob iti naimbag wenno dakes.

²⁵ Ket ni Laban nacamacamna ni Jacob. Ket ni Jacob imbangonna ti sapawna iti bantay: ket ni Laban nagsardeng agraman dagiti cacabsatna idiay bantay ti Galaad.

²⁶ Ket ni Laban kinunana ken Jacob, Ania ti inaramidmo, ta linibasannac, ket impanmo dagiti annacco a casda la caycayaw iti campilan?

²⁷ Apayapay a pimmanawca iti nalimed, ket linibasannac, ket dica inbagbaga caniac, ta pinalubosanca coma a siraragsac a nacancantaan, a natamtamboran, ken naharharpaan;

²⁸ Ket dica impaagec caniac dagiti annacco a lallaki ken babbai? ita minamauyong ti inaramidmo.

²⁹ Adda ti pannacabalin iti imac nga mangranggas kenca: ngem ti Dios ni amam sinaona caniac idi rabii, a kinunana, Aluadam ta dica agsao ken Jacob iti naimbag man wenno dakes.

³⁰ Ket ita, nupay no cayatmo ti mapan, gapu ta mailiwca iti balay ni amam, apayapay ngarud a tinacawmo dagiti didiosco?

³¹ Ket ni Jacob simmungbat ken Laban ket kinunana, Gapu ta agbutengac idi: ta kinunac, Amangan la ket no agawenna caniac dagiti annacna a babbai.

³² Iti pacasaracam cadagita didiosmo, saanto nga agbiag: iti sango dagiti cacabsatta kitaem ti cucuam nga adda caniac, ket alaem. Ta ni Jacob saanna nga ammo a ni Raquel tinacawna ida.

³³ Ket ni Laban simrec iti sapaw ni Jacob, ken iti sapaw ni Lea, ken iti sapaw dagiti dua nga ad-adipen a babbai; ngem awanda a nasaracanna. Ket rimmuar iti sapaw ni Lea, ket simrec iti sapaw ni Raquel.

³⁴ Ket ni Raquel innalana idi dagiti didios ket incabilna ida iti pasanga ti camello, ket nagtugawanna ida. Ket ni Laban sinukimatna amin ti uneg ti sapaw ngem dina ida nasaracan.

³⁵ Ket kinunana ken amana, Saan coma nga agunget ni apoc nga ita diac mabalin ti tumacder iti sangoanam; ta agcadawyanac cas sapasap cadagiti babbai. Ket nagsapul, ngem dina natumpungan dagiti didios.

³⁶ Ket ni Jacob nagpungtot, ket binabalawna ni Laban: ket ni Jacob simmungbat ket kinunana ken Laban, Ania ti salungasingco? ania ti basolco a nangcamatam caniac a sidadaras?

³⁷ Yantangay sinucainam dagiti amin a cucuac, ania ti nasaracam cadagiti amin a gargaret ti balaymo? Icabilmo iti sango dagiti cacabsatco ken cacabsatmo tapno ocomendata nga agpadpada.

³⁸ Cadagitoy duapulo a tawen nakipagyanac kenca; dagiti carcarnero ken calcaldingmo a babbai saanda a naalisan, ket diac nangan cadagiti lallaki dagiti pangpangenmo.

³⁹ Ti pinatay dagiti narungsot nga animal, diac impasang kenca; siac ti naglac-am iti nadadael; dagiti natacaw iti aldaw man wenno rabii, iti imac ti nagsapulam.

⁴⁰ Castaac idi; iti aldaw magagaraac iti pudot, ket no iti rabii, iti lamiis ti linnaaw a nagbalay; ket ti turogco napucaw cadagiti matac.

⁴¹ Cadagitoy duapulo a tawen addaac idi iti balaymo; sangapulo ket uppat a tawen nagserviac kenca gapu cadagiti dua nga annacmo a babbai, ket innem a tawen gapu cadagiti an-animalmo: ket naminpulo a binaliwam ti tangdanco.

⁴² No coma no ti Dios ni amac, ti Dios ni Abraham, ken ti Buteng ni Isaac, awan caniac idi, pudno ima-imaac coma a papanawem ita. Ti Dios nakitana ti rigatco ken ti bannog dagiti im-imac, ket tinubngarnaca idi rabii.

⁴³ Ket ni Laban simmungbat ket kinunana ken Jacob, Dagiti annac a babbai annacco ida, ken dagiti ubbing ubbingco ida, ket dagiti ar-arban ar-arbanco ida, ket amin a makitam cucuac: ket cadagitoy annacco a babbai, ania ti mabalinco nga aramiden caduacuada ita? wenno cadagiti annacda nga impasngayda?

⁴⁴ Umayca ngarud ita, agcallaysata coma, siac ken sica; ket agservi coma a pammanecnec cadata.

⁴⁵ Ket ni Jacob nangala iti maysa a bato, ket binangonna a teddec.

⁴⁶ Ket ni Jacob kinunana cadagiti cacabsatna, Agummongcayo cadagiti batbato; ket nangalada cadagiti batbato, ket inaramidda a bunton: ket nanganda sadiay iti abay ti bunton.

⁴⁷ Ket ni Laban pinanagananna iti Jegar-Sahadutha: ngem ni Jacob ninaganna iti Galaad.

⁴⁸ Ket ni Laban kinunana, Daytoy a bunton isu ita ti pamanecnec cadata. Gapuna a napanaganan iti Galaad:

⁴⁹ Ken Mizpa, ta kinunana, Ni Jehova agsiput coma iti nagbaetanta no masina ti maysa ken maysa cadata.

⁵⁰ No paldaangem dagiti annacco, ken no mangalaca pay iti babai a sabali nga inayon cadagiti annacco a babbai, awan tao nga adda cadata; kitaem, ti Dios isu ti sacsita iti nagbaetanta.

⁵¹ Ket ni Laban kinunana ken Jacob, Adtoy ti bunton, ket adtoy ti teddec, a binangonco nga agservi cadata.

⁵² Panecnecan coma daytoy a bunton, ket pagpanecnec coma daytoy a teddec a diacto aglabes itoy a bunton tapno agranggasac kenca, ken dicanto met aglabes itoy a bunton ken itoy a teddec tapno agranggasca caniac.

⁵³ Ti Dios ni Abraham, ken ti Dios ni Nacor, ti Dios ni amada, ocomennata coma. Ket ni Jacob nagsapata gapu iti Buteng ni Isaac nga amana.

⁵⁴ Ket ni Jacob nagaramid ti maysa a daton idiay bantay, ket inayabanna dagiti cacabsatna tapno manganda iti tinapay: ket nanganda iti tinapay ket imyanda idiay bantay.

⁵⁵ Ket ni Laban bimmangon a nasapa iti bigat ket inagcanna dagiti annacna a lalaki ken babbai, ket binendicionanna ida: ket nagluas ni Laban, ket nagsubli idiay taengna.