Genesis 30 - Ti Biblia (1973)

Dagiti Annac ni Jacob. Ti Tulagna ken Laban. Ti Irarang-ayna.

¹ Ket ni Raquel idi naimatanganna a di nangyanac ken Jacob, immapal ken cabsatna a babai; ket kinunana ken Jacob, Iccannac iti annac, ta no saan, matayac.

² Ket ni Jacob nacapungtot ken Raquel: ket kinunana, Siac aya ti sumucat iti Dios, a nangtuben iti tianmo?

³ Ket ni Raquel, kinunana, Adtoy, ni adipenco a Bilha, sumrecca kencuana, tapno aganacto iti rabaw dagiti tumtumengco, ket magun-odco met dagiti annac gapu kencuana.

⁴ Ket intedna kencuana ti adipenna a Bilha nga asawaenna: ket ni Jacob simrec kencuana.

⁵ Ket ni Bilha nagsicug ket nangyanac ken Jacob iti maysa nga anac a lalaki.

⁶ Ket ni Raquel kinunana, Ti Dios inocomnac ket dinengngegna met ti timecco, ket iniccannac iti maysa nga anacco: gapuna a pinanagananna iti Dan.

⁷ Ket ni Bilha nga adipen ni Raquel nagsicug manen, ket inyanacna ti maicadua a lalaki nga anac ken Jacob.

⁸ Ket ni Raquel kinunana, Cadagiti pannakibacal a siiingel nakibacalac ken cabsatco a babai, ket inabacco: ket impanaganna ti Nephtali.

⁹ Idi nadlaw ni Lea a simmardeng nga aganac, innalana ti adipenna a Zilpa; ket impaasawana ken Jacob.

¹⁰ Ket nangyanac ni Zilpa, nga adipen ni Lea, ken Jacob iti maysa a lalaki.

¹¹ Ket ni Lea kinunana, Nagasat! Ket pinanagananna iti Gad.

¹² Ket ni Zilpa, nga adipen ni Lea, nangyanac ken Jacob iti maicadua a lalaki.

¹³ Ket ni Lea kinunana, Nagasatac! ta cunanto dagiti annac a babbai a nagasatac: ket impanaganna iti Aser.

¹⁴ Ket ni Ruben napan idi tiempo a panagani iti trigo, ket nasaracanna dagiti mandragoras cadagiti taltalon, ket insangpetna ida ken ni Lea, nga inana. Ket ni Raquel kinunana ken Lea, Dawatec kenca nga iccannac coma cadagiti mandragoras ni anacmo.

¹⁵ Ket isu simmungbat, Bassit pay laeng a banag ti panangalam idi ken asawac? ket alaem manen dagiti mandragoras ni anacco? ket ni Raquel kinunana, Iti casta makicaiddanto kenca no rabii, a supapac dagita mandragoras ni anacmo.

¹⁶ Ket ni Jacob naggapu iti talon iti malem, ket rimmuar a simmabet kencuana ni Lea, ket kinunana, sumreccanto caniac; ta pudno nga inabanganca maipanggep cadagiti mandragoras ni anacco. Ket nakicaidda kencuana idi a rabii.

¹⁷ Ket ti Dios dinengngegna ni Lea, ket nagsicug, ket inyanacna ken Jacob ti maicalima nga anac a lalaki.

¹⁸ Ket ni Lea kinunana, Ti Dios intedna ti gungonac, gapu ta intedco ti adipenco ken asawac: ket pinanagananna iti Isacar.

¹⁹ Ket ni Lea nagsicug manen, ket inyanacna ti maicanem nga anac a lalaki ken Jacob.

²⁰ Ket ni Lea kinunana, Ti Dios iniccannac ti nasayaat a sab-ong; gapu itoy makipagnaedto caniac ni asawac, ta inyanacac cadagiti innem nga annac a lalaki: ket pinanagananna iti Zabulon.

²¹ Ket iti calpasanna naganac iti maysa a babai, ket ninaganna iti Dina.

²² Ket ti Dios linagipna ni Raquel, ket ti Dios impangagna, ket linuctanna ti aanacanna.

²³ Ket nagsicug, ket naganac iti lalaki, ket kinunana, Iniccat ti Dios ti pacaibabainac.

²⁴ Ket pinanagananna iti Jose, a kinunana, Nayonan coma caniac ni Jehova ti sabali nga anac a lalaki.

²⁵ Ket naaramid nga, idi ni Raquel inyanacna ni Jose, ni Jacob kinunana ken Laban, Palubosannac, ta innacon idiay dissoc, ken sadiay dagac.

²⁶ Itedmo caniac dagiti assawac ken dagiti annacco, isuda a nateggedac kenca, ket palubosannac: ta ammom ti panagservic nga inaramidco kenca.

²⁷ Ket ni Laban simmungbat kencuana, No ngarud, nacasaracac iti parabur cadagiti matam, agurayca: ta nasuutco a binendicionannac ni Jehova gapu kenca.

²⁸ Ket kinunana, Kedngam ti gungonam, ket siac itdecto.

²⁹ Ket ni Jacob kinunana: Sica ammom no casano ti panagservic kenca, ket no casano met ti pannacataraken dagiti an-animalmo maipuon caniac.

³⁰ Ta bassit ti adda a cucuam idi awanac pay, ket immadu iti casta unay a nagwadwad; ket ni Jehova binendicionannaca iti uray ania man a papanac: ket ita intonano ti panagbannogco iti maipaay iti balayco?

³¹ Ket isu kinunana, Ania ti itedconto kenca? ket ni Jacob kinunana, Awanto ti itedmo caniac: no ipaaymo caniac daytoy, agsubliacto manen a mangipaarab ti pangen ken agbantay cadacuada.

³² Siac innacto ita nga aldaw cadagiti amin a pangpangenmo, tapno iccatecto sadiay amin nga an-animal a labang ken adda turicturicda, ken amin a carcarnero a nangisit cadagiti carcarnerom, ken dagiti labang ken adda turicturicda cadagiti calcalding: ket dagitoy ti gungonacto.

³³ Ket ti calintegac agsungbatto intono sabali nga aldaw no umaycanto a maipapan ti gungonac nga adda iti sangoanam: amin dagiti saan a labang ken awan turicturicda cadagiti calcalding, ken saan a nangisit cadagiti carcarnero, a matumpungan caniac, maipabasolto a tinacawco.

³⁴ Ket ni Laban kinunana, Adtoy, sapay coma ta casta cas iti panagsaom.

³⁵ Ket inlasinna idi nga aldaw dagiti calcalding a lallaki a labang ken adda turicturicda, ken amin a calcalding a babbai a labang ken naturturican, amin nga adda purawpurawda, ken amin a nangisit cadagiti carcarnero, ket inyawatna ida iti ima dagiti annacna a lallaki;

³⁶ Ket incabilna tallo nga aldaw a pagnaen iti nagbaetanda isu ken ni Jacob: ket ni Jacob inpapaarabna dagiti dadduma a pangpangen ni Laban.

³⁷ Ket ni Jacob nangala cadagiti rawrawis ti alamo a naata, ken almendra ken castano; ket sinalapsapanna ti dadduma nga ukis agingga iti rimmuar a napuraw unay dagiti rawrawis.

³⁸ Ket incabilna dagiti rawrawis, a sinalapsapanna, cadagiti liblibsong iti yan a paginuman dagiti carcarnero, iti sangoanan dagiti pangpangen; ket nagsicugda idi napanda naginum.

³⁹ Ket nagsicugda dagiti pangpangen iti sangoanan dagiti rawrawis, ket dagiti ar-arban nangyanacda cadagiti garitgaritan, labang, ken turicturican.

⁴⁰ Ket ni Jacob insinana dagiti ur-urbon a carcarnero, ket incabilna ida cadagiti pangpangenna, dagiti garitgaritan ken amin dagiti nangisit iti pangen ni Laban: ket inlasinna dagiti pangpangenna met laeng, ket dina intipon ida iti pangen ni Laban.

⁴¹ Ket naaramid nga, idi dagiti napigpigsa iti pangen nagsicugda, incabil ni Jacob dagiti rawrawis iti sango dagiti mata dagiti pangpangen idi yan dagiti liblibsong, tapno agsicugda iti baet dagiti rawrawis;

⁴² Ngem no nacapuy dagiti an-animal, saanna nga incabil dagiti rawrawis; iti casta dagiti nacapcapuy isuda idi ti cucua ni Laban, ket dagiti napigpigsa cucua idi ni Jacob.

⁴³ Ket ti lalaki dimmackel iti casta unay, ket aduda idi dagiti carcarnerona, ken ad-adipen a babbai ken ad-adipen a lallaki, ken camcamello ken as-asno.