Genesis 3 - Ti Biblia (1973)

Ti Pannacasulisog ken Supring da Adan ken Eva. Ti Pannacapagtalawda sadiay Eden.

¹ Itan ti uleg isu idi a casisicapan cadagiti amin nga animal iti daga nga inaramid ni Jehova Dios. Ket isu kinunana iti babai, Pudno aya a kinuna ti Dios, Saancay a mangan iti amin a cayo iti minuyongan?

² Ket ti babai kinunana iti uleg, cadagiti bunga dagiti caycayo iti minuyongan maipalubos a mangancami:

³ Ngem iti bunga ti cayo nga adda iti tengnga ti minuyongan, kinuna ti Dios, Dicayto canen, ken uray sagiden di la ket ta mataycayo.

⁴ Ket ti uleg kinunana iti babai, Saan a pudno a mataycayonto:

⁵ Ta ti Dios ammona nga iti aldaw a pananganyo iti dayta, dagiti matayo maluctandanto, ket caslacayton iti Dios a macaammo ti naimbag ken ti dakes.

⁶ Ket idi ti babai nakitana nga ti cayo nasayaat a canen, ken macaayayo a buyaen ken cayo a macagargari a mamagsirib, pimmuros iti bungana ket nangan, casta met iniccanna ni asawana ket isu nakipagcaan met.

⁷ Ket dagiti matmatada a dua naluctanda, ket naammoanda a silalamolamoda; idin nagdaitda cadagiti bulong ti higos ket inaramidda a bidangda.

⁸ Ket nangngegda ti timec ni Jehova Dios a magmagna iti minuyongan iti lamiis ti aldaw: ket naglemmeng ti lalaki ken ti asawana cadagiti cacaycayoan iti minuyongan iti imatang ni Jehova Dios.

⁹ Ket inawagan ni Jehova Dios ti lalaki ket kinunana kencuana, Sadino ti yanmo, sica?

¹⁰ Ket isu kinunana, Nangngegco ti timecmo iti minuyongan ket nagbutengac, ta silalamolamoac; ket naglemmengac.

¹¹ Ket kinunana kencuana, Siasino aya ti nangibaga kenca a silalamolamoca? Nanganca iti cayo nga imbilinco kenca a dica canen?

¹² Ket ti lalaki kinunana, Ti babai, nga intedmo a caduac, iniccannac iti bungana ket kinnanco.

¹³ Idin ni Jehova Dios kinunana iti babai, Ania daytoy nga inaramidmo? Ket ti babai kinunana, Ti uleg inulbodnac ket nanganac.

¹⁴ Ket ni Jehova Dios kinunana idi uleg, Gapu ta inaramidmo daytoy, nailunodca a nangnangrona ngem cadagiti isu-amin nga animal a naamo, ken animal a narungsot iti daga; ta barucongmo ti ipagnamto, ket ti tapuc ti canemto iti isu-amin nga aldaw ti panagbiagmo.

¹⁵ Ket Siac pagginnuraencayto iti babai, ken ti caputotam ken ti caputotanna: daytoy sugatennanto ta olom, ket sica sugatemto ti mucodna.

¹⁶ Ket idi babai kinunana, Paaduecto unay dagiti ut-utmo ken ti panagsicugmo; iti adu a rigat ipasngaymonto dagiti annacmo; ket iti asawam isunto ti calicaguman, ket isu iturayannacanto.

¹⁷ Ket ken Adan kinunana, Gapu ta inanamungam ti sao ni asawam, ket nanganca iti cayo nga inbilinco kenca a kinunac, Dica manganto iti daydiay: nailunod ti daga gapu kenca; babaen ti rigat mangancanto kencuana iti isu-amin nga aldaw ti panagbiagmo;

¹⁸ Sisiit met ken calcalunay pataudennanto kenca ket mangancanto iti natnateng ti daga;

¹⁹ Babaen ti linget ta rupam mangancanto ti taraon, aginga't dica agsubli iti daga; isu a nacabuclam: ta tapucca, ket iti tapuc agsublicanto.

²⁰ Ket pinanaganan di lalaki ni asawana iti Eva; gapu ta isu ti ina dagiti isu-amin a nabiag.

²¹ Ket ni Jehova Dios inyaramidanna ni Adan ken ni asawana cadagiti pagananay a lalat, ket kinawesanna ida.

²² Ket ni Jehova Dios kinunana, Adtoy, ti lalaki nagbalin a cas maysa cadatayo, nga ammona ti naimbag ken ti dakes; ket ita, di la ket ta igawatna ti imana, ken mangala iti cayo ti biag, ken mangan, ken agbiag a cancanayon.

²³ Iti casta ni Jehova Dios pinaruarna iti minuyongan ti Eden, tapno talonenna ti daga a nacaalaanna.

²⁴ Ket pinagtalawna ti tao; ket insaadna iti daya ti minuyongan ti Eden ti Kerubin ken ti maysa nga sumilsilap a campilan a simmango iti amin a turong, tapno bantayanna ti dalan nga agturong iti cayo ti biag.