Genesis 29 - Ti Biblia (1973)

Ni Jacob masaracanna ni Raquel. Ni Laban awatenna. Ni Jacob asawaenna ni Lea ken ni Raquel. Dagiti Annacna.

¹ Idin ni Jacob nagtuloy iti dalanna ket nacadanon iti daga dagiti annac ti daya.

² Ket kimmita ket, adtoy, maysa a bobon iti cataltalonan, ket adtoy, tallo a pangen dagiti carcarnero agid-iddada iti sibayna; ta iti daydi a bobon ti nagpapainumanda cadagiti an-animal: ket dackel ti bato iti ngarab ti bubon idi.

³ Ket inurnongenda amin sadiay dagiti pangpangen: ket ligsayenda idi ti bato iti ngarab ti bobon ken pinainumda dagiti carcarnero, sada insubli manen ti bato iti ngarab ti bobon.

⁴ Ket ni Jacob kinunana cadacuada, Cacabsatco, Tagaanocayo? Ket simmungbatda, Taga Harancami.

⁵ Ket kinunana cadacuada, Amammoyo ni Laban nga anac ni Nacor? Ket kinunada, Am-ammomi.

⁶ Ket kinunana cadacuada, Naimbag ti casasaadna? Ket kinunada, Naimbag ti casasaadna: ket, adtoy, ni Raquel nga anacna a babai umay a cacuyogna dagiti carcarnero.

⁷ Ket kinunana, Adtoy, aldaw pay laeng, ket di pay met panangapon cadagiti an-animal: painumenyo dagiti carcarnero, ket incayo ipaarab ida.

⁸ Ket kinunada, Dicami mabalin, agingga iti di mapagtitipon amin dagiti ipastoran, ket ligsayenda ti bato iti ngarab ti bobon; sa painumenmi dagiti carcarnero.

⁹ Idinto a makisasao pay laeng cadacuada, ni Raquel immay agraman dagiti carcarnero ni amana; ta isu idi ti agipapaarab.

¹⁰ Ket naaramid nga, idi nakita ni Jacob ni Raquel nga anac a babai ni Laban, a cabsat ni inana, ken dagiti carcarnero ni Laban a cabsat a lalaki ni inana, immasideg ni Jacob, ket linigsayna ti bato iti ngarab ti bobon, ket pinainumna ti arban ni Laban a cabsat ni inana.

¹¹ Ket ni Jacob inagcanna ni Raquel, ket impigsana ti timecna, ket nagsangit.

¹² Ket ni Jacob imbagana ken Raquel nga isu ti cabsat ni amana, ket anac ni Rebeca: ket isu nagtaray a nagpadamag ken amana.

¹³ Ket naaramid nga, idi ni Laban nangngegna dagiti damdamag ni Jacob nga anac ti cabsatna a babai, nagtaray a simmabat kencuana, ket inaracupna nga inagcan, ket insangpetna iti balayna. Ket sinaritana ken Laban isu-amin dagitoy a banbanag.

¹⁴ Ket ni Laban kinunana kencuana, Agpayso unay a sica ti tulangco ken lasagco. Ket nakipagyan kencuana iti nacabulan.

¹⁵ Ket ni Laban kinunana ken Jacob, Gapu ta sica ti cabsatco, pagserviannac ngata nga awan tangdanmo? Ibagam caniac, anianto ti tangdanmo?

¹⁶ Ket ni Laban adda idi dua nga annacna a babbai; ti nagan ti inauna Lea, ket ti nagan ti inaudi Raquel.

¹⁷ Ket dagiti mata ni Lea natarnawda idi; ngem ni Raquel naimnas ken nasayaat ti langana.

¹⁸ Ket ni Jacob inayatna ni Raquel; ket kinunana, Agserviacto kenca bayat iti pito a tawen gapu ken Raquel nga anacmo a babai nga inaudi.

¹⁹ Ket ni Laban kinunana, Nasaysayaat nga isu itdec kenca ngem ti itedco iti sabali a lalaki: makipagtaengca caniac.

²⁰ Ket ni Jacob nagservi gapu ken Raquel bayat iti pito a tawen; ket bassit la nga aldaw ti nangipapananna, gapu ta isu ti pagay-ayatanna idi.

²¹ Ket ni Jacob kinunana ken Laban, Itedmo caniac ti asawac, ta nalpasen ti aldawco, tapno makipagnaedac kencuana.

²² Ket ni Laban inommongna amin a lallaki idiay a disso, ket nagdaya.

²³ Ket naaramid iti rabii nga innalana ni Lea nga anacna, ket intedna ken Jacob; ket simrec kencuana.

²⁴ Ket ni Laban intedna ni Zilpa nga adipenna a tagabuen ni anacna a Lea.

²⁵ Ket naaramid iti bigat nga, adtoy, isu idi ni Lea: ket ni Jacob kinunana ken Laban, Ania daytoy nga inaramidmo caniac? saan aya a nagserviac kenca maipanggep ken Raquel? ania ngarud ti gapuna nga inallilawnac?

²⁶ Ket ni Laban simmungbat, Saan a maaramid ti casta ditoy ayanmi, nga ited nga umun-una ti inaudi ngem ti inauna.

²⁷ Panungpalem pay ti daytoy a lawasna, ket sa itedminto pay ni Raquel kenca, nga iserviam manen caniac iti sabali a pito a tawen.

²⁸ Ket ni Jacob inaramidna a casta, ket tinungpalna ti lawas ni Lea: ket ni Laban intedna ni Raquel nga anacna nga inasawa ni Jacob.

²⁹ Ket ni Laban, intedna ken Raquel nga anacna, ni Bilha nga adipenna tapno pannacaubingna.

³⁰ Ket simrec met ken Raquel, ket inayatna a nangnangrona pay ngem ni Lea, ket inservianna manen iti sabali a pito a tawen.

³¹ Ket ni Jehova nakitana a ni Lea magurgura idi, gapuna a linuctanna ti aanacanna: ngem ni Raquel lupes idi.

³² Ket ni Lea nagsicug ket naganac iti maysa a lalaki, ket pinanagananna iti Ruben: ta kinunana, Gapu ta ni Jehova nakitana ti lidayco; itatta ni asawac ayatennacto.

³³ Ket nagsicug manen, ket naganac iti lalaki: ket kinunana, Gapu ta ni Jehova nangngegna a siac caluclucsawdac, intedna met caniac daytoy nga anac: ket impanaganna ti nagan a Simeon.

³⁴ Ket nagsicug manen, ket naganac iti maysa a lalaki; ket kinunana, Ita itoy a daras makitiponto caniac ni asawac, ta inyanacac iti tallo a lallaki: gapuna nga intedna a naganna ti Levi.

³⁵ Ket nagsicug manen, ket naganac iti maysa a lalaki: ket kinunana, Itoy a daras daydayawecto ni Jehova: gapuna nga impanaganna ti naganna a Juda, ket simmardengen a naganac.