Genesis 28 - Ti Biblia (1973)

Ti Parmata ni Jacob sadi Betel. Ti Incarina.

¹ Ket ni Isaac inayabanna ni Jacob, ket binendicionanna ket binilbilinna a kinunana, Dicanto makiasawa cadagiti annac a babbai ti Canaan.

² Tumacderca, ket inca idiay Padan-aram iti balay ni Bethuel, ama ni inam; ket mangasawaca sadiay cadagiti annac a babbai ni Laban a cabsat a lalaki ni inam.

³ Ket ti Dios a Mannacabalin amin bendicionannaca coma, ket pagbungaennaca, ket pagaduennaca tapno sica agbalinca a bunggoy dagiti inilin-ili;

⁴ Ket itdenna coma kenca ti bendicion ni Abraham, kenca ken cadagiti putotmo a mairanud kenca; tapno tawidem ti daga a paglaslasatam, a ti Dios intedna ken Abraham.

⁵ Ket ni Isaac pinalubosanna ni Jacob: ket napan idiay Padan-aram ken Laban anac ni Bethuel nga Sirio a cabsat a lalaki ni Rebeca, nga ina ni Jacob ken ni Esau.

⁶ Ngarud, ni Esau nakitana nga binendicionan ni Isaac ni Jacob ken imbaonna sadiay Padan-aram, tapno mangasawa idiay; ket idi nga binendicionanna, imbilinna kencuana a kinunana, Dicanto makiasawa cadagiti annac a babbai ti Canaan;

⁷ Ket casta a ni Jacob nagtulnog cada amana ken ni inana, ket napan sadiay Padan-aram:

⁸ Ket ni Esau nakitana a dagiti annac a babbai ti Canaan saanda a nacaay-ayo ken amana nga Isaac;

⁹ Ket ni Esau napan ken Ismael, ket inasawana ni Mahaleth, anac a babai ni Ismael, nga anac ni Abraham, cabsat a babai ni Nabaioth, mainayon pay dagiti assawana nga addada kencuana.

¹⁰ Ket ni Jacob pimmanaw sadi Beer-seba, ket napan idiay Haran.

¹¹ Ket nacatumpung iti maysa a disso, ket imyan sadiay, ta limneken ti init; ken nangala iti maysa a bato sadiay a disso, ket incabilna iti baba ti olona, ket nagidda tapno maturog sadiay.

¹² Ket nagtagainep; ket, adtoy, maysa nga agdan naipatacder iti daga, ket ti murdongsa tumucno sadi langit; ket, adtoy, dagiti an-angel ti Dios nga umululida ken bumabbabada kencuana.

¹³ Ket, adtoy, ni Jehova nagtacder iti rabawna ket isu kinunana, Siac ni Jehova, a Dios ni Abraham, nga amam, ken ti Dios ni Isaac: ti daga a nagiddaam itdecto kenca ken cadagiti caputotam;

¹⁴ Ket dagiti putotmo casdanto cadagiti taptapuc ti daga, ket agwarascanto iti laud, ken iti daya, ken iti amianan, ken iti abagatan: ket amin dagiti famfamilia ditoy lubong mabendicionandanto kenca ken cadagiti putotmo.

¹⁵ Ket, adtoy, addaac kenca, ket aywanamanto iti uray sadino a papanam, ket isublicanto ditoy a daga; ta dicanto baybayan, agingga iti diac matungpal ti sinaoc kenca.

¹⁶ Ket ni Jacob nacariing iti turogna, ket kinunana, Pudno unay a ni Jehova adda ditoy a disso; ket siac saanco nga ammo idi.

¹⁷ Ket nagbuteng, ket kinunana, Ania ketdin a nacaam-amac daytoy a disso! saan a sabali no di ti balay ti Dios, ket daytoy ti ruangan ti langit.

¹⁸ Ket ni Jacob nagparbangon iti bigat, ket innalana ti bato a nagpungananna, ket pinatacderna a teddec, ket imbuyatna ti lana iti rabawna.

¹⁹ Ket pinanagananna ti nagan daydi a disso iti Bethel: ngem ti nagan ti ili Luza idi unana.

²⁰ Ket ni Jacob nagcari iti maysa a cari, ket kinunana, No addanto coma ti Dios caniac, ket saluadannacto iti daytoy a dalan a papanac, ket iccannacto iti taraonco ken pagananay a pagcawesco,

²¹ Tapno agsubliac a sicacappia idiay balay ni amac, ket ni Jehova isunto ti Diosco,

²² Daytoy a bato, ngarud, a pinatacderco a teddec, isunto ti balay ti Dios: ket cadagiti amin nga itedmonto caniac, itdecto a di agcurang ti apagcapulloda kenca.