Genesis 27 - Ti Biblia (1973)

Magun-od ni Jacob ti Pammendicion ni Isaac. Ti Lucsaw ken Gura ni Esau. Maibaon ni Jacob sadiay Padan-aram.

¹ Ket naaramid nga, idi lacayen ni Isaac, ket dagiti matana nagcudrepda, iti casta dida macakita, inayabanna ni Esau nga anacna nga inauna, ket kinunana kencuana, Anacco: ket simmungbat, Adtoyac.

² Ket kinunana, Adtoy ita, lacayacon, diac ammo ti aldaw nga ipapatayco.

³ Ita ngarud dawatec kenca alaem, dagiti igammo, ti tagubanmo ken ti baim, ket inca iti away, ket yalaannac iti ugsa;

⁴ Ket yaramidannac iti naimas a sida, cas iti gustoc, ket yegmo caniac ta canecto, tapno bendicionannaca ti cararuac, ita diac pay matay.

⁵ Ket ni Rebeca nangngegna ni Isaac idi casasaona ni Esau nga anacna. Ket napan ni Esau iti away nga aganup iti ugsa, ken yegnanto.

⁶ Ket ni Rebeca kenasaona ni Jacob nga anacna a cunana, Adtoy, nangngegco ni amam a nagsao ken Esau a cabsatmo a cuncunana,

⁷ Yegannac iti ugsa, ket yaramidannac iti naimas a sida, tapno manganac, ken bendicionanca iti sango ni Jehova ita diac pay matay.

⁸ Ita ngarud anacco, tungpalem ti saoc a cas iti ibilinco kenca.

⁹ Inca ita iti yan dagiti arban ket yalaannac sadiay cadagiti dua nga urbon a nasayaat cadagiti calding; ket aramidecto ida a naimas a sidaen ni amam, cas iti gustona:

¹⁰ Ket sica ipammonto ken amam, tapno agsida, ta iti casta bendicionannaca ita dipay matay.

¹¹ Ket ni Jacob kinunana ken Rebeca nga inana, Adtoy, ni Esau a cabsatco tao a moldotan, ket siac taoac nga awan moldotna.

¹² Nalabit nga aricapennacto ni amac, ket ibilangnacto a mangalal-lilaw, ket maalacto ti pannacailunodco, ket saan a pannacabendicion.

¹³ Ket ni inana kinunana kencuana, Siacto ti pacaisaadan ti pannacailunodmo Anacco; tungpalem laeng ti timecco, ket inca, ket yegmo ida caniac.

¹⁴ Ket napan, ket nangala, ket impanna ida ken inana: ket ni inana nagluto iti naimas a sidaen a cas iti gusto ni amana.

¹⁵ Ket ni Rebeca innalana dagiti casayaatan a pagananay ni Esau, nga anacna nga inauna, nga addada kencuana iti balay, ket incapetna ida ken Jacob nga inaudi nga anacna;

¹⁶ Ket kinawesanna iti rabaw dagiti im-imana ken iti lengngesna nga awan moldotna, iti lalat dagiti urbon dagiti calding:

¹⁷ Ket inyawatna ti naimas a sidaen ken ti tinapay, a sinaganana, iti ima ni Jacob nga anacna.

¹⁸ Ket isu napan ken amana ket kinunana, Amac: ket kinunana, Adtoyac; asinoca, anacco?

¹⁹ Ket ni Jacob kinunana ken amana, Siac ni Esau nga inauna nga anacmo; inaramidco cas iti sinaom caniac: bumangonca dawatec kenca, agtugawca ket agsidaca iti ugsac, tapno ta cararruam bendicionannac coma.

²⁰ Ket ni Isaac kinunana iti anacna, Casano ti pannacasaracmo a nadaras, unay, anacco? Ket kinunana, Ta ni Jehova a Diosmo pinagasatnac.

²¹ Ket ni Isaac kinunana ken Jacob, Umasidegca, dawatec kenca, tapno aricapenca, anacco, no sica met laeng ti anacco nga Esau wenno saan.

²² Ket ni Jacob immasideg ken amana nga Isaac; ket isu inaricapna, ket kinunana, Ti timec isu ti timec ni Jacob, ngem dagiti im-ima isuda dagiti im-ima ni Esau.

²³ Ket dina nalasin, ta dagiti im-imana namoldotda a cas cadagiti im-ima ni Esau: iti casta binendicionanna.

²⁴ Ket kinunana, Sica ti anacco nga Esau met laeng? Ket kinunana, Siac.

²⁵ Ket kinunana, Yasidegmo caniac ket agsidaac iti ugsa ti anacco, tapno bendicionannaca ti cararuac. Ket inyasidegna, ket nangan: ket inyeganna iti arac, ket imminum.

²⁶ Ket ni Isaac nga amana kinunana kencuana, Umasidegca ita ket ongngoennac, anacco.

²⁷ Ket immasideg, ket inongngona, nasay-upna ti angot ti cawesna, ket binendicionanna, ket kinunana, Adtoy, ti angot ti anacco Cas ti angot ti talon a ni Jehova bendicionanna:

²⁸ Ket ti Dios itedna coma kenca ti linnaaw ti langit, Ken ti dam-eg ti daga, Ken kinawadwad ti trigo ken ti baro nga arac:

²⁹ Agservida coma kenca dagiti il-ili, Ken nasnacion agrucnoyda coma kenca: Agbalinca coma nga apo dagiti cacabsatmo, Ket agrucnoy coma kenca dagiti annac ni inam: Mailunod coma ti tunggal maysa a mangilunod kenca, Ket bendito coma ti tunggal maysa a mangbendicion kenca.

³⁰ Ket naaramid nga, idi ni Isaac nalpasna a binendicionan ni Jacob, ket pumampanaw ni Jacob iti sango ni Isaac nga amana, ni Esau a cabsatna simmangpet a naggapu iti paganupan.

³¹ Ket inaramidna met ti naimas a sidaen, ket inyegna ken amana; ket kinunana ken amana, Bumangon coma ni amac, ket agsida iti ugsa ti anacna, tapno ta cararuam bendicionannac coma.

³² Ket ni Isaac nga amana kinunana kencuana, Asinoca? Ket kinunana, Siac ti anacmo nga inauna, ni Esau.

³³ Ket ni Isaac namigerger iti casta unay, ket kinunana, Asino, ngarud ti nangala iti ugsa, ket inyegna caniac, ket kinnanco amin itay dica pay simmangpet, ket binendicionac isu pudno a benditonto.

³⁴ Idi ni Esau nangngegna dagiti sasao ni amana, nagickis iti puccaw a natbag ken nalaus a nagpait, ket kinunana ken amana, Bendicionannac cadi, uray siac met, O amac.

³⁵ Ket kinunana, Ni cabsatmo immay a sisisicap, ket innalana ti pannacabendicionmo.

³⁶ Ket kinunana, Saan aya a naimbag ti panangtawagda iti naganna a Jacob? ta ginamsawannac cadagitoy namindua a daras: innalana ti kinainaunac; ket ita, adtoy, innalana ti pannacabendicionco. Ket kinunana, Dinac tineddaan aya iti bagic a bendicion?

³⁷ Ni Isaac simmungbat ket kinunana ken Esau, Adtoy incabilcon nga apom, ket amin dagiti cacabsatna intedco kencuana nga ad-adipen; ket insaganaac iti trigo ken baro nga arac: ket, ania ngarud ti aramidecto kenca, anacco?

³⁸ Ket ni Esau kinunana ken amana, Maymaysa laeng ti pammendicionmo, ama? Bendicionannac cadi uray siac met, O amac. Ket ni Esau impigsana ti timecna ket nagsangit.

³⁹ Idin ni Isaac nga amana simmungbat ket kinunana kencuana, Adtoy, itinto nadam-eg a daga ti pagnaedam, Ken iti linnaaw ti langit idiay ngato;

⁴⁰ Ket gapu iti campilanmo agbiagcanto, ket agservicanto ken cabsatmo; Ket maaramidto, nga intono macalapsutcanto, Iccatemto ti sangolna ita lengngesmo.

⁴¹ Ket ni Esau ginurana ni Jacob maipanggep iti bendicion, isu a pammendicion ni Amana kencuana: ket ni Esau kinunana iti pusona, Dagiti al-aldaw ti ladingit a maipaay ken amac umasidegdan; ti casta patayecto ni Jacob a cabsatco.

⁴² Ket naipadamag ken Rebeca dagiti sasao ni Esau nga anacna nga inauna, ket isu pinaayabanna ni Jacob nga inaudi nga anacna ket kinunana kencuana, Adtoy, ni cabsatmo nga Esau liwliwaenna ti bagina ti maipapan kenca, a panggepenaca a patayen.

⁴³ Ita ngarud, anacco, tungpalem ti saoc kenca; ket tumacderca, agtalawca a mapan ken Laban a cabsatco idiay Haran;

⁴⁴ Ket makipagyanca kencuana iti bassit nga ladaw, agingga iti di maiccat ti gura ni cabsatmo kenca;

⁴⁵ Agingga iti di mapucaw ti gura ni cabsatmo kenca, ken malipatanna ti inaramidmo kencuana: sa agbaonacto ket ipanawcanto sadiay: apayapay nga iti maysa nga aldaw maulilaacto cadacayo a dua?

⁴⁶ Ket ni Rebeca kinunana ken Isaac, Maumaac iti biagco maipuon cadagiti annac a babbai ni Heth: no ni Jacob mangasawa iti maysa cadagiti annac a babbai ni Heth, cas cadagitoy annac a babai a taga ditoy a daga, ania ti pagayatac pay laeng nga agbiag?