Genesis 26 - Ti Biblia (1973)

Ni Isaac sadiay Gerar. Libacanna ni Abimelech. Bumacnang ni Isaac ket naapalan. Ti Tulagna ken Abimelech. Dagiti Assawa ni Esau.

¹ Ket adda bisin idi iti daga, sangasabali pay daydi immuna a bisin, a naadda cadagiti aldaw ni Abraham. Ket ni Isaac napan ken Abimelec, ari dagiti Filisteos, idiay Gerar.

² Ket ni Jehova nagparang kencuana, ket kinunana, Dica sumalog idiay Egipto; agtaengca iti daga nga ibagacto kenca:

³ Agnaedca iti daytoy a daga, ket siac addaacto kenca, ket bendicionancanto; ta kenca ken iti putotmo itedconto amin dagitoy a dagdaga, ket patalgedacto ti sapata nga insaptac ken Abraham nga amam;

⁴ Ket pagaduecto ti putotmo a cas cadagiti bitbitwen ti langit, ket itedconto iti putotmo amin dagitoy a dagdaga; ket amin a nasnacion iti daga mabendicionandanto iti putotmo;

⁵ Gapu ta ni Abraham impangagna ti timecco, ket tinungpalna ti patigmaanco, dagiti bilbilinco, dagiti pagalagadac ken linlintegco.

⁶ Ket ni Isaac nagnaed idiay Gerar:

⁷ Ket dagiti lallaki idiay a disso inintuudda kencuana ti maipapan iti asawana; ket kinunana, Isu cabsatco: ta nagbuteng a nagcuna, Isu ti asawac; ta kinunana di la ket ta dagiti lallaki iti disso patayendacto a maipuon ken Rebeca; gapu ta napintas ti buyana idi.

⁸ Ket naaramid idi nagnaed idiay iti nabayag, ni Abimelech, ari dagiti Filisteos, simmirpat iti maysa a tawa, ket kimmita, ket, adtoy, nakitana ni Isaac a makiayayam idi ken Rebeca nga asawana.

⁹ Ket ni Abimelec inayabanna ni Isaac, ket kinunana, Adtoy, pudno unay isu ti asawam: ket apayapay kinunam, Isu ti cabsatco? Ket ni Isaac kinunana kencuana, Gapu ta kinunac, Dila ket ta matayac maipuon kencuana.

¹⁰ Ket ni Abimelec kinunana, Ania daytoy nga inaramidmo cadacami? Maysa cadagiti lallaki nalaca a nakicaidda coma iti asawam, ket inyegmo coma cadacami ti babac.

¹¹ Ket ni Abimelec inbilinna iti amin nga umili, a cunana, Ti sumagid itoy a lalaki wenno iti asawana mapapatayto a di bumurong.

¹² Ket ni Isaac nagtalon idiay a daga, ket nacagunguna iti daydi a tawen ti naminsangagasut: ket binendicionan ni Jehova.

¹³ Ket ti lalaki rimmang-ay, ket dimmackel la a dimmackel agingga iti nagbalin a mannacabalin.

¹⁴ Ket naaddaan iti cucuana a pangpangen, ken ar-arban, ken adu a tattaona; ket dagiti Filisteos inagumanda.

¹⁵ Ket isu-amin a bobbobon a kinalian idi dagiti ad-adipen ni Abraham nga amana cadagiti aldawna, dagiti Filisteos ginaburanda ida, ket pinunnoda iti daga.

¹⁶ Ket ni Abimelec kinunana ken Isaac, pumanawca cadacami; gapu ta napigpigsacan ngem dacami.

¹⁷ Ket ni Isaac pimmanaw idiay, ket insaadna dagiti sapsapawna iti lobong ti Gerar, ket nagnaed idiay.

¹⁸ Ket ni Isaac kinalianna manen dagiti bobbobon ti danum, a binobonda idi cadagiti aldaw ni Abraham nga amana; ta dagiti Filisteos ginaburanda ida idi natayen ni Abraham: ket impanaganna cadacuada dagiti nagnagan a ni amana impanaganna idi cadacuada.

¹⁹ Ket dagiti ad-adipen ni Isaac nagcalida iti lobong, ket nasaracanda idiay ti maysa a bobon nga agburburayoc ti danum.

²⁰ Ket dagiti paspastor a taga Gerar nakisusicda cadagiti paspastor ni Isaac, a cunada, Ti danum cucuami: ket ninaganna ti bobon iti Esek (Susic), agsipud ta nakisubangda idi kencuana.

²¹ Ket nangcalida iti sabali a bobon, ket casta met a nakisusicda manen maipuon itoy: ket pinanagananna iti Sitna (Gura).

²² Ket pimmanaw idiay, ket nangcali iti sabali a bobon, ket saanda a kinasusic maipuon itoy: ket pinanagananna iti Rehobot (Disso), ket kinunana, Gapu ta ita ni Jehova iniccannatayo ti disso a nawaya, ket rumang-aytayto iti daga.

²³ Ket nanipud sadiay simmang-at sadi Beer-seba.

²⁴ Ket ni Jehova nagparang kencuana iti daydi met la a rabii, ket kinunana, Siac ti Dios ni Abraham nga amam: dica agbuteng, ta siac addaac kenca, ket bendicionancanto, ket paaduecto ti putotmo maipuon ken Abraham nga adipenco.

²⁵ Ket isu nangbangon idiay iti maysa nga altar, ket inawaganna ti nagan ni Jehova, ket pinatacderna idiay ti sapawna: ket sadiay dagiti ad-adipen ni Isaac nagcalida ti maysa a bobon.

²⁶ Idin ni Abimelec napan kencuana nanipud Gerar, ken da Ahuzat a gayyemna, ken ni Picol a capitan dagiti buybuyotna.

²⁷ Ket ni Isaac kinunana cadacuada, Apayapay immaycayo caniac, idinto a kinaguradac, ket pinapanawdac cadacayo?

²⁸ Ket kinunada, Nakitami a nalawag a ni Jehova adda kenca: ket kinunami, Adda coma ita ti maysa a sapata cadatayo, dacami ken sica, ket aramidentayo coma ti maysa a tulag.

²⁹ A dicanto aramiden cadacami ti dakes a cas cadacami didaca sinagsagid, ken cas ti naimbag nga inaramidmi laeng ket inbaondaca a sicacappia; sica ita ti bendito ni Jehova.

³⁰ Ket inyaramidanna ida iti maysa a daya, ket nanganda ket imminumda.

³¹ Ket bimmangonda a nasapa iti bigat, ket ti maysa ken maysa nagsapatada: ket ni Isaac pinagawidna ida, ket pimmanawda a sicacappia.

³² Ket naaramid nga, iti daydi met la nga aldaw, immay dagiti ad-adipen ni Isaac, ket iyammoda ti maipanggep iti bobon a kinalianda ket kinunada kencuana, nasaracanmi ti danum.

³³ Ket ninaganna iti Seba: gapu itoy ti nagan daydiay nga ili Beer-seba, agingga iti daytoy nga aldaw.

³⁴ Ket idi ni Esau nagtawen iti uppat a pulo, innalana nga assawana da Judit, nga anac a babai ni Beeri a Heteo, ken ni Basemat, nga anac a babai ni Elon a Heteo:

³⁵ Ket dagitoy isuda dagiti pagladladingitan dagiti panunut da Isaac ken Rebeca.