Genesis 25 - Ti Biblia (1973)

Ni Abraham ken ni Cetura. Ti Ipapatay ni Abraham. Dagiti Putputot ni Ismael. Ti Pannacayanac ni Esau ken Jacob. Ilaco ni Esau ti Kinainaunana.

¹ Ket ni Abraham nangasawa iti sabali, ket ti naganna Cetura.

² Ket inayanacna kencuana da Zimrac, ken Joksan, ken Medan, ken Midiam, ken Isbak, ken Sua.

³ Ket ni Joksan pinutotna da Seba, ken Dedan. Ket dagiti annac a lallaki ni Dedan isuda Assurim, ken Letusim, ken Leummim.

⁴ Ket dagiti anac a lallaki ni Midiam: da Efa, ken Efer, ken Enoc, ken Abida, ken Eldaa. Amin dagitoy annac ida ni Cetura.

⁵ Ket ni Abraham intedna amin a cucuana ken Isaac.

⁶ Ngem cadagiti annac a lallaki dagiti camalala, nga addada ken Abraham, idi ni Abraham iniccanna ida cadagiti sagsagut; ket imbaonna ida iti adayu ken Isaac nga anacna, idi sibibiag pay, iti agpadaya, iti daga nga akindaya.

⁷ Ket dagitoy dagiti al-aldaw dagiti tawtawen ti biag a panagbiag ni Abraham sangagasut, pitopulo ket lima a tawen.

⁸ Ket ni Abraham, inyawatna ti cararuana, ket natay iti naimbag a kenalacay, lacay, ken napnoan cadagiti tawtawen, ket naitipon cadagiti cacabagianna.

⁹ Ket imponpon da Isaac ken Ismael, nga annacna a lallaki, idiay rukib ti Macpela, iti talon ni Efron nga anac a lalaki ni Zoar a Heteo, nga adda iti sango ti Mamre;

¹⁰ Ti daga a ginatang ni Abraham cadagiti anac ni Het: idiay ti nacaiponponan da Abraham, ken ni Sara nga asawana.

¹¹ Ket naaramid nga, iti calpasan ti ipapatay ni Abraham, binendicionan ti Dios ni Isaac nga anacna: ket ni Isaac nagtaeng iti asideg ti Beer-lahairoi.

¹² Ket dagitoy dagiti caputotan ni Ismael, anac ni Abraham, nga pinutot ni Abraham ken Agar a taga Egipto, nga adipen ni Sara:

¹³ Ket dagitoy dagiti nagnagan dagiti annac a lallaki ni Ismael, a gapu cadagiti nagnaganda, mayannurot cadagiti caputotanda: ti inauna a lalaki nga anac ni Ismael, Nabayot; ken ni Cedar, ken Adbeel, ken Mibsam,

¹⁴ Ken Misma, ken Duma, ken Massa,

¹⁵ Ken Hadad ken Tema, ken Jetur, ken Nafis, ken Cedema:

¹⁶ Dagitoy dagiti annac a lallaki ni Ismael, ket dagitoy dagiti nagnaganda, mayannurot cadagiti purpurocda, ken mayannatup cadagiti pagsapsapawanda; sangapulo ket dua a pangpangolo maitutop cadagiti nasnacionda.

¹⁷ Ket dagitoy dagiti tawtawen ti panagbiag ni Ismael, sangagasut, tallopulo ket pito a tawen: ket inyawatna ti cararuana ket natay, ket naitipon cadagiti cacabagianna.

¹⁸ Ket nagnaedda nanipud Havila agingga iti Shur, nga adda iti sango ti Egipto, no cas agturongca iti Asiria: isu nagnaed iti masangoanan dagiti isu-amin a cacabsatna.

¹⁹ Ket dagitoy dagiti capcaputotan ni Isaac, anac ni Abraham: ni Abraham pinutotna ni Isaac:

²⁰ Ket ni Isaac nagtawen iti uppat a pulo idi inasawana, ni Rebeca nga anac a babai ni Betuel, nga Arameo idiay Padan-aram, ti cabsat ni Laban nga Arameo.

²¹ Ket ni Isaac nagdawat ken Jehova maipuon iti asawana, ta lupes idi ket ni Jehova inannugutna, ket ni Rebeca nga asawana nagsicug.

²² Ket dagiti anac nagsinnalisalda iti unegna, ket kinunana, No casta ti maaramid, casano ti panagbiagco? Ket napan a nakiuman ken Jehova.

²³ Ket ni Jehova kinunana kencuana, Dua a nacion addada ita tianmo, Ket dua nga ili masinadanto ita unegmo: Ket ti maysa nga ili napigpigsanto ngem ti sabali nga ili; Ket ti inauna agservinto iti inaudi.

²⁴ Ket idi nagtenganen dagiti aldaw a panaganacna, adtoy, adda dagiti singin iti tianna.

²⁵ Ket immuna a rimmuar nalabaga, ket nabungon iti muldot a cas maysa a pagananay; ket pinanagananda iti Esau.

²⁶ Ket calpasanna, rimmuar ti cabsatna a sicacapet ti imana iti mucod ni Esau; ket napanaganan iti Jacob: ket ni Isaac nagtawen iti innem a pulo idi inyanac ida ni Rebeca.

²⁷ Ket dimmackel dagiti ubbing: ket ni Esau nagbalin a nalaing nga mangaganup, tao ti away; ket ni Jacob lalaki a natalna, nga nagtataeng cadagiti sapsapaw.

²⁸ Ni Isaac inay-ayatna ni Esau, gapu ta nagsidsida cadagiti maananupanna: ket ni Rebeca inay-ayatna ni Jacob.

²⁹ Ket ni Jacob nagluto iti maysa a guisado: ket ni Esau naggapu iti away, ket nabannogan idi:

³⁰ Ket ni Esau kinunana ken Jacob, Dawatec kenca nga iccannac ti canec ita guisado a nalabaga; ta sicacapsutac; gapuna a napanaganan iti Edom.

³¹ Ket ni Jacob simmungbat, Ilacom caniac ita nga umun-una ti kinainaunam.

³² Ket ni Esau kinunana, Adtoy, ngannganiac matay: ket ania ti pacaipaayanna caniac ti saguday ti pannacayanac?

³³ Ket ni Jacob kinunana, Sapataam caniac ita nga aldaw; ket sinapataanna kencuana: ket inlacona ti kinainaunanna ken Jacob.

³⁴ Ket ni Jacob intedna ken Esau ti tinapay ken ti guisado a lentejas; ket nangan ket imminum, ket timmacder ket napan iti dalanna: casta ti di panangipateg ni Esau ti saguday ti pannacayanacna.