Genesis 24 - Ti Biblia (1973)

Ti Tulag ti Panagasawa ni Isaac ken ni Rebeca. Ti Panagasawada.

¹ Ket ni Abraham lacayen, ket aduanen ti tawen: ket ni Jehova binendicionanna ni Abraham iti isu-amin.

² Ket ni Abraham kinunana iti adipenna, ti panglacayen ti balayna, nga agaywan iti isu-amin nga adda kencuana, Isaadmo ta imam, dawatec kenca, iti babaen ti luppoc:

³ Ket pagsapataencanto gapu ken Jehova, a Dios ti langit ken ti Dios ti daga, a dicanto pangasawen iti anacco cadagiti annac a babbai ti Canaan isuda a pakipagtaengac:

⁴ Ngem mapancanto iti dagac, ken cadagiti cacabagiac, ket mangalaca idiay iti asawa nga agpaay iti anacco nga Isaac.

⁵ Ket ti adipen kinunana kencuana, Nalabit ti balasang dinanto cayat ti sumurot caniac a dumanon itoy a daga: masapulco nga ipan manen ti anacmo iti daga a naggapuam?

⁶ Ket ni Abraham kinunana kencuana, Annadam ket dica ipan manen ti anacco idiay.

⁷ Ni Jehova a Dios dagiti langlangit, a nangala caniac iti balay ni amac, ken iti daga a nacayanacac, ken nagsao caniac, ken nagsapata caniac, a cunana, Iti putotmo itedconto daytoy a daga; isu ibaonnanto ti angelna iti masangoanam ket mangalacanto idiay ti asawa ti anacco.

⁸ Ket no ti babai dinanto cayat ti sumurot kenca, mawayawayaancanton itoy sapatac; isuna laeng a dicanto ipan manen idiay ti anacco.

⁹ Ket ti adipen inassadna ti imana iti baba ti luppo ni Abraham nga apona, ket nagsapata kencuana maipuon itoy a panggep.

¹⁰ Ket ti adipen nangala iti sangapulo a camello cadagiti camello ni apona, ket nagluas, ta addan iti imana dagiti amin a napateg a cucua ni apona: ket timmacder, ket napan idiay Mesapotamia, iti ili ni Nacor.

¹¹ Ket pinagparintumengna dagiti camello iti ruar ti ili iti abay ti bobon ti danum, ti malem, nga horas ti ipapan dagiti babbai nga agsacdu.

¹² Ket kinunana, O Jehova a Dios ni apoc nga Abraham, ibaonmo cadi caniac, dawatec kenca, ti naimbag a gasat ita nga aldaw, ket itdem ti caasi ken apoc nga Abraham.

¹³ Adtoy, sitatacderac iti abay ti ubbog ti danum: ket dagiti babbai nga annac dagiti tattao ti ili um-umayda sumacdu:

¹⁴ Ket maaramid coma nga ti balasang a pagcunaac, Dawatec nga ibabam cadi ta carambam, tapno uminumac; ket isu cunananto, Uminumca, ken casta met painumecto dagita camellom: ipaaymo cadi nga daytoy ti insaganam iti adipenmo nga Isaac; ket iti castoy maammoacto nga inaramidmo ti caasi ken apoc.

¹⁵ Ket naaramid nga, idi dina pay natuloy ti agsao, adtoy, ni Rebeca rimmuar a sibabaclay ti carambana, isu nayanac ken Bethuel, lalaki nga anac ni Milca, asawa ni Nacor, a cabsat ni Abraham.

¹⁶ Ket ti balasang napintas unay a mabuya, virgen, a di pay naam-ammo ti lalaki: ket simmalog iti ubbog, ket pinunnona ti carambana, ket simmang-at.

¹⁷ Ket ti adipen nagtaray a simmabat kencuana, ket kinunana, Dawatec kenca, painumennac cadi iti bassit a danum iti carambam.

¹⁸ Ket isu simmungbat, Uminumca, apoc: ket nagdaras, ket imbabana ti carambana iti imana, ket pinainumna.

¹⁹ Ket idi nalpasnan a pinainum, kinunana, Casta met mangalaacto ti maipaay cadagiti camellom, inggana iti dida malpas nga uminum.

²⁰ Ket nagdaras, ket imbuyatna ti danum ti carambana iti pagipainuman ket nagsubli manen iti bobon a sumacdu, ket nangala iti agpaay cadagiti amin a camellona.

²¹ Ket ti lalaki minatmatanna a siuulimec, tapno maammoanna no ni Jehova pinagasatna ti dalanna, wenno saan.

²² Ket naaramid nga, idi dagiti camello nalpasdan nga imminum, ti lalaki nangala iti maysa a singsing a balitoc a guddua ti siclo ti timbengna, ken dua a pulceras nga agservi cadagiti im-imana a sangapulo a siclo a balitoc ti timbengda,

²³ Ket kinunana, Siasino ti makinanac kenca? Dawatec kenca ibagam cadi caniac. Adda ayan a pagdagusanmi idiay balay ni amam?

²⁴ Ket kinunana kencuana, Siac anacnac ni Bethuel lalaki nga anac ni Milca, isu nga inyanacna ken Nacor.

²⁵ Kinunana pay kencuana, Casta met nga adda cadacami, idiay balay, ti garami ken adu a macan dagiti an-animal, ken ti ayan a pagdagusan.

²⁶ Ket ti lalaki indumogna ti olona ket nagdaydayaw ken Jehova.

²⁷ Ket kinunana, Bendito coma ni Jehova, ti Dios ni apoc nga Abraham, isu nga di nangbaybaya iti caasina ken kinapudnona iti apoc: casta met caniac, ni Jehova inturongnac iti dalan agingga iti balay dagiti cacabsat ti apoc.

²⁸ Ket ti balasang nagtaray, ket inyammona iti balay ni inana, cas cadagitoy a sasao.

²⁹ Ket ni Rebeca adda lalaki cabsatna nga agnagan iti Laban: isu nagtaray a napan iti lalaki idiay ubbog.

³⁰ Ket naaramid nga, idi nakitana ti singsing, ken dagiti pulceras cadagiti imima ni cabsatna, ket idi nangngegna dagiti balicas ni Rebeca a cabsatna a kinunana, Casta ti kinuna caniac daydiay lalaki, immasideg iti lalaki; ket, adtoy, isu adda idi iti sibay dagiti camello idiay ubbog.

³¹ Ket kinunana, Sumrecca, sica bendito ni Jehova; apayapay sitatacderca iti ruar? ta insaganacon ti balay, ken ti disso a pagyanan dagiti camello.

³² Ket ti lalaki simrec iti balay, ket ni Laban inalsaanna dagiti camello, ket nangted ti garami ken ti canen a maipaay cadagiti camello, ken danum a pangbuggo cadagiti sacsacana, ken sacsaca dagiti lallaki a kimmuyog kencuana.

³³ Ket insangoananda ti canenna: ngem kinunana, Diacto mangan agingga iti diac maibaga ti gagarac. Ket ni Laban kinunana, Agsaoca.

³⁴ Ket kinunana, Siac adipennac ni Abraham.

³⁵ Ket ni Jehova binendicionanna iti adu ni apoc; ket nagbalinen a dackel: ket iniccanna cadagiti carcarnero, ken vacvaca, ken pirac ken balitoc, ken ad-adipen a lallaki ken babbai, ken camcamello ken as-asno.

³⁶ Ket ni Sara, nga asawa ni apoc, inyanacna idi baketen ken apoc ti maysa a lalaki, isu a nangtedanna ti amin nga adda kencuana.

³⁷ Ket ni apoc pinagsapatanac a kinunana, Dicanto mangala iti babai nga asawaen ti anacco cadagiti annac a babbai dagiti taga Canaan, nga iti dagada pagnaedac:

³⁸ Ngem incanto iti balay ni amac ken cadagiti cacabagiac, ket mangalacanto idiay iti asawa nga agpaay iti anacco.

³⁹ Ket kinunac ken apoc, Nalabit a ti babai dinto sumurot caniac.

⁴⁰ Ket sinungbatannac, Ni Jehova, nga iti sangona magnaac, ibaonnanto ti angelna a maicuyog kenca, ket pagasatennanto ti dalanmo; ket mangalacanto iti asawa a maipaay iti anacco cadagiti cacabagiac, ken iti balay ni amac:

⁴¹ No casta mawayawayaancanton iti sapatac, intono macasangpetca iti capuonac: ket no didanto ited kenca, mawayawayaancanton iti sapatac.

⁴² Ket dimtengac ita nga aldaw iti ubbog, ket kinunac, O Jehova, a Dios ni apoc nga Abraham, no sica pagasatem ita ti dalanco, isu a pagpagnaec:

⁴³ Adtoy, sitatacderac iti abay ti ubbog ti danum; ket ipaaymo cadi nga ti balasang a rummuar a sumacdu, isu a pagcunaacto, Dawatec kenca, painumennac cadi ti bassit a danum ita carambam;

⁴⁴ Ket isu cunaenanto, Uminumca, ken casta met mangalaacto ti danum nga agpaay cadagiti camellom: isu cadi daytoy ti babai nga insagana ni Jehova iti anac ti apoc.

⁴⁵ Ket idi diac pay nalpas ti sasaoen ti pusco, adtoy, ni Rebeca rimmuar a sebabaclay ti caramba; ket simmalog iti ubbog, ket nagsacdu: ket kinunac kencuana, Dawatec kenca nga painumennac cadi.

⁴⁶ Ket nagdaras, ket imbabana ti carambana iti abagana, ket kinunana, Uminumca, ken casta met painumecto dagiti camcamellom: ket imminumac, ken iniccanna met ti inumen dagiti camcamello.

⁴⁷ Ket nagimtuudac, ket kinunac, Asino ti makinanac kenca? ket kinunana, Anacnac ni Betuel, lalaki nga anac ni Nacor, isu nga impasngay ni Milca, kencuana: ket incabilco ti aritos iti agongna ken pulceras cadagiti imimana.

⁴⁸ Ket indumogco ti oloc, ket nagdaydayawac ken Jehova, ket indaydayawco ni Jehova, a Dios ni apoc nga Abraham, a nangiturong caniac iti napudno a dalan, tapno mangalaac iti babai nga anac ti cabsat a lalaki ni apoc nga agpaay iti anacna.

⁴⁹ Ita, ngarud, no ipaayyonto ti caasi ken ti kinapudno ken apoc, ipalawagyo caniac: ket no saan, ibagayo met caniac; tapno agturongac iti macanawan, wenno iti macatigid.

⁵⁰ Idin ni Laban ken Betuel simmungbatda ket kinunada, Ni Jehova ti naggapuan daytoy: saanmi a mabalin ti agsao kenca iti dakes wenno naimbag.

⁵¹ Addayta ni Rebeca iti sangoanam alaem, ket mapanca, ket isu coma ti asawa ti anac ni apom, cas sinao ni Jehova.

⁵² Ket naaramid nga, idi ti adipen ni Abraham nangngegna dagiti balbalicasda, nagrucnoy iti daga ken Jehova.

⁵³ Ket ti adipen nangala cadagiti alajas a balitoc, ken alajas a pirac, ken pagananay, ket intedna ida ken Rebeca; casta met iniccanna cadagiti cucua a napateg da cabsatna ken ni inana.

⁵⁴ Ket nanganda ken imminumda, isu ken dagiti lallaki a naicuyog kencuana, ket imyanda: ket bimmangonda iti bigat, ket kinunana, Ibaondac ken apoc.

⁵⁵ Ket ti cabsatna ken ti inana kinunada, Makipagyan cadi ti balasang cadacami iti sumagmamano nga aldaw, uray la no sangapulo; iti calpasanna, mapanto.

⁵⁶ Ket kinunana cadacuada, Didac tactaken, ta ni Jehova pinagasatna ti pannagnac; ibaondac a mapan ken apoc.

⁵⁷ Ket simmungbatda, Ayabanminto ti balasang, ket agintuudcami kencuana.

⁵⁸ Ket inayabanda ni Rebeca, ket kinunada kencuana, Mapancanto makicuyog itoy a lalaki? Ket kinunana, Mapanacto.

⁵⁹ Ket inbaonda ni Rebeca a cabsatda a babai, ken ti yayana, ken ti adipen ni Abraham, ken dagiti taona.

⁶⁰ Ket binendicionanda ni Rebeca, ket kinunada kencuana, Cabsatmi a babai, sica coma ti ina ti rinibribu a lacsa, ket dagiti putotmo tagicuaenda coma ti ruangan dagiti gumura cadacuada.

⁶¹ Ket timmacder ni Rebeca, ken dagiti babbalasangna, ket simmacayda cadagiti camello, ket sinurotda ti lalaki: ket ti adipen, innalana ni Rebeca, ket napan iti dalanna.

⁶² Ket ni Isaac naggapu iti dalan ti Beer-lahairoi; ta nagnaed iti daga ti Abagatan.

⁶³ Ket napan nagpanunot ni Isaac iti away idi tagtagilineken ti init: ket intangadna dagiti matana, ket adtoy, nakitana dagiti camello sumungsungadda idi.

⁶⁴ Ket ni Rebeca intanawagna dagiti matana, ket idi nakitana ni Isaac, dimsaag iti camello.

⁶⁵ Ket kinunana iti adipen, Asino daytoy a lalaki a magmagna iti away tapno sumabet cadatayo? Ket ti adipen kinunana, Isu ti apoc: ket innala ni Rebeca ti dalongdongna, ket inarpawanna ti bagina.

⁶⁶ Ket ti adipen sinaritana ken Isaac amin ti inaramidna.

⁶⁷ Ket impastrec ni Isaac ti sapaw ni inana a Sara, ket innalana ni Rebeca, ket nagbalin nga asawana; ket inayayatna: ket naliwliwa ni Isaac calpasan ti ipapatay ni inana.