Genesis 22 - Ti Biblia (1973)

Nasuut ni Abraham nga idatonna ni Isaac. Ti Familia ni Nachor.

¹ Ket naaramid, calpasan dagitoy a banbanag, a ni Jehova sinuutna ni Abraham, ket kinunana kencuana, Abraham; ket isu simmungbat, Adtoyac.

² Ket kinunana, Alaem ita ti anacmo, ti anacmo a bugbugtong, nga dongdongoen, a ni Isaac, ket inca iti daga ti Moria; ket isu idatagmo idiay nga maysa a daton a mapuuran, iti rabaw ti maysa cadagiti banbantay nga ibagacto kenca.

³ Ket ni Abraham bimmangon a nasapa iti bigat ken sinillaanna ti asnona, ket incuyogna dagiti dua nga babbarona, ken ni Isaac nga anacna; ket nangputed iti cayo nga agpaay iti daton a mapuuran, ket timmacder, ket napan iti disso a ti Dios imbagana kencuana.

⁴ Iti maicatlo nga aldaw, ni Abraham intangadna dagiti matana, ket nakitana ti disso iti adayo.

⁵ Ket ni Abraham kinunana cadagiti babbarona, Agyancayo ditoy agraman ti asno, ket siac ken ti ubing mapancamto idiay; ket agdaydayawcamto, ket agsublicamto cadacayo.

⁶ Ket ni Abraham innalana ti cayo a pagsungrod iti daton a mapuuran, ket impaawitna iti anacna nga Isaac; ket iniggamanna ti apuy, ken ti buneng; ket napanda a dua nagcuyog.

⁷ Ket ni Isaac kinasaona ni Abraham nga amana, ket kinunana, Amac: ket kinunana, Adtoyac, anacco. Ket isu kinunana, Adtoy ti apuy ken ti cayo a pagsungrod: ngem sadino ti yan ti cordero a maidaton a mapuuran?

⁸ Ket ni Abraham, kinunana, Ti Dios mangisagananto iti cordero a maipaay kencuana a daton a mapuuran, anacco: iti casta napanda a dua a nagcuyog.

⁹ Ket nacadanonda iti disso nga imbaga ti Dios kencuana ket ni Abraham binangonna idiay ti maysa nga altar, ket inurnosna ti cayo, ket rineppetna ni Isaac nga anacna, ket imparabawna iti altar, iti rabaw ti cayo.

¹⁰ Ket ni Abraham inyunnatna ti imana, ket innalana ti buneng, a pangpatayna iti anacna.

¹¹ Ket ti angel ni Jehova pinuccawanna nanipud langit, ket kinunana, Abraham, Abraham: ket isu simmungbat, Adtoyac.

¹² Ket isu kinunana, Saanmo nga idisso ta imam iti ubing, ket uray ania dica aramiden kencuana; ta ita mabigbigco a mabutengca iti Dios, yantangay dica impaidam caniac ti anacmo, ti bugbugtong nga anacmo.

¹³ Ket ni Abraham intannawagna dagiti matana, ket kimmita, ket adtoy, maysa a carnero a lalaki iti licudanna, a naisalat iti nasamec dagiti sarana; ket napan ni Abraham, ket innalana ti carnero ket impaayna a daton a mapuuran a sandi ti anacna.

¹⁴ Ket ni Abraham pinanagananna daydiay a disso iti Jehova-jireh: a cas masansan a masasao agpapan ita, Iti bantay ni Jehova sisasagananto.

¹⁵ Ket ti angel ni Jehova inayabanna ni Abraham ti capaminduana nanipud langit,

¹⁶ Ket kinunana, Gapu caniac met laeng sinapataac, kinuna ni Jehova, a gapu ta inaramidmo daytoy, ket dica inkedked ti anacmo, ti bugbugtong nga anacmo,

¹⁷ Iti panangbendicion bendicionancanto, ket iti pammaadu, paaduecto ti putotmo cas cadagiti bitbitwen ti langit, ken cas iti darat nga adda iti igid ti baybay; ket ti putotmo cucuananto dagiti ruangan dagiti cabusorna;

¹⁸ Ket iti putotmo mabendicionanto isu-amin dagiti nasnacion ti daga; agsipud ta tinungpalmo ti timecco.

¹⁹ Nagsubli ngarud ni Abraham cadagiti babbarona, ket timmacderda ket napanda a nagcucuyog idiay Beer-seba; ket nagnaed ni Abraham idiay Beer-seba.

²⁰ Ket naaramid a, calpasan dagitoy a banbanag, naipacaammo ken Abraham ti damag a kinunana, Adtoy, casta met ni Milca nagpasngay cadagiti annac ken Nacor cabsatmo a lalaki:

²¹ Ni Huz inauna nga anacna a lalaki, ken ni Buz a cabsatna, ken ni Kemuel nga ama ni Aram,

²² Ken Chesed, ken Hazo, ken Pildas, ken Jidlaf, ken ni Bethuel.

²³ Ket ni Bethuel pinutotna ni Rebecca; dagitoy walo inyanac ni Milca ken Nacor a cabsat ni Abraham.

²⁴ Ket ti camalalana, nga agnagan ti Reuma, inyanacna met ni Taba, ken ni Gaham, ken ni Taas, ken ni Maaca.