Genesis 21 - Ti Biblia (1973)

Nayanac ni Isaac. Napagtalaw da Agar ken Ismael. Ti Tulag ti Beer-seba.

¹ Ket ni Jehova sinarungcaranna ni Sara cas nasaona idi, ket ni Jehova inaramidna, ken Sara cas ti incarina.

² Ket nagsicug ni Sara, ket nangyanac ken Abraham iti maysa a lalaki, iti kinalacayna, idi tiempo a naituding a kinuna ti Dios kencuana.

³ Ket ni Abraham impanaganna iti anacna a nayanac kencuana, nga impasngay kencuana ni Sara, ti Isaac.

⁴ Ket ni Abraham kinugitna ni anacna nga Isaac idi adda walo nga alaldawnan, cas imbilin ti Dios kencuana.

⁵ Ket ni Abraham nagtawen iti sangagasut idi nayanac ni anacna nga Isaac.

⁶ Ket ni Sara kinunana, Pinagcatawanac ti Dios; ket amin a macangngeg makipagcatawadanto caniac,

⁷ Ket kinunana, Siasino ti nagsao ken Abraham, a ni Sara mamasusu cadagiti annac? ta nangyanacac kencuana ti maysa a lalaki iti kinalacayna.

⁸ Ket ti ubing, dimmackel ket napusot: ket inaramid ni Abraham ti dackel a daya idi aldaw a pannacapusot ni Isaac.

⁹ Ket ni Sara nakitana nga agrabrabac ti anac ni Agar a taga Egipto, nga inyanacna ken Abraham.

¹⁰ Gapuna a kinunana ken Abraham, Pagtalawem daytoy nga adipen a babai ken ti anacna, ta ti anac daytoy nga adipen saan a makipagtawidto iti anacco nga Isaac.

¹¹ Ket daytoy namagsennaay unay ken Abraham maipuon iti anacna.

¹² Ket ti Dios kinunana ken Abraham: Saan a macapasennaay coma kenca maipuon iti ubing ken iti adipenmo; iti amin nga ibaga kenca ni Sara, ipangagmo ti timecna; ta ken Isaac maawaganto ti caputotam.

¹³ Ket casta met ti anac ti adipen pagbalinecto a nacion, agsipud ta putotmo.

¹⁴ Ket ni Abraham bimmangon a nasapa iti bigat, ket nangala iti tinapay ken maysa a lalat a pagyanan ti danum, ket intedna ida ken Agar nga impacaratayna iti abagana, ket intedna kencuana ti ubing ket pinapanawna: ket pimmanaw a namagpagna iti let-ang ti Beer-seba.

¹⁵ Ket ti danum iti lalat naibus, ket incabilna ti ubing iti linong ti maysa a cayo a bassit.

¹⁶ Ket napan, ket nagtugaw iti masangoanan iti adayu iti casla madanon ti ibiat a pana: ta kinunana, Diac coma makita ti ipapatay ti ubing. Ket nagtugaw iti masangoanan, ket inyickisna ti timecna, ket nagsangit.

¹⁷ Ket ti Dios nangngegna ti timec ti ubing; ket ti angel ti Dios pinuccawanna ni Agar nanipud sadi langit, ket kinunana kencuana, Ania ti pagdanagam, Agar? Dica agbuteng; ta ti Dios nangngegna ti timec ti ubing iti ayanna.

¹⁸ Tumacderca, bangonem ti ubing ket kibinem; ta aramidecto a dackel a nacion.

¹⁹ Ket ti Dios linuctanna dagiti mata ni Agar, ket nakitana ti maysa a bobon ti danum; ket napan, ket pinunnona ti lalat iti danum, ket pinainumna ti ubing.

²⁰ Ket ti Dios naadda iti ubing, ket, dimmackel; ket nagtaeng iti let-ang, ket nagbalin a pumapana bayat ti idadackelna.

²¹ Ket nagnaed iti let-ang ti Paran: ket ni inana inyalaanna iti asawa a taga Egipto.

²² Ket naaramid nga, idi met laeng a tiempo, ni Abimelech ken ni Phicol, a capitan dagiti buyotna, nagsaoda ken Abraham, a kinunada, Ti Dios adda kenca iti amin nga aramidmo:

²³ Ita, ngarud, sapataam caniac ditoy maipuon iti Dios a dinacto guliban, ken iti anacco, ken iti appoc: ngem cas mayannatup iti caasi nga inaramidco kenca, aramidemto caniac, ken iti daga a nagtataengam.

²⁴ Ket ni Abraham kinunana, Agsapataacto.

²⁵ Ket ni Abraham binabalawna ni Abimelech maipuon iti maysa a bobon ti danum, a dagiti adipen ni Abimelech inagawda a siraranggas.

²⁶ Ket ni Abimelech kinunana, Diac ammo no siasino ti nangaramid iti daytoy; ket uray sica saanmo nga imbaga caniac, ket diac met na-ammoan no di laeng ita nga aldaw.

²⁷ Ket nangala ni Abraham cadagiti carcarnero ken vacvaca, ket intedna ida ken Abimelech; ket isuda a dua inaramidda ti maysa a tulag.

²⁸ Ket ni Abraham nangilasin ti pito a cordero a babbai iti pangenda ket naisinada.

²⁹ Ket ni Abimelech kinunana ken Abraham, Ania ti caipapanan dagitoy pito a cordero a babbai nga inlasinmo?

³⁰ Ket kinunana, Dagitoy pito a cordero a babbai alaemto iti biangco, tapno mangpanecnec coma caniac nga siac ti nangcali iti daytoy a bobon.

³¹ Gapuna a pinanagananna daydiay a disso iti Beer-seba; gapu ta idiay ti nagsapataanda a dua.

³² Iti casta nangaramidda iti tulag idiay Beer-seba; ket timmacder ni Abimelech ken ni Phicol, capitan dagiti buybuyotna, ket nagsublida iti daga dagiti Filisteos.

³³ Ket ni Abraham nagmula ti maysa a salamagi idiay Beer-seba, ket inawaganna idiay ti nagan ni Jehova, a Dios nga agnanayon.

³⁴ Ket ni Abraham nagnaed idiay daga dagiti Filisteos cadagiti adu nga aldaw.