Genesis 20 - Ti Biblia (1973)

Ni Abraham idiay Gerar. Libacanna ni Abimelech.

¹ Nanipud idiay nagluas ni Abraham a nagturong iti daga ti Abagatan, ket nagnaed iti nagbaetan ti Cades ken Shur; ket nagtaeng idiay Gerar.

² Ket ni Abraham insaona ti maipapan ken Sara nga asawana, Isu cabsatco: ket ni Abimelech nga ari ti Gerar nagbaon, ket innalana ni Sara.

³ Ngem ti Dios immay ken Abimelech iti maysa a tagtagainep ti rabii ket kinunana kencuana, Adtoy, natayca a lalaki maipuon iti babai nga innalam; ta isu adda asawana.

⁴ Ngem ni Abimelech saan a dimmenna kencuana; ket kinunana, Apo, patayemto uray ti nacion a nalinteg?

⁵ Dina aya kinuna caniac, Isu cabsatco? ket ti babai, isu met laeng kinunana, Isu cabsatco a lalaki: iti kinapudno ti pusoc ken iti kinadalus dagiti imimac, inaramidco daytoy.

⁶ Ket kinuna ti Dios kencuana iti tagtagainep, Wen, ammoc nga iti kinapudno ti pusom, inaramidmo daytoy, ket tinubengca met nga agbasol iti maicaniwas caniac gapuna a diac impalubos kenca a sagidem.

⁷ Ita, ngarud, isublim ti babai ken asawana; ta daytoy ti maysa a mammadto, ket icarcararagannacanto, ket agbiagcanto: ket no dicanto isubli, ammoem a mataycanto a di bumurong, sica ken amin a tattaom.

⁸ Ket ni Abimelech bimmangon a nasapa iti bigat, ket inayabanna amin dagiti adipenna, ket imbagana amin dagitoy a banbanag cadagiti lapayagda: ket dagiti tattao nagbutengda unay.

⁹ Idin ni Abimelech inayabanna ni Abraham, ket kinunana kencuana, Ania ti inaramidmo cadacami? ket ania ti nacabasolac kenca, ta inyegmo caniac ken iti pagariac ti dackel a basol? Inaramidmo caniac dagiti aramid a dida rebbeng a maaramid.

¹⁰ Ket ni Abimelech kinunana ken Abraham, Ania ti nakitam tapno inaramidmo daytoy a banag?

¹¹ Ket ni Abraham kinunana, Gapu ta impagarupco: Kinapudnona nga awan ti panagbuteng iti Dios ditoy a disso; ket patayendacto maipuon ken asawac.

¹² Ket maysa pay, pudno a cabsatco, babai nga anac ni amac, ngem saan nga anac ni inac; ket nagbalin nga asawac:

¹³ Ket naaramid nga idi pinagbarbariwasnac ti Dios nanipud iti balay ni amac, kinunac kencuana babai, Daytoy isu ti kinaimbag nga ipaaymonto caniac: iti isu-amin a disso a papanantanto, saoem a maipapan caniac, Isu cabsatco a lalaki.

¹⁴ Ket ni Abimelech nangala cadagiti carcarnero, ken vacvaca, ken adadipen a lallaki ken babbai, ket intedna ida ken Abraham, ket insublina kencuana ni Sara nga asawana.

¹⁵ Ket ni Abimelech kinunana, Adtoy, ti dagac iti sangoanam: agtaengca iti disso a pagayatam.

¹⁶ Ket ken Sara kinunana, Kitaem, iniccac ni cabsatmo iti sangaribu a bagi ti pirac: adtoy, isu kenca ti maipaay a pannacaabbong cadagiti mata dagiti isu-amin a makipagyan kenca; ket cadacuada amin nalintegca.

¹⁷ Ket ni Abraham nagcararag iti Dios: ket ti Dios pinaimbagna ni Abimelech ken ti asawana, ken dagiti ad-adipenna a babbai, ket naganacda.

¹⁸ Ta ni Jehova rinipcanna amin nga aanacan iti balay ni Abimelech, maipuon ken Sara nga asawa ni Abraham.