Genesis 2 - Ti Biblia (1973)

Maaramid ti Tao ket maisaad sadiay Eden. Maala ti Babai iti Tao.

¹ Ket nalpasen dagiti langit ken ti daga, ken amin nga orornosna.

² Ket iti maicapito nga aldaw ti Dios lineppasna ti gapuanan nga inaramidna, ket naginana iti maicapito nga aldaw cadagiti isu-amin a gapuanan nga inaramidna.

³ Ket binendicionan ti Dios ti aldaw a maicapito ket sinantificarna: agsipud ta kencuana ti naginanaanna cadagiti amin a gapuanan a ti Dios pinarsuana ken inaramidna.

⁴ Dagitoy isuda ti capupunganay dagiti langit ken ti daga idi a naparsuada, iti aldaw a pinangaramid ni Jehova a Dios ti daga ken ti langit.

⁵ Ket idi awan pay la ti mula ti langalang iti daga, ket awan pay ti roroot a timmubo, ta di pay pinagtudo ni Jehova Dios iti rabaw ti daga ken awan pay la idi ti tao, a mangtalon iti daga;

⁶ Ngem nagpangato ti maysa nga angep a naggapu iti daga, ket binisibisanna ti amin a rabaw ti daga.

⁷ Ket ni Jehova Dios binukelna ti tao iti tapuc ti daga, ket impuyotna iti agongna ti anges ti biag; ket ti tao nagbalin a cararua a sibibiag.

⁸ Ket ni Jehova Dios incabilna iti maysa a minuyongan iti daya, idiay Eden; ket insaadna idiay ti tao a binukelna.

⁹ Ket ni Jehova Dios pinatubona iti daga, amin a cayo a nacaay-ayo a makita, ken naimbag a canen; casta met ti cayo ti biag iti tengnga ti minuyongan, ken ti cayo ti pannacaammo ti imbag ken ti dakes.

¹⁰ Ket nagayus idiay Eden ti maysa a carayan a mangsibug iti minuyongan ket nanipud idiay nagcappat ti ayusna.

¹¹ Ti nagan ti umuna Pishon: daytoy isu ti manglawlaw iti amin ti daga ti Havila, isa a yan ti balitoc.

¹² Ket ti balitoc iti daydiay a daga nasayaat; adda idiay dagiti batbato a bedelio ken onix.

¹³ Ti nagan ti maicadua a carayan Gijon: daytoy ti manglawlaw iti amin a daga ti Etiopia.

¹⁴ Ket ti nagan ti maicatlo a carayan Hiddekel: daytoy ti agturong iti sangoanan ti daga nga Assiria. Ket ti maicappat a carayan isu ti Eufrates.

¹⁵ Ket ni Jehova Dios innalana ti tao ket insaadna iti minuyongan idiay Eden, tapno talonenna ken aywananna.

¹⁶ Ket ni Jehova Dios, imbilinna idi tao a kinunana, cadagiti amin a cayo iti minuyongan mangancanto a siwayawaya:

¹⁷ Ngem ti aggapu iti cayo ti pannacaammo ti imbag ken ti dakes saanmonto a canen: ta iti aldaw a pannanganmo iti daydiay mataycanto a di bumurong.

¹⁸ Ket ni Jehova Dios kinunana, Saan a nasayaat nga agmaymaysa ti tao: yaramidacto ti catulonganna a maitutop kencuana.

¹⁹ Ni Jehova Dios binukelna iti daga amin nga an-animal iti daga, ken amin a tumatayab cadagiti langit; ket inyegna ida iti tao tapno makitana no casano ti panangpanaganna cadacuada: ket cas ti pinangnagan ti tao iti amin a parsua a sibibiag, dayta isu ti naganna.

²⁰ Ket pinanaganan ti lalaki amin nga animal a naamo, ken tumatayab iti langlangit, ken ti amin a narungsot iti away; ngem ti tao saan a nacasarac ti catulongan a maitutop kencuana.

²¹ Ket ni Jehova Dios immapayna ti nargaan a turog iti tao, ket nacaturog; ket innalana ti maysa cadagiti paragpagna, ket ti nangalaanna rinipcanna ti lasag:

²² Ket ti paragpag nga innala ni Jehova Dios pinagbalinna a babai, ket inyegna iti tao.

²³ Ket di tao, kinunana, Daytoy ita isu ti tulang dagiti tulangco, ken lasag ti lasagco: isu mapanagananto, Babai, ta iti Tao ti nacaalaanna.

²⁴ Gapuna ti lalaki panawannanto ti amana ken ti inana, ket tumiponto iti asawana, ket agbalindanto a maymaysa a lasag.

²⁵ Ket isuda a dua ti lalaki ken ti asawana, silamolamoda idi ket dida nagbain.