Genesis 18 - Ti Biblia (1973)

Tallo nga Angel sumarungcarda ken Abraham. Naicari manen ti maysa nga anac a lalaki. Ti Nakedngan iti Sodoma. Ti Panangibabaet ni Abraham.

¹ Ket ni Jehova nagparang kencuana iti caroblean ni Mamre, idi adda a situtugaw iti ruangan ti sapaw, iti capudot ti aldaw,

² Ket intangadna dagiti matana, ket kinitana, ket, adtoy, tallo a lallaki sitatacderda idi iti sangoananna; ket idi nakitana ida napan simmabet cadacuada nanipud iti ruangan ti sapaw, ket nagrucnoy agingga iti daga,

³ Ket kinunana, Apoc, no ita nasaracac ti parabur cadagiti matam, dawatec kenca a dica labasan ti adipenmo:

⁴ Maala ita coma ti bassit a danum, ket buggoanyo dagiti sacsacayo, ket aginanacayo iti linong ti cayo:

⁵ Ket mangyegacto iti maysa a sangcasacmol a tinapay, ket pakirdenyo ti pusoyo; ket iti calpasanna, lumabascayto: yantangay nacadanoncayo iti adipenyo. Ket kinunada, Aramidem cas ti sinaom.

⁶ Ket ni Abraham napan a nagdardaras ken Sara iti sapaw, ket kinunana, Agdarasca a mangisagana iti tallo a casucat ti nasayaat nga bellaay, gamayem, ket agaramidca iti tinapay.

⁷ Ket ni Abraham nagtaray iti ayan dagiti vaca, ket nangala iti maysa nga urbon a naganus ken nasayaat, ket intedna iti adipen; ket dinardarasna nga insagana.

⁸ Ket nangala iti mantequilla ken gatas, ken ti urbon a sinaganana, ket incabilna iti sangoda; ket isu nagtacder iti sibayda iti linong ti cayo, ket nanganda.

⁹ Ket kinunada kencuana, Adino ti yan ni Sara nga asawam? Ket isu simmungbat, Adtoy, idiay sapaw.

¹⁰ Ket kinunana, Agpaypayso nga agsubliacto kenca iti castoy, met laeng a tiempo ket, adtoy, ni Sara nga asawam aganacto iti lalaki. Ket ni Sara nagdengngeg iti ruangan ti sapaw, nga adda iti licudanna.

¹¹ Ita ni Abraham ken ni Sara lacay ken baketdan, ket adu ti napalabasdan a tawen; simmardengen ken Sara ti panagcadawyan dagiti babbai.

¹² Ket ni Sara nagcatawa nga is-isu a cunana, calpasan a bimmaketacon agragsacacto, idinto a ni apoc lacay metten?

¹³ Ket ni Jehova kinunana ken Abraham, Apayapay nagcatawa ni Sara a cuncunana, Pudno aya nga aganacacto, ket siac baketacon?

¹⁴ Adda aya banag a naricut unay ken Jehova? Iti tiempo a nakedngan agsubliacto kenca, no madanon daytoy met la a tiempo, ket ni Sara addanto anacna.

¹⁵ Idin ni Sara naglibac a kinunana, Saanac a nagcatawa, ta nagbuteng. Ket isu kinunana, Saan: no di ket nagcatawaca.

¹⁶ Ket dagiti lallaki timmacderda idiay, ket kinitada ti Sodoma, ket ni Abraham kimmuyog cadacuada a nangitulod cadacuada iti dana.

¹⁷ Ket ni Jehova kinunana, Ilimedconto aya ken Abraham ti aramidec;

¹⁸ Idinto nga agbalinto a di bumurong ni Abraham a dackel ken napigsa a nacion, ket idinto a benditonto kencuana ti isu-amin dagiti nasnacion ti daga?

¹⁹ Ta siac am-ammoc, nga ibilinnanto cadagiti annacna ken iti balayna iti calpasanna, ket surotenda ti dalan ni Jehova, nga aramidenda ti kinalinteg ken pangngocom; tapno tungpalen ni Jehova ken Abraham ti nasaona kencuana.

²⁰ Ket ni Jehova kinunana kencuana, Agsipud ta ti ariwawa ti Sodoma ken Gomorra dackel, ken gapu ta ti basolda nacaro unay;

²¹ Umulogacto ita, ket kitaecto no cas iti ariwawada a dimmanon caniac inaramidda laeng; ket no saan, ammocto.

²² Ket simmina idiay dagiti lallaki ket tinurongda ti Sodoma; ngem ni Abraham nagtactacder pay laeng iti sangoanan ni Jehova.

²³ Ket ni Abraham immasideg ket kinunana, Pucawem met aya ti nasingpet a maicanunung iti nadangkes?

²⁴ Nalabit adda limapulo a nasingpet iti uneng ti ili; pucawem met, ket dicanto ispalen ti disso maipuon cadagiti limapulo a nasingpet nga addada iti unegna?

²⁵ Adayu coma kenca ti panagaramid ti casta, a patayem ti nasingpet a maicanunung ti nadangkes, nga iti casta ti nasingpet maipada met ti nadangkes; adayu coma dayta kenca: Saan aya a ti Ocom ti amin a daga agaramid iti nalinteg?

²⁶ Ket ni Jehova, kinunana, No masaracacto idiay Sodoma dagiti limapulo a nasingpet iti uneg ti ili, ispalecto ngarud amin daytoy a yan maipuon cadacuada.

²⁷ Ket ni Abraham simmungbat ket kinunana, Adtoy ita, rinugiac ti nakisao iti Apo, uray tapucac laeng ken dapo:

²⁸ Nalabit agcurangto dagiti limapulo a nasingpet: pucawemto, maipuon cadagidiay lima nga curang, ti amin nga ili? Ket kinunana, Saanconto a pucawen, no masaracac dagiti uppat a pulo ket lima a sadiay.

²⁹ Ket nakisao manen kencuana, ket kinunana, Nalabit a masaracanto idiay dagiti uppat a pulo. Ket kinunana, Diacto aramiden gapu iti pateg dagiti uppat a pulo.

³⁰ Ket ni Abraham kinunana, O, saan coma nga agunget ti Apo, ket agsaoacto; nalabit a masaracanto idiay dagiti tallopulo. Ket kinunana, Diacto aramiden, no masaracacto dagiti tallopulo sadiay.

³¹ Ket kinunana, Adtoy ita, naiganuatco ti nakisao iti Apoc: nalabit a masaracanto idiay dagiti duapulo. Ket kinunana, Diacto pucawen gapu cadagiti duapulo.

³² Ket kinunana, O saan coma nga agpungtot ita ti Apo, ket agsaoacto iti maminsan pay: nalabit masaracanto idiay dagiti sangapulo: Ket kinunana, Saanconto a pucawen gapu cadagiti sangapulo.

³³ Ket pimmanao ni Jehova, a nalpas ti pannakisasaona ken Abraham: ket ni Abraham nagsubli iti yanna.