Genesis 17 - Ti Biblia (1973)

Ti Tulag ti Cugit. Maicari ti Pannacayanac ni Isaac. Nacugit ti Sangacabbalayan ni Abram.

¹ Ket idi a ni Abram nagtawen iti siam a pulo ket siam, ni Jehova nagparang ken Abram, ket kinunana kencuana, Siac ti Dios a Mannacabalin amin; magnaca iti sangoc ket awan coma ti pagcurcurangam.

² Ket aramidecto ti pagtulaganta, ket pagaduencanto iti nawadwad unay.

³ Ket ni Abram nagpacleb: ket ti Dios nagsao kencuana, a cunana,

⁴ No maipapan caniac, adtoy, ti tulagco adda kenca, ket sicanto ti ama ti maysa a caadu a pagpagarian.

⁵ Ket dinto maawaganen ti naganmo nga Abram; ngem ti naganmo isunto Abraham; ta incabilcan nga ama dagiti adu a pagpagarian.

⁶ Ket pagbungaencanto iti nawadwad unay, ket aramidencanto a pagpagarian, ket ar-ari agtauddanto kenca.

⁷ Ket buangayecto ti pagtaluganta, ken cadagiti putotmo iti calpasam, bayat dagiti caputotanda, nga agnanayon a nomo, tapno siac ti Diosmo ken Dios dagiti putotmo iti calpasam.

⁸ Ket itedconto kenca ken iti putotmo, iti calpasam, ti daga dagiti naggangannaetam, amin ti daga a Canaan, a tagicucuaen iti agnanayon; ket siacto ti Diosda.

⁹ Ket ti Dios kinunana ken Abraham, Ket no maipapan kenca, ti tulagco salimetmetamto, sica ken dagiti putotmo iti calpasam, bayat dagiti caputotanda.

¹⁰ Daytoy ti tulagco a salimetmetanyonto, siac ken sica ken dagiti putotmo iti calpasam: tumunggal lalaki cadacayo macugitto.

¹¹ Macugitcayto; ket daytoyto ti pagilasinan ti tulagta.

¹² Ket ti adda walo nga aldawna cadacayo macugitto, amin a lallaki cadagiti caputotanyo, ti mayanac iti balay, wenno ti magatang iti pirac iti uray siasino a gangannaet, a saan a caputotam.

¹³ Ti mayanac iti balaymo, ken ti magatang iti piracmo, masapul a macugitda: ket addanto ti tulagco iti lasagyo a maipaay iti awan patinggana a panagcaycaysa.

¹⁴ Ket ti lalaki a di nacugit a saan a nacugit iti lasag ti akinsango a cudilna, daydiay a lalaki, maipusayto cadagiti cailianna; ti tulagco rinacracna.

¹⁵ Ket ti Dios kinunana ken Abraham, Ni Sarai nga asawam saanmonto a nagananen Sarai, ngem ti nagannanto Sara.

¹⁶ Ket bendicionacto, ket casta met nga iccancanto iti yanacna a lalaki: pudno, bendicionacto, ket isunto ti ina dagiti pagpagarian: ar-ari dagiti il-ili agtauddanto kencuana.

¹⁷ Idin ni Abraham nagpacleb ket nagcatawa, ket kinunana iti pusona, Ti lalaki nga sangagasut dagiti tawenna macayanacto iti maysa nga anac? Ket ni Sara, nga siam a pulo dagiti tawenna aganacto?

¹⁸ Ket ni Abraham kinunana iti Dios, Sapay, ta ni Ismael agbiag coma ti sangoanam!

¹⁹ Ket ti Dios kinunana, Pudno unay, ni Sara nga asawam mangyanacto kenca iti maysa a lalaki, ket panaganamto iti Isaac: ket patalgedacto ti tulagco kencuana, a panagcaycaysa nga agnanayon cadagiti putotna iti calpasanna.

²⁰ Ket maipanggep ken Ismael, dinengngegca: adtoy, binendicionacon, ket aramidecto nga agbunga, ket pagaduecto iti dackel unay; sangapulo ket dua a pangpangolo putotennanto.

²¹ Ngem ti tulagco buangayecto ken Isaac, isu a yanacto kenca ni Sara iti daytoy a tiempo a nakedngan ti sumaruno a tawen.

²² Ket lineppasna ti nakisao kencuana, ket immuli ti Dios a pinanawanna ni Abraham.

²³ Ket ni Abraham innalana ni Ismael nga anacna, ken isu-amin a nayanac iti balayna, ken amin a nagatang iti piracna, amin a lallaki iti balay ni Abraham, ket kinugitna ida iti akinsango a cudilda iti daydiay met laeng nga aldaw, cas ti panangibaga idi ti Dios kencuana.

²⁴ Ket ni Abraham nagtawen iti siam a pulo ket siam idi nacugit iti akinsango a cudilna.

²⁵ Ket ni Ismael nga anacna nagtawen iti sangapulo ket tallo idi nacugit iti akinsango a cudilna.

²⁶ Iti daydi met laeng nga aldaw ni Abraham, nacugit ken ni Ismael nga anacna.

²⁷ Ket isu-amin a lallaki iti balayna, dagiti nayanac iti balay, ken dagiti nagatang iti pirac iti gangannaet, nakipagcugitda kencuana.