Genesis 16 - Ti Biblia (1973)

Da Sarai ken Agar. Ti Pannacapagtalaw ni Agar. Ti Pannacayanac ni Ismael.

¹ Ket ni Sarai, nga asawa ni Abram, saan a nangyanac kencuana cadagiti annac: ket isu adda idi maysa nga adipenna a taga Egipto, nga agnagan iti Agar.

² Ket ni Sarai kinunana ken Abram, Adtoy ita, ni Jehova pinaritannac nga aganac; dawatec kenca a sumrecca coma iti adipenco; nalabit addanto annacco kencuana. Ket immannugot ni Abram iti sao ni Sarai.

³ Ket ni Sarai, nga asawa ni Abram, innalana ni Agar a taga Egipto nga adipenna, iti calpasan dagiti sangapulo a tawen a pinagnaed ni Abram iti daga a Canaan, ket intedna ken Abram, nga asawana, tapno asawaenna.

⁴ Ket isu simrec ken Agar, ket nagsicug, ket idi nadlawna a masicugen nalais cadagiti matana ni apona a babai.

⁵ Ket ni Sarai kinunana ken Abram, Ti pannacalaisco maipabaclay coma kenca: insaadco ti adipenco iti barucongmo, ket idi nakitana a masicug, siac nauy-uyawac cadagiti matana: ni Jehova ocomennata coma.

⁶ Ngem ni Abram kinunana ken Sarai, Adtoy, ti adipenmo adda iti imam; aramidem kencuana dayta naimbag cadagita matam. Idin ni Sarai pinarigatna, ket isu nagtalaw iti sangoananna.

⁷ Ket ti angel ni Jehova nasaracanna iti sibay ti maysa nga ubbog ti danum iti let-ang, iti sibay ti ubbog nga adda iti dalan nga agturong idiay Sur.

⁸ Ket kinunana kencuana, Agar, adipen ni Sarai, adino ti naggapuam? ket sadino ti papanam? Ket isu kinunana, Agtalawac iti imatang ni Sarai nga apoc.

⁹ Ket ti angel ni Jehova kinunana kencuana, Agsublica ken apom, ket agpacumbabaca cadagiti imana.

¹⁰ Ket ti angel ni Jehova kinunana pay, Paaduecto unay ti putotmo, a dinto mabilang maipuon iti caaduda.

¹¹ Ket ti angel ni Jehova kinunana, Adtoy, sica masicugca, ket aganaccanto iti maysa a lalaki; ket panaganamto iti Ismael, ta nangngeg ni Jehova ti pagelmo.

¹² Ket isunto cas la asno a naatap iti tengnga dagiti tattao; ti imana maicaniwasto iti tumunggal tao, ket ti ima ti tumunggal tao maicaniwasto kencuana; ket agnaedto iti sangoanan dagiti isu-amin a cacabsatna.

¹³ Ket inawaganna ti nagan ni Jehova a nakisao kencuana, Sica maysaca a Dios a macakita: ta kinunana, Sias diac nakita aya ditoy ti nacakita caniac?

¹⁴ Gapuna a nanaganan ti bobon Beerlahai-roi; adtoy, adda iti nagbaetan ti Cades ken Bered.

¹⁵ Ket nangyanac ni Agar ken Abram iti maysa a lalaki; ket impanagan ni Abram iti anacna nga inyanac ni Agar Ismael.

¹⁶ Ket ni Abram nagtawen iti walopulo ket innem, idi ni Agar inyanacna ken Abram ni Ismael.