Genesis 15 - Ti Biblia (1973)

Ti Icari ni Jehova ken Abram.

¹ Calpasan dagitoy a banbanag immay ti sao ni Jehova ken Abram iti maysa a parparmata, a kinunana, Dica agbuteng, Abram: siac ti calasagmo ken ti gungonam a nawadwad unay.

² Ket ni Abram kinunana, O Apo Jehova, ania ti itdemto caniac, idinto a siac aglabasac nga awan anacco, ket ti agtagicuanto iti balayco isu ni Eliezer a taga Damasco?

³ Ket ni Abram kinunana, kitaem, saannac nga iniccan iti putot: ket, adtoy, a ti maysa a nayanac iti balayco isu ti agtawid caniac.

⁴ Ket, adtoy, ti sao ni Jehova immay kencuana a cunana, daytoy a lalaki saanto nga agtawid kenca; no di ket ti agtaudto iti unegmo isu ti agtawidto kenca.

⁵ Ket impanna iti ruar, ket kinunana, Kitaem ita ti langit, ket bilangem dagiti bitbitwen, no mabalinmo a bilangen: ket kinunana kencuana, Castanto dagiti putotmo.

⁶ Ket pinatina ni Jehova ket daytoy imbilangna kencuana a kinalinteg.

⁷ Ket kinunana kencuana, Siac ni Jehova a nangala kenca idiay Ur dagiti Caldeos tapno itedco kenca daytoy a daga a tawidem.

⁸ Ket isu kinunana, O Apo Jehova, Ania ti pacaammoacto nga agtawidacto iti dayta?

⁹ Ket kinunana kencuana, Yalaannac iti bumalasang a vaca nga agtawen iti tallo, ken maysa a calding a babai nga agtawen iti tallo, ken maysa a carnero a lalaki nga agtawen iti tallo, maysa met a pagaw, ken maysa nga urbon a calapati.

¹⁰ Ket isu innalana amin dagitoy, ket pinisina ida, ket incabilna ti tunggal guddua iti sango ti cagudduana: ngem dagiti tumatayab saanna ida a pinisi.

¹¹ Ket bimmaba dagiti tumatayab iti rabaw dagiti bangcay, ket ni Abram binugawna ida.

¹² Ket idi a lumlumnec ti init, immapay ti nauneg a turog ken ni Abram; ket, adtoy, maysa a dackel nga alliaw a nasipnget immapay kencuana.

¹³ Ket kinunana ken Abram, Pudno nga ammom a dagiti putotmo aggangannaetdanto iti daga a dida cucua, ket agservidanto cadacuada; ket parigatendanto ida cadagiti uppat a gasut a tawtawen;

¹⁴ Ket dayta met a nacion a pagserviandanto, siac ocomecto: ket no malpas daytoy, pumanawdanto agraman adu a sanicua.

¹⁵ Ngem sica mapancanto a sitatalna cadagiti ammam; maiponponcanto iti naimbag a kinalacay.

¹⁶ Ket iti maicappat a caputotan, agsublidanto ditoy: gapu ta saan pay a napno ti kinadakes ti Amorreo.

¹⁷ Ket naaramid a idi nacalneken ti init, ket nagsipnget, adtoy, ti maysa nga horno a siaasuc, ken maysa nga aluten a sidadarang a naglasat iti baet dagidiay a pisi.

¹⁸ Iti daydiay nga aldaw inaramid ni Jehova ti maysa a tulag ken Abram a cunana, Iti putotmo intedcon daytoy a daga manipud iti carayan ti Egipto, inggana iti carayan a dackel, ti carayan nga Eufrates:

¹⁹ Ti Cineo, ken ti Cenezco, ken ti Cadmoneo.

²⁰ Ken ti Jeteo, ken ti Ferezeo, ken dagiti Rafeo,

²¹ Ken ti Amorreo, ken ti Cananeo, ken ti Gergeseo, ken ti Jebuseo.