Genesis 14 - Ti Biblia (1973)

Uppat nga Ar-ari makigubatda cadagiti Lima iti Labong ti Siddim. Dagiti Uppat nga Ar-ari cayawanda ni Lot. Ni Abram Ispalenna ni Lot. Ni Melquisedec bendicionanna ni Abram.

¹ Ket naaramid a, cadagiti al-aldaw ni Amrafel nga ari ti Sinar, ni Arioc nga ari ti Elasar, ni Codor-laomer nga ari ti Elam, ken ni Tadal nga ari dagiti Goiim,

² A namuangayda iti gubat a maibusor ken Bera nga ari ti Sodoma, ken Birsa nga ari ti Gomorra, ken ni Sinab nga ari ti Adma, ken Semeber nga ari ti Seboim, ken ti ari ti Bela (nga isu Zoar).

³ Amin dagitoy nagtitiponda iti lobong ti Siddim (nga isu ti Taaw ti Asin).

⁴ Cadagiti sangapulo ket dua a tawen nagservida ken Codor-laomer, ket iti maicasangapulo ket tallo a tawen immalsada.

⁵ Ket iti maicasangapulo ket uppat a tawen, immay ni Codor-laomer, ken dagiti ar-ari a cadduana, ket rinanggasanda dagiti Rafaim idiay Astarot-carnaim, ken dagiti Zuzim idiay Ham, ken dagiti Emin idiay Savecariataim,

⁶ Ken dagiti Horeos idiay bantayda a Seir, agingga iti Faran, nga, adda iti abay ti let-ang.

⁷ Ket nagsublida, ket dimmanonda idiay Em-mispat (nga isu ti Cades), ket dinadaelda amin ti daga dagiti Amelecitas, ken casta met dagiti Amorreo, nga agnaed idi idiay Hasason-tamar.

⁸ Ket rimmuar ti ari ti Sodoma, ken ti ari ti Gomorra, ken ti ari ti Adma, ken ti ari ti Seboim, ken ti ari ti Bela (nga isu ti Zoar); ket inornosda ti bacal a bumusor cadacuada idiay lobong ti Siddim;

⁹ Maibusorda cada Codor-laomer nga ari ti Elam, ken Tidal nga ari ti Goiim, ken Amrafel nga ari ti Sinar, ken Arioc nga ari ti Elasar; uppat nga ar-ari a maibusor cadagiti lima.

¹⁰ Ket ti lobong ti Siddim napno cadagiti palpalab-ug a nagalagalaan; ket nagtalaw ti ari ti Sodoma ken ti ari ti Gomorra, ket natnagda idiay, ket dagiti natda nagcamangda iti bantay.

¹¹ Ket innalada amin ti cucua ti Sodoma ken Gomorra, ken amin a taraonda, ket napandan.

¹² Ket innalada met ni Lot, anac a lalaki ti cabsat ni Abram nga isu a nagnaed idiay Sodoma, ken ti cucuana, ket pimmanawdan.

¹³ Ket immay ti maysa a nacatalaw, ket inyammona ken Abram nga Hebreo: daytoy nagnaed iti abay ti caroblean ni Mamre, nga Amorreo, cabsat a lalaki ni Escol, ken cabsat a lalaki ni Aner; ket dagitoy addada idi a sicacanapon ken Abram.

¹⁴ Ket idi nga nangngeg ni Abram a ti cabsatna a lalaki nacayawan, inturongna dagiti lallakina a nasursuroan, a nayanac iti balayna, tallogasut, sangapulo ket walo, ket nagcamat agingga iti Dan.

¹⁵ Ket biningaybingayna ti buyotna a bumusor cadacuada iti rabii, isu ken dagiti ad-adipenna, ket kinabilna ida, ket kinamatna ida agingga iti Hobah, nga adda iti macatigid ti Damasco.

¹⁶ Ket pinagsublina amin dagiti cucua ken casta met a pinasublina ni cabsatna a Lot, ket ti cucuana, ken casta met dagiti babbai, ken dagiti umili.

¹⁷ Ket ti ari ti Sodoma napan simmabet kencuana idi nagsubli iti panangcabilna ken Codor-laomer, ken cadagiti ar-ari a kinadduana, iti lobong ti Save (nga isu a Lobong ti Ari).

¹⁸ Ket ni Melquisedec nga ari ti Salem nangiruar ti tinapay ken arac: ket isu idi ti padi ti Dios a Cangatoan unay.

¹⁹ Ket binendicionanna, ket kinunana, Bendito coma ni Abram iti Dios a Cangatoan unay, agtagicua cadagiti langit ken daga:

²⁰ Ket bendito coma ti Dios a Cangatoan, a nangyawat cadagiti cabusormo ita imam. Ket ni Abram intedna kencuana ti apagcapullo iti isu-amin.

²¹ Ket ti ari ti Sodoma kinunana ken Abram, Yawatmo caniac dagiti tattao, ket alaem dagiti cucua a maipaay kenca.

²² Ket ni Abram kinunana iti ari ti Sodoma, Inngatoc ti imac ken Jehova, a Dios a Cangatoan unay, a makincucua iti langit ken iti daga.

²³ Nga awanto ti alaec a maysa a labag wenno maysa a cordon ti zapatos, wenno uray ania a cucuam, di la ket ta cunaem, Siac pinabacnangco ni Abram:

²⁴ Malacsid laeng ti kinnan dagiti bumbumaro, ken ti bingay dagiti lallaki a nakicuyog caniac, nga da Aner, Escol, ken Mamre; bay-am nga alaenda ti apagda.