Genesis 13 - Ti Biblia (1973)

Ni Abram agsubli idiay Canaan. Sumina ken Lot.

¹ Ket ni Abram simmang-at nanipud iti Egipto, isu, ken ti asawana, agraman amin nga adda kencuana, ken ni Lot a kinacuyogda, a nagpaabagatan.

² Ket ni Abram nabacnang unay idi cadagiti an-animal, ken pirac, ken balitoc.

³ Ket nagsubli nanipud iti Abagatan agpapan iti Betel, agpapan iti disso a nagsapawanna idi punganay, a nagbaetan ti Betel ken Ai,

⁴ Agtungpal iti yan ti altar, nga inaramidna sadiay idi punganay: ket idiay inawagan ni Abram ti nagan ni Jehova.

⁵ Ket casta met ni Lot, a kimmuyog ken Abram, adda carnerona, ken vacana, ken sapsapawna.

⁶ Ket ti daga dina ida nalaon, tapno agnaedda nga agtitipon: ta ti sanicuada adu idi, isu a dida nacabalinan nga agnaed a nagtitipon.

⁷ Ket adda susic idi cadagiti pastor ti an-animal ni Abram: ken cadagiti pastor ti an-animal ni Lot: ket ti Cananeo ken ti Ferezeo nagnaedda met idi iti daga.

⁸ Ket kinuna ni Abram ken Lot, Dawatec kenca, nga awan coma ti susic, cadata, ken cadagiti pastorco ken cadagiti pastormo; ta agcabsatta.

⁹ Awan aya ti amin a daga iti sangoanam? Dawatec kenca, a suminaca cadi caniac; no mapancanto iti akincatigid, siac mapanacto ngarud iti akincanawan wenno no piliemto ti akincanawan, mapanacto ngarud iti makincatigid.

¹⁰ Ket intannawag ni Lot dagiti matana, ket nakitana amin ti Tanap ti Jordan, nga nasayaat ti pannacapadanumda iti isu-amin a disso idi saan pay a dinadael ni Jehova ti Sodoma ken ti Gomorra, cas ti minuyongan ni Jehova, cas ti daga nga Egipto, no cas sumrecca idiay Zoar.

¹¹ Iti casta ni Lot pinilina a cucuana amin ti Tanap ti Jordan; ket nagna ni Lot a nagpadaya: ket nagsinada ti maysa ken maysa.

¹² Ni Abram nagtaeng iti daga a Canaan, ket ni Lot nagnaed cadagiti il-ili ti Tanap, ket inyalisna ti sapawna nga agtungpal iti Sodoma.

¹³ Ket dagiti tattao a taga Sodoma dakesda idi ken managbasolda unay a maibusor ken Jehova.

¹⁴ Ket ni Jehova kinunana ken Abram, calpasan ti pannacaisina ni Lot kencuana, Itannawagmo ita dagiti matam, ket kitaem manipud iti disso a yanmo, nga agpamianan, ken agpabagatan, ken agpadaya, ken agpalaud:

¹⁵ Ta amin ti daga a makitam, itedconto kenca, ken iti putotmo iti agnanayon.

¹⁶ Ket pagbalinecto ti putotmo cas iti tapuc ti daga; a no adda macabilang iti tapuc ti daga, casta met ti putotmo mabilangto.

¹⁷ Tumacderca, pagnaem ti daga iti pagatidduganna ken iti pagacabaanna ta itdecto kenca.

¹⁸ Ket ni Abram inyalisna ti sapawna, ket napan nagnaed iti abay ti caroblean ni Mamre, nga adda sadiay Hebron, ket namangon idiay ti maysa nga altar nga agpaay ken Jehova.