Genesis 11 - Ti Biblia (1973)

Ti Tore ti Babel. Ti Pannacariribuc dagiti Pagsasao. Putputot ni Sem. Ti Sangacabbalayan ni Tare.

¹ Ket iti amin a daga maymaysa idi ti pagsasao ken maymaysa ti pannacabalicasna.

² Ket naaramid nga, idi nagpagpagnada iti daya, nasaracanda iti maysa a tanap iti daga a Senar; ket nagtaengda sadiay.

³ Ket kinuna ti maysa ken maysa intayon agaramidtay coma cadagiti ladrillo, ket gebbaentayo ida a nasayaat. Ket adda idi cadacuada dagiti ladrillo a pannacabatoda, ken ti galagala a pannacamasada.

⁴ Ket kinunada, intayon mangbangontayo coma iti maysa a ciudad, ken maysa a torre, a dumanon coma ti tuctocna sadi langit, ket aramidentayo ti pacaidayawantayo; di la ket ta maiwaraswarastayo iti rabaw ti langa ti amin a daga.

⁵ Ket bimmaba ni Jehova tapno kitaenna ti ciudad ken ti torre a bangbangonen idi dagiti annac ti tao.

⁶ Ket ni Jehova kinunana, Adtoy, maymaysada nga ili, ket maymaysa ti pagsasaoda; ket daytoy rinugianda nga aramiden: ket ita awanto ti mangtuben cadacuada iti panangaramidda cadagiti amin a panggepda nga aramiden.

⁷ Bumabatayo coma ket riribukentayo ti pagsasaoda sadiay tapno dida agkikinnaawatan iti pagsasaoda.

⁸ Casta ti panangiwaras ni Jehova cadacuada iti rabaw ti langa ti amin a daga nanipud sadiay: ket binaybayanda ti panangbangonda iti ciudad.

⁹ Gapu itoy ti ciudad nainaganan ti Babel; gapu ta sadiay pinariribuc ni Jehova ti pagsasao ti amin a daga: ket nanipud sadiay inwaras ida ni Jehova iti rabaw ti amin a daga.

¹⁰ Dagitoy isuda ti caputotan ni Sem. Nagtawen ni Sem iti sangagasut, ket pinutotna ni Arfajad, calpasan ti layus iti maicadua a tawen.

¹¹ Ket nagbiag ni Sem iti limagasut a tawen iti calpasan ti panangputotna ken Arfajad, ket pinutotna dagiti annac a lallaki ken babbai.

¹² Ket nagbiag ni Arfajad iti tallopulo ket lima a tawen, ket pinutotna ni Sela:

¹³ Ket nagbiag ni Arfajad, calpasan ti panangputotna ken Sela, iti uppat a gasut ket tallo a tawen, ket pinutotna dagiti annac a lallaki ken babbai.

¹⁴ Ket nagbiag ni Sela iti tallopulo a tawen, ket pinutotna ni Eber:

¹⁵ Ket nagbiag ni Sela, calpasan ti panangputotna ken Eber, iti uppat a gasut ket tallo a tawen, ket pinutotna dagiti annac a lallaki ken babbai.

¹⁶ Ket nagbiag ni Eber iti tallopulo ket uppat a tawen, ket pinutotna ni Peleg:

¹⁷ Ket nagbiag ni Eber, calpasan ti panangputotna ken Peleg, iti uppat a gasut ket tallopulo a tawen; ket pinutotna dagiti annac a lallaki ken babbai.

¹⁸ Ket nagbiag ni Peleg iti tallopulo a tawen, ket pinutotna ni Reu,

¹⁹ Ket nagbiag ni Peleg, calpasan ti panangputotna ken Reu, iti duagasut ket siam a tawen, ket pinutotna dagiti annac a lallaki ken babbai.

²⁰ Ket nagbiag ni Reu iti tallopulo ket dua a tawen, ket pinutotna ni Serug:

²¹ Ket nagbiag ni Reu, calpasan ti panangputotna ken Serug, iti duagasut ket pito a tawen, ket pinutotna dagiti annac a lallaki ken babbai.

²² Ket nagbiag ni Serug iti tallopulo a tawen, ket pinutotna ni Nacor:

²³ Ket nagbiag ni Serug, calpasan ti panangputotna ken Nacor, iti duagasut a tawen, ket pinutotna dagiti annac a lallaki ken babbai.

²⁴ Ket nagbiag ni Nacor iti duapulo ket siam a tawen, ket pinutotna ni Tare:

²⁵ Ket nagbiag ni Nacor, calpasan ti panangputotna ken Tare, iti sangagasut, sangapulo ket siam a tawen, ket pinutotna dagiti annac a lallaki ken babbai.

²⁶ Ket ni Tare nagbiag iti pitopulo a tawen, ket pinutotna ni Abram, ni Nacor, ken ni Haran.

²⁷ Ngarud dagitoy dagiti caputotan ni Tare. Ni Tare pinutotna ni Abram ni Nacor ken ni Haran; ket ni Haran pinutotna ni Lot.

²⁸ Ket natay ni Haran nga immun-una ngem ni amana a Tare, iti daga a nacayanacanna, sadiay Ur dagiti Caldeos.

²⁹ Ket nangala da Abram ken ni Nacor cadagiti asawada: ti nagan ti asawa ni Abram Sarai; ket ti nagan ti asawa ni Nacor Milca, babai nga anac ni Haran, ama ni Milca, ken ama ni Isca.

³⁰ Ket ni Sarai lupes idi; awan anacna.

³¹ Ket innala ni Tare ni Abram nga anacna, ken ni Lot nga anac ni Haran, nga anac a lalaki ti anacna a lalaki, ken ni Sarai, a manugangna nga asawa ni Abram nga anacna; ket pimmanaw a naicuyog cadacuada idiay Ur dagiti Caldeos, tapno mapanda iti daga a Canaan; ket nacadanonda sadiay Haran, ket nagnaedda sadiay.

³² Ket dagiti aldaw ni Tare duagasut ket lima a tawen: ket ni Tare natay idiay Haran.