Genesis 10 - Ti Biblia (1973)

Dagiti Putputot ni Noe.

¹ Dagitoy ngarud dagiti caputotan dagiti lallaki nga annac ni Noe, nga isuda Sem, Cam, ken Jafet: ket cadacuada nagtaud dagiti lallaki nga annac iti calpasan ti layus.

² Dagiti lallaki nga annac ni Jafet: ni Gomer, ken Magog, ken Madai, ken Javan, ken Tubal, ken Mesec, ken Tiras.

³ Ket dagiti lallaki nga annac ni Gomer: ni Ascenez, ken Rifat, ken Togorma.

⁴ Ket dagiti lallaki nga annac ni Javan: ni Elisa, ken Tarsis, ken Cetim, ken Dodanim.

⁵ Dagitoy ti nacabingbingayan dagiti purpuro dagiti pagpagarian iti dagdagada, tunggal maysa cas iti pagsasaona, mayannurot cadagiti familiada, cadagiti pagpagarianda.

⁶ Ket dagiti lallaki nga annac ni Cam: ni Cus, ken Mizraim, ken Fut, ken Canaan.

⁷ Ket dagiti lallaki nga annac ni Cus: ni Seba, Hevila, ken Sabta, Raama, ken Sabteca; ket dagiti lallaki nga annac ni Raama: ni Saba ken Dedan.

⁸ Ket ni Cus pinutotna ni Nimrod: daytoy ti nangrugian ti naidamdamag iti kinamannacabalin iti daga.

⁹ Isu maysa a mannacabalin a mangnganup idi iti imatang ni Jehova: gapu a masasao, Cas ken Nimrod a mannacabalin a mangnganup iti imatang ni Jehova.

¹⁰ Ket ti nangrugian ti pagarianna idi ti Babel, ken Erac, ken Acad, ken Calne, iti daga a Sinnaar.

¹¹ Nanipud iti dayta a daga, napan iti Assur, ket binangonna ti Ninive, ken Rehobot-ir, ken Cale,

¹² Ken ti Resen a nagbaetan ti Ninive ken Cale (isu met laeng ti dackel a ili).

¹³ Ket ni Mizraim pinutotna ni Ludim, ken Anamin, ken Lahabim, ken Naftuhim,

¹⁴ Ken Patrusim, ken Casluhim, (isu a nagtaudan dagiti Filisteos), ken Caftorim.

¹⁵ Ket ni Canaan pinutotna ni Sidon, nga inauna nga anacna, ken ni Jet,

¹⁶ Ken ti Jebuseo, ken ti Ammorreo, ken ti Gergaseo,

¹⁷ Ken ti Heveo, ken ti Arceo, ken ti Cineo,

¹⁸ Ken ti Arvadeo, ken ti Semareo, ken ti Hamoteo: ket iti calpasanna nagwaras dagiti familia dagiti Cananeo.

¹⁹ Ket ti beddeng ti Cananeo naglayon nanipud iti Sidon, no cas agturongda iti Gerar, agingga iti Gaza: no cas agturongca iti Sodoma ken Gomorra ken Adma ken Seboim, agpapan iti Lasa.

²⁰ Dagitoy dagiti lallaki nga annac ni Cam, cas cadagiti familiada, mayannurot cadagiti pagsasaoda, cadagiti dagdagada, cadagiti pagpagarianda.

²¹ Ket ken Sem, nga ama dagiti amin nga annac ni Jeber, nga cacaen ni Jafet, kencuana met nagtaud dagiti putputot.

²² Dagiti lallaki nga annac ni Sem: ni Elam, ken Assur, ken Arfajad, ken Lud ken Aram.

²³ Ket dagiti lallaki nga annac ni Aram: da Uz, ken Hul, ken Geter, ken Mas.

²⁴ Ket ni Arfajad pinutotna ni Selah; ket ni Selah pinutotna ni Jeber.

²⁵ Ket ken Jeber naiputot ti dua nga annac a lallaki: ti nagan ti maysa Peleg; ta cadagiti aldawna nabingay ti daga; ket ti nagan ti lalaki a cabsatna Joctan.

²⁶ Ket ni Joctan pinutotna ni Almodad, ken Selef, ken Hazarmavet, ken Jera,

²⁷ Ken ni Hadoram, ken Uzal, ken Dicla.

²⁸ Ken ni Obal, ken Abimael, ken Saba,

²⁹ Ken ni Ofir, ken Havila, ken Jobab; amin dagitoy isuda idi dagiti lallaki nga annac ni Joctan.

³⁰ Ket ti nagnaedanda idi nanipud Mesa, no cas agturongca iti Sefar a bantay ti daya.

³¹ Dagitoy isuda dagiti lallaki nga annac ni Sem, mayannurot iti familiada, cadagiti pagsasaoda, cadagiti dagdagada, cadagiti pagpagarianda.

³² Dagitoy dagiti familia dagiti lallaki nga annac ni Noe, a mayannurot cadagiti caputotanda, cadagiti pagpagarianda: ket cadagitoy nabingay dagiti pagpagarian iti daga iti calpasan ti layus.